II Rois 1 - Ma Zhiklè

Achazia a Elie

¹ Te deɓ mʼmetsi Achab, ndohi Moab ta slambaɗa ta va a ndohi Israel.

² Achazia a nkalkaɗahai a nvakavar te gi nengaʼa nte géɗèʼa, te Samarie, a ntsama na skwaʼa. A nzlinde ta ndohi sak a ngaɗa ta: Vo-do, vo-dzhoɗo a sam Baal-Zebub, zhiklè mʼmbèh skwi Ekron, i da mbel ga de, kè?

³ Gol Ndo nzi pèc pècèk a ngaɗa na Elie, ndo Thishbé: Slambaɗa, a ko do a kin zli gèɗ a ɓèlèlihi bi Samarie, a ka da gaɗa ta: Zhiklè a te Israel bi dè, a kin dè a kin jhèɗè Baal-Zebub, zhiklè Ekron, èhèmè?

⁴ Gar haha Ndo nzi pèc pècèk a goɗ ar haha: Ka da slèmbèɗè auda te matakwan ngaya asaɓai, sèi ka metsi ngaya. A Elie a mdo na.

⁵ A ndohi sak ta shkè a deɓa a sam bai, a nengaʼa a ngaɗa ta: Kin shkè a deɓa èhèmè?

⁶ A ta gaɗa na: Ndo ngiɗè a mshkè, a nga zlü gèɗ a vna a civèɗ, a ngaɗa nga: Vo-do a deɓa a sam bai man a nzlindka kinè, a kin da gada na: Ndo nzi pèc pècèk a goɗ ar haha: Zhiklè a te Israel ɓi dè, a kin dè a kin jhèɗè Baal-Zebub, zhiklè Ekron, èhèmè? A gèɗ nengaʼa ka da slèmbèɗè te matakwan ngaya asaɓai, sèi ka metsi ngaya.

⁷ A nengaʼa a ngaɗa ta: Ndo a gu kè, man kin zlü gèɗ a vna, a ngaɗa kinè ma haha?

⁸ Ta gada na: Ndo a bkwi a va, a hutèɗ te deɓa. A nengaʼa a ngaɗa: Nasa Elie, ndo Thishbé.

Vogwa a shkè te zhiklè

⁹ A nzlündo tsuvom ndohi 50, a nda ndohi nengaʼa 50, a ta dè a sam nengaʼa. A ndikè a sam na, a nʼnza a géɗ za. Ngidè a ngaɗa na: Ndo Zhiklè, bai a ngaɗa: Washkèhai!

¹⁰ Elie a mʼmbeɗa na a ma, a ngaɗa na tsuvom ndohi 50: Aman i ndo Zhiklè, a vava, vogwa da kalkaɗahi te zhiklè, da nde kinè a ndohi ngaya 50 a ma tèlèba! A vogwa a nkalkaɗahai te zhiklè, a ndu nengaʼa a ndohi nengaʼa 50 tèlèba.

¹¹ A bai a nzlündo tsuvom ndohi 50 ngiɗè a sam na zaʼa. A nengaʼa a ngaɗa na: Ndo Zhiklè, bai a goɗ ar haha: Washkèhai tsam-tsam!

¹² Elie a mʼmbeɗa na a ma, a ngaɗa na: Aman i ndo Zhiklè a vava, vogwa da kalkaɗahi te zhiklè, da nde kinè a ndohi ngaya 50 a ma tèlèba! A vogwa Zhiklè a nkalkaɗahai te zhiklè, a ndu nengaʼa a ndohi nengaʼa 50 tèlèba.

¹³ A bai a nzlündo tsuvom mamakaraʼa a géɗ 50 a ndohi nengaʼa 50 zaʼa. Tsuvom mamakaraʼa a géɗ 50, aman a ndikè a sam na, a nda kalahi a deɓ sak Elie, a ntsu riaʼa, a ngaɗa na: Ndo Zhiklè, ɓür nshèffè ga a nshèffè ndohi 50, ɓèlèlihi ngaya, haha.

¹⁴ Na haha vogwa a mshkèhi te zhiklè, a nʼnde ta tsuvomhi cèw nshèlè-kurhiaʼa a géɗ 50 a ndohi tengaʼa 50. Aman ɓür nshèffè ga!

¹⁵ A gol Ndo nzi pèc pècèk a ngaɗa na Elie: Do a verzi nengaʼa, ka gu zlau nengaʼa ɓai! A Elie a nslambaɗa, a ndo a verzi nengaʼa, a sam bai.

¹⁶ A Elie a ngaɗa na: Ndo nzi pèc pècèk a goɗ ar haha: A géɗ man ka zlündo ndohi sak a ta dè njhèdè Baal-Zebub, zhiklè Ekron (Zhiklè te Israel azɓi dè, aman ka jhèɗè ma a sam nengaʼa?) ka da slèmbèɗè auda te matakwan ngaya haha azbai, sèi ka metsi ngaya.

¹⁷ A bi mʼmets na a vava, ara man Ndo nzi pèc pècèk a goɗ te ma Elie. Joram, kramam nengaʼa, a ngu bi te di man a nengaʼa (te man kra na azɓai), te va man Joram, kra Josaphat, bi Juda te mvi macecèwaʼa.

¹⁸ Ma ngiɗè a géɗ mizlinè Achazia, a géɗ skwi man a gau, ta windeda ɗèlèwèr ma bihi Israel.