Hébreux 5 - Ma Zhiklè

¹ Aman bi ndohi mvi skwi a Zhiklè staɗ staɗ tèlèba, ta co te ndev ndohai, ta fau aman a gi mizlinè a sam Zhiklè a géɗ ndohai. Aman a vi skwai, a zli skwai a Bi Zhiklè a géɗ malihai.

² Nengaʼa a slaha a nhér tengaʼa, man ta sun maya ɓai, ta zlak ta, te man nengaʼa ba, wuɗi na azɓai.

³ Gar haha sèi a zla na skwi a Zhiklè a géɗ ndohai, a géɗ malihi na, cèw ba.

⁴ Ndo a slaha a nslébèrdè va na, man a gaɗa: ‘i bi ndohi mvi skwi a Zhiklè’, azɓai, sèi Zhiklè a mbaha na, lèmèlèmè ara Aaron.

⁵ Lèmèlèmè Kristi ba, a nʼnzala va na a ri na, a ngaɗa: i bi ndohi mvi skwi a Zhiklè ɓai. Sèi Zhiklè a ngau, aman a gaɗa na: Ka kra ga, a patsna i fe ka.

⁶ Ara man a sam ngiɗè a gaɗa: Ka ndo mvi skwi a Zhiklè a mèdèp, ara Melchisédek.

⁷ Te va man a zhè a géɗ herkeda dai, a ntsu ri a kuɗa a dai, a ngu mbuh mbuh, a mbèhè a Zhiklè, man a slaha a mbelaʼa te mʼmetsai. A Zhiklè a ntsena ntsi ri nengaʼa, a géɗ man a mʼmanda gèɗ a hai pèc pècèk.

⁸ Gar haha, ko nengaʼa kra Zhiklè, a nslebau nfi gèɗ a ma Zhiklè te skwi man a dza na.

⁹ Te deɓaʼa man nʼngaʼa jèlèlèʼa ma, nʼngaʼa a verzi skwi mbél ndohi man ta fa na gèɗ, a mèdèp,

¹⁰ a Zhiklè a mbaha na bi ndohi mvi skwi a Zhiklè ara Melchisédek.

Va-gu maya a géɗ ndohi man ta jekeda ma Zhiklè

¹¹ Na haha, a géɗ nengaʼa ma nga a zhè kumba dai; aman mwuɗitpa, a dè a gèɗ kinè tsam tsam azɓai.

¹² Aman kinè, ar amba aman kinè ndohi njèngè ma; aman a woy sèi ndo da slebda kinè skwi nshè-lèkuraʼa te ma Zhiklè di zaʼa; da va kinè wa dai, ɗaf di ka ɓai.

¹³ Aman nengaʼa man ta va na wa dai, a sun maya nɗèl skwi nzura ɓai, te man nengaʼa kra wa dai.

¹⁴ Aman ɗaf ta va ta ndohi ngraʼa, man a géɗ mizlinè man ta gia pèc pècèk, ta sun maya, a ta sun nɗèl skwi man amba a skwi man ambaɓai.