Hébreux 9 - Ma Zhiklè

Sam nkezla tʼherkeda, sam nkezla te zhiklè

¹ A vava nderzlè-ma nshèlèkuraʼa a ntül ma mizlinè Zhiklè, a gi nkezlaʼa, tʼherkeda.

² Aman a pa, ta gu gi maslaka, te civèɗ dzeɓa man a ma, a sam man skwi nfi vogwa a table movar nkezlaʼa a pa, a ta baha na sam nkezlaʼa.

³ Te civèɗ ndzeɓa ngiɗè, te deɓ maslaka ntamagai, sam a zhè man ta baha na sam nkezli nkezlaʼa.

⁴ Te pa sam nʼndèr burdi man ta gu a guro, a koti nderzlè-ma mbèʼa a guro, a shiɗèf guro man manna te pa, a gada Aaron man a tsu vah, a kwa nkelwoɗaʼa a nderzlè-ma a pa.

⁵ A géɗèʼa, chérubimhai nʼnjèl Zhiklè, man ta pizleda sam mpil gèɗ a pa. A géɗ tengaʼa nga gèɗè ma ngiɗè a vaʼa azɓai antanta.

⁶ Skwi tèlèba ntila aranta, a ndohi mvi skwi a Zhiklè to do a gi pèc pècèk, te civèɗ ndzeɓa nshèlèkuraʼa, a ta gu mizline Zhiklè a pa.

⁷ Aman a gi te civèɗ ndzeɓa ngiɗè, sèi bi ndohi mvi skwi a Zhiklè a mdo a pa, a mvi a mvai sak staɗgenè. A dè azɓai, man Pombaz a te ri na ɓai, Pombaz skwi man a zlau a géɗ va nengaʼa, a géɗ ndohi ba, a géɗ mali man ta senaha ɓai.

⁸ Mèzhèɓ Zhiklè nkezlaʼa a ngreda civèɗ aranta a sam nkezli nkezlaʼa, a gedka va auda a di di ɓai, te man gi te civèɗ dzeɓa nshèlèkuraʼa a zhè dai.

⁹ Nengaʼa tèlèba skwi nlèmdè a patshi haha genè. Skwi man a viaʼa, a skwi man a zlia aranta, a slaha a ntil mèzhèɓ ndav ndo man a gi mizlinè Zhiklè, jèlèlè ɓai.

¹⁰ Nengaʼa ma nkwèr a géɗ va ndo genè, a géɗ skwi nʼndai, iyam nsai, mpèn va man ndohi ta giaʼa, ha pats man skwi ntila zura ma.

¹¹ Aman antanta Kristi a nshkè, bi ndohi mvi skwi a Zhiklè a géɗ skwihi mbelaʼa man ta zhè ma. A mbeza a ndav gi mbiaʼa mbelaʼa holholaʼa, man ri ndo a ngu ka ɓai, nte va skwi nʼngaʼa a géɗ herkeda haha ka ɓai.

¹² A mbeza a pa a sam nkezlaʼa sak staɗ, te deɓaʼa klèng; a Pombaz ɓok a wud zlè ka ɓai, aman a Pombaz va nengaʼa, a nʼngatsa nga skwi mʼmbel nga a mèdèp.

¹³ Aman Pombaz ɓok a marihai a mèrwèc zlè, man ta geda a va ndohi nlizhèa, a mpan ta te skwi man a lizh ta,

¹⁴ holholaʼa Pombaz Kristi, man a vau nshèffè a ri na a skwi nzli a Zhiklè, man mali a te pa ɓai, te Mèzhèɓ Zhiklè man a zhè a mèdèp, a pènè mèzhèɓ ndav nga te mizlinè mʼmetsaʼa, man kala a deɓa ma, a nga gi mizlinè Zhiklè man a zhè a nshèffè.

¹⁵ Ar haha nengaʼa ndo mbezda nga nderzlè-ma mɓuaʼa; aman a géɗ mʼmetsi nengaʼa, skwi mbel ndo te malai a sam nderzlè-ma mʼmovaʼa a zhè, a ndohi man Bi Zhiklè a baha ta, ta ngècè mpèsl rai a nʼndi skwi gi a mèdèp.

¹⁶ Ara a sam ndo man a njè ma auda, ga a metsi na. Njè-ma nengaʼa a ngècè wuɗi sèi man mʼmets na.

¹⁷ Aman njè-ma man ndo a mʼmets di ɓai, ara ma ambalai, a ngècè wuɗi te mʼmetsi genè.

¹⁸ Gar haha ba nderzlè-ma nshèlèkuraʼa ta gu sèi a Pombaz.

¹⁹ Aman Moise a ngra ta ndohi ma nkwèr tèlèba, man ma kita Zhiklè a jhèɗèʼa, a nco Pombaz wud zlèhai, a ɓokwai, a iyam, a gogumi nduzoa, a gada hysope,

²⁰ a nguceda a ɗèlèwèr, te deɓaʼa a gèɗ ndohi tèlèba, a ngaɗa: Na haha Pombaz nderzlè-ma man Zhiklè a mvau a géɗ kinè.

²¹ A nguceda Pombaz lèmèlèmè a géɗ kolongwi mizlinè Zhiklè, a géɗ gi maslaka.

²² Aman te ma kita, njèkè kèshkata a ngi skwi tèlèba, Pombaz a pènèʼa. Aman pombaz mbadahi ɓai, mprè mali azɓai.

Kristi a nco mali auda a mʼmetsi nengaʼa

²³ Aman ta pana skwi nlèmdè a skwi te zhiklè te géɗèʼa aranta, skwi zhiklè te géɗèʼa gèɗagèɗ, sèi a ngècè skwi man ta zli a Zhiklè amba holholaʼa.

²⁴ Aman Kristi a mdo a sam nkezlaʼa ɓai, man ri ndo a ngau, man a ngreda sam nkezlaʼa nzuraʼa genè. Aman a mdo a zhiklè tèp, aman anai a zlècè a sam di Zhiklè te di man a nga.

²⁵ A minè gèɗ a mvi va na a vaʼa asaɓai, ara bi ndohi mvi skwi a Zhiklè, man a dè a sam nkezlaʼa a mvi a mvai a pombaz skwi ngiɗè.

²⁶ Man ar haha, ar a nsu matakwan te nhinkaɗ herkeda pats ngiɗè pats ngiɗè kumba. Aman antanta, man patshi herkeda ta woy a ta ndiv ta, a ngudko va a di sak staɗ, a mvau nshèffè a ri na a skwi mpil gèɗ mali nga.

²⁷ Ara man ndohi sèi ta bèzl ta pats ngiɗè staɗ ndèzl, te deɓ mʼmetsi ta, kita a zhè,

²⁸ ara man Kristi a mvau nshèffe na sak staɗ, te deɓaʼa klèng, aman a ncè malihi ndohai kumba. Macecèwaʼa a di a gudko va a di a géɗ mali ka ɓai, aman a géɗ man a da hel ta ndohi man ta zhèrèʼa.