Hébreux 7 - Ma Zhiklè

Ndo mvi skwi a Zhiklè ara Melchisédek

¹ Melchisédek haha, nengaʼa bi Salem, ndo mvi skwi a Zhiklè, Bi Zhiklè a géɗ bi tèlè. Aman Abraham a mshkè a deɓa a ngwai te ngi var a nda bihai, a mdo aman ta zli gèɗ a vna, a mpshè na ma.

² A Abraham a mva na skwi staɗ te va kula, te skwi tèlèba. Nzlembaɗ nengaʼa nshèlèkuraʼa: Bi ngi-zuraʼa. Te deɓaʼa: Bi Salem, ara ngèɗè: Bi gumai.

³ Bab na azɓai, man na azɓai, verzi na azɓai, nhinkaɗ patshi na azɓai, nʼndikè-ma nshèffe na azɓai. Gar haha a gi lèmèlèmè ara kra Zhiklè: a nzi a ndo mvi skwi a Zhiklè a mèdèp.

⁴ Va-pu di a mbi nengaʼa, a géɗ man Abraham, babab mbiaʼa, a mva na skwi staɗ te va kula, te skwi man a dumkoɗi tèlèba.

⁵ Ma kita Zhiklè a gaɗa: wudahi Lévi, man ta ngots mizlinè mvi skwi a Zhiklè, ta cè skwi staɗ te va kula, te ri ndohai, man gwoli ta; ko tengaʼa ba ta shkè te verzi Abraham.

⁶ Aman nengaʼa, man te verzi Lévi ka ɓai, a mco skwi staɗ te va kula te ri Abraham, a mpshè na ma, nengaʼa man a ngots mahi mpèsl rai.

⁷ Anai ndèvèɗ ma azɓai: ndo mbiaʼa a pshè na ma a ndo nkèshèa.

⁸ A haha ndohi man a di ta metsi ta, ta cè skwi staɗ te va kula. Aman a sam ngiɗè, nengaʼa man a nzi a nshèffe, ara man ɗèlèwèr Zhiklè a gaɗa.

⁹ Nga slaha nga gaɗa, te Abraham ko Lévi, man a nco skwi staɗ te va kula a ri na, a mvau skwi staɗ te va kula.

¹⁰ A pats man Melchisédek a mdo, aman ta zli gèɗ a vna, Lévi a mshkè auda te verzi Abraham di ɓai.

¹¹ Aman agassa mizlinè mvi skwi a Zhiklè te Lévi nʼngaʼa jèlèlèʼa ma – a sam nengaʼa ndohi ta ngots ma kita Zhiklè – ar ta feda ndo mvi skwi a Zhiklè ngiɗè ara Melchisédek èhèmè? Ara Aaron azɓi èhèmè?

¹² Aman ta ngwèdè mizlinè mvi skwi a Zhiklè, sèi ta ngwèdè ma kita Zhiklè ba.

¹³ Nengaʼa man ta gèɗè ma haha a géɗ nengaʼa, nte verzi ndo ngiɗè. Te va tengaʼa ko ndo staɗ a nʼnga mizlinè mvi skwi a Zhiklè ɓai.

¹⁴ A vava, Bi nga a mshkè auda te verzi Juda, verzi man Moise a ngaɗa ta a géɗ mizlinè mvi skwi a Zhiklè ɓai.

¹⁵ A skwi haha a ngreda auda amba holholaʼa, aman ndo mvi skwi a Zhiklè ara Melchisédek a mshkè.

¹⁶ Aman a gu a ndo mvi skwi a Zhiklè a géɗ ndo, a ma kita Zhiklè ka ɓai, aman a géɗ wuɗi nshèffè man a ndivè azɓai a mèdèp.

¹⁷ Ma malwuɗi a haha: Ka ndo mvi skwi a Zhiklè a mèdèp, ara Melchisédek.

¹⁸ Aranta ma nkwèr zlèzlèa klèng, te man wuɗi na azɓai, a ntakaha ndo ɓai.

¹⁹ Ma kita a slaha a ntil skwi jèlèlèʼa azɓai; a ta cko skwi man nga zhèrè te ndav, amba holholaʼa, te nengaʼa nga herda na va a Zhiklè.

²⁰ A ngau a mʼmbèɗè. Tengahi ngiɗè ta gaʼa a ndo mvi skwi a Zhiklè te mʼmbèɗè ka ɓai;

²¹ aman ndo haha a mʼmbèɗè nengaʼa, man a gaɗa: Bi Zhiklè a goɗ a mbèɗè, a mindè a deɓa azɓai: Ka ndo mvi skwi a Zhiklè a mèdèp.

²² Gar haha Yèsu nʼngaʼa a skwi mvi a hai, a géɗ nderzlè-ma man amba holholaʼa.

²³ Tengahi ngiɗè kumba man ta ge ta a ndohi mvi skwi a Zhiklè. Aman a géɗ mʼmetsai ta nza ɓai.

²⁴ Aman ndo haha, a géɗ man a nzi a mèdèp, a nʼngots mizlinè mvi skwi a Zhiklè, man a ndivè azɓai.

²⁵ Gar haha a slaha a mʼmbel ta tengaʼa man ta shkè a sam Zhiklè a nzlembaɗ nengaʼa, a mèdèp, te man nengaʼa a nzi a nshèffè a mèdèp, aman a tsi ri a géɗ tengaʼa.

²⁶ A vava, sèi bi ndohi mvi skwi a Zhiklè aranta ambaha nga: ndo man a gi skwi ambaha Zhiklè, malai, a derɗa, az a sam na ɓai, va nkezla a sam ndohi malihai, a ta daʼa a géɗèʼa, a zhiklè.

²⁷ Nengaʼa ara bihi ndohi mvi skwi a Zhiklè ngiɗè ka ɓai; nengaʼa a zli skwi a Zhiklè a nciɗ sam a nciɗ sam a géɗ malihi na nshèlèkuraʼa azɓai, ga ta giaʼa a géɗ mali ndohi ngiɗè. Skwi haha a ngau sak staɗ, man a vau nshèffè na a ri na, te deɓaʼa klèng.

²⁸ Ndohi man ma kita Zhiklè a pe ta a bihi ndohi mvi skwi a Zhiklè, wuɗi ta azɓai. Aman ma mʼmbèɗè haha, man a shkè te deɓ ma kita Zhiklè, a mfeda kra Zhiklè a pa, man a zhè jèlèlèʼa a mèdèp.