II Rois 11 - Ma Zhiklè

Athalie, ngwoz, bi Juda

¹ Athalie, mam Achazia, a nrka, kra na a mʼmets na ma, a hüno a nzeda ndohi gi bai.

² Aman Joshéba, dem bi Joram, demam Achazia, a nco Joas, te va wudahi bai, man ta bazl ta, a nʼngheda a gi mʼmèn na, a nda ngwoz ntseda na wa. A nʼngheda aranta a sam Athalie, aman ta slaha ta keɗa ɓai.

³ A nʼnza a sam na te gi Zhiklè, mvi 6, aman Athalie bai te kokwar.

⁴ Te mvi 7, Jehojada a nzlündo ndo a sam bihi ndohi mɓer gèɗ na, a ndohi sak na, ta shkè a sam na a gi Ndo nzi pèc pècèk. A nderzla ma a nda ta, a ta goɗ a mʼmbèɗè te gi Ndo nzi pèc pècèk. A nʼngra ta kra bai.

⁵ Te deɓaʼa a njè ta ma a gèɗ, a ngaɗa: Sèi vagu skwi haha! Va-kezla va makar, ngiɗè ta da nzi a ma gi bai;

⁶ ngiɗè ta da nzi a ma gi Sur, mamakaraʼa ta da nzi a ma gi te deɓ golahi bai, a pats nshèk va man kin gi mizlinè kinè. Kin veni nveni a nʼnzi a ma gai.

⁷ Nʼngél-va kinè cèw, tengaʼa man ta shke auda a ma gi Ndo nzi pèc pècèk a pats nshèk va, a ta dè a ma gi bai.

⁸ A kin ɓica va a tsagi bai, staɗ staɗ tèlèba a skwi var te rai. Ndo man a woya a mbizhè a ndev kinè, a ndè a gai, sèi ta keɗaʼa, a kin dzodzor bai man a dè a gai, man a shkè auda te gai.

⁹ Tsuvom ndohi 100, 100, ta dzodzor ma Jehojada, ndo mvi skwi a Zhiklè, tèlèba. Staɗ staɗ tèlèba to do a nda ndohi tengaʼa, man ta hün mizlinè, man ta jèkeda mizlinè, a pats nshèk va, a sam Jehojada, ndo mvi skwi a Zhiklè.

Jehojada a mbada na mbar a gèɗ a Joas

¹⁰ A ndo mvi skwi a Zhiklè a mpa ta tsakwal a gambar bi David a bihi sojè, man ta zhè te gi Ndo nzi pèc pècèk.

¹¹ Ndohi sak staɗ staɗ tèlèba a skwi var te rai, ta zlatsa, a hinè a der gi Zhiklè ngiɗè, a ndè a der gi Zhiklè ngiɗè, te civèɗ ri mandai, te civèɗ ri gula a ma sam mvi skwi a Zhiklè.

¹² A ndo mvi skwi a Zhiklè, a nda kra bai auda a sam ta, a mpaɗa na gèɗ a mpèɗè gèɗ bai, a mva na tèslri bai a rai. A ta feda a bai, a ta bada na mbar a gèɗ, a ta tsi ri kura kura kuraʼa, a ta gada: Da nza a bai a mèdèp!

¹³ Athalie a ntsena nhèzlèwè ndohi sak, a ndohi tèlèba, a mshkè a sam ndohai a gi Ndo nzi pèc pècèk.

¹⁴ A mrka bai a sam man a nzlatsa a pa, a tsagi sak gai, ara man ta gia te kokwar ta, a bihi sojè a golahi bai a tsagi na. A ndohi tèlèba ta wuffè a ta tsu tolom. A Athalie a nkuratseda maslaka nengaʼa aussa, a ntsu lalau: Ta gay ri a gèɗ, ta gay ri a gèɗ!

¹⁵ Jehojada, ndo mvi skwi a Zhiklè, a mfa ta ma a gèɗ a bihi sojè, a ngaɗa ta: Da da auda a dalmagai! Ndo man a dè a verzi nengaʼa, va-keɗaʼa! Aman ndo mvi skwi a Zhiklè a ngaɗa: Kin keɗaʼa te gi Ndo nzi pèc pècèk ɓai!

¹⁶ A ta gso, a ta bezda a ntamagi plèshihai, a ta da a gi bai. Te pa ta keɗaʼa.

Jehojada a gedassa skwi mʼmbèh skwai

¹⁷ Te deɓaʼa Jehojada a nderzla ma a Ndo nzi pèc pècèk, a nda bai, a nda ndohai, aman ndohi ta ndi a ndohi Zhiklè.

¹⁸ Te deɓaʼa ndohi kokwar tèlèba ta shkè a gi Baal, a ta gedassedaussa. Ta mbeɗa sam mvi skwi a pa, a skwi nzlatseda a pa, a mèdèp. Matthan, ndo mvi skwi a Baal, ta keɗaʼa a ma sam mvi skwi a Baal. A ndo mvi skwi a Zhiklè a mfeda ndohi mɓer gai a ma gi Ndo nzi pèc pècèk.

¹⁹ A mhul bihi sojè a ndohi mɓer gèɗ bai, a golahi bai, a ndohi kokwar tèlèba, a ta da bai auda te gi Ndo nzi pèc pècèk, a ta daʼa a gi bai, a ta bezda a ntamagi golahi bai. A nengaʼa a nʼnzahi a gèɗ sam nʼnzi bihai.

²⁰ Ndohi kokwar tèlèba ta wuffè, a kokwar a nʼnza a gumi. Athalie, ta keɗaʼa te gi bai, a tsakwal.

²¹ Joas, mvi 7, aman ta feda a bai.