Hébreux 6 - Ma Zhiklè

¹ Gar haha nga woya a nga jèkeda ngèdè a géɗ ma nhin Kristi. Aman ngo-dokoy a ma ma a nga ndi a ndohi Zhiklè nshfaʼa. Nga woy a nga minè gèɗèʼa asaɓai, a gèɗ ma ncè Zhiklè a ndav, ngwèdè ndav a mizlinè ambalai man a da na ma a mʼmetsai, man kala a deɓa ma,

² ma baptême, ma nfi ri a gèɗ, ma nslambaɗdekaɗ ndohi mʼmetsaʼa auda, a ma kita mbiaʼa a mèdèp.

³ Aman Zhiklè a woyaʼa, nga da gi arsa.

⁴ Ndohi man di ta mwina, a ta tor skwi zhiklè te géɗèʼa ma, a ta ngots skwi nkezlaʼa a sam Mèzhèɓ Zhiklè nkezlaʼa,

⁵ a ta tor ma Zhiklè man amba, a wuɗihi sam man a di a shkè,

⁶ a ta men ta a deɓa, ta slaha a ta da ngwèdè ndav ta ɓi zaʼa, te man ta gezlala kra Zhiklè a va zaʼa, a ta lüv mʼmetsi nengaʼa.

⁷ Herkeda man a si iyam man a shkèhai te zhiklè, man a fcè skwi auda, a gi skwi a ndohi man ta pi-zhèʼa, a nʼngots mpshè ma a sam Zhiklè.

⁸ Aman a ftsko vatak a nkuɗdzari auda, sama ambalai, Zhiklè a da phomda; te deɓaʼa ta fa na vogwa, klèng.

Skwi man nga zhèrè te ndav

⁹ Ko nga gaɗa kinè ar haha, dalahimam ga, aman a géɗ kinè nga suna, a vava, kin ngots skwi mbelaʼa, man a gi aman kin mbél kinè.

¹⁰ Aman Zhiklè nzuraʼa, a mizlinè kinè tèlèba, man kin gau a nzlembaɗ na, mwoy-ndo kinè man kin takaha ta ndohi Zhiklè a vna, ko ani ba kin takaha ta dai, a pca na a gèɗ azɓai.

¹¹ Aman nga woya aman staɗ staɗ te ndev kinè a dè a ma ma a ngi gazawa, ara man a gshè va a skwi man a zhèrè te ndav, ha ndikèmaʼa.

¹² Nga woya aman a kin gi wudar azɓai, a kin jèjèr tengaʼa man te ncè-a-ndav, te nzhèr skwia dai, ta ngècè skwi Zhiklè man a pasla ta ri a pa.

¹³ Aman Zhiklè a mpasla na ri a Abraham, a mʼmbaɗa a va na, te man a slaha a mbèɗè a ndo mbia ngiɗè ɓai,

¹⁴ a ngaɗa: A vava i da pshè ka ma, a verzi ngaya a mènè kumba.

¹⁵ A Abraham a nʼngots skwi man mpasla na ri a pa, te man a nzhor a ma ma.

¹⁶ Ndohi ta mbèɗè a ndo man a fen ta, a ta cè ma nengaʼa, a ta ndeva ndèvèɗ ma.

¹⁷ Gar haha Zhiklè a woya a ngreda ta ndohi nʼndi mpèsl ri nengaʼa a vava, skwi man a huro a ngwèdè azɓai; a géɗ nengaʼa a mʼmbaɗa.

¹⁸ Aman a skwi cèw man ta ngwèdè azɓai—aman Zhiklè a slaha a ncèkèlma azɓai—nga ngots skwi mbid nga nzuraʼa, nga man nga gshè va a nzhèrè te ndav man a zhè a ma nga.

¹⁹ A nengaʼa nga ngots skwi ngsa nga ndav nga zuraʼa, man a ngwèdè va azɓai, a bazla civèɗ a maslaka ntamagai a sam nkezlaʼa,

²⁰ man Yèsu, ndo ncè nga ma a beza a pa, man nʼngaʼa a bi ndohi mvi skwi a Zhiklè a mèdèp, ara Melchisédek.