Hébreux 4 - Ma Zhiklè

¹ Gar haha ngo-gokoy maya a zlau, aman ko staɗ te ndev kinè da nza a deɓa ɓai, a pats man mpèsl ri ndè a sam nshèk va na a zhè dai.

² Aman nga ba, nga tsena ma mbelaʼa lèmèlèmè ara tengaʼa. Aman njè-ma a ntakaha ta tengaʼa ɓai; ko ta tsena ma ba, ta ca a ndav ɓai.

³ Aman nga, man nga co a ndav, nga dè a pa a sam nshèk va, ara man Zhiklè a gaɗa: I gu ndav, a i mbaɗa, aman ta dè a sam nshèk va ga azɓai. Ko mizlinè nengaʼa nʼnga ma daga nhinkaɗ herkeda.

⁴ A sam ngiɗè ɗèlèwèr Zhiklè a goɗ a géɗ pats nshèk va: Te pats matsaraɗaʼa, Zhiklè a nsok va te mizlinè nengaʼa tèlèba.

⁵ Ko gar haha a samaʼa ta Windo zaʼa: Ta dè a sam nshèk va ga azɓai.

⁶ Aman anai a gi arsa: mathriaʼa sèi ta ndikè a sam nshèk va Zhiklè ndèzl, matrhiaʼa ngiɗè ta ndikè a pa azɓai, a géɗ man ta ca a ndav ɓai.

⁷ Zhiklè a ngreda pats ngiɗè zaʼa, man a baha na ‘patsna’, a ma David man a ngoɗ a matsa ma: A patsna man kin cinè daʼai nengaʼa, kin da sassaya ndav kinè ɓai!

⁸ Man a matsa Josué nda nhel ta a sam nshèk va sa, ar Zhiklè a ngaɗa te deɓaʼa a géɗ pats ngiɗè asaɓai.

⁹ Aranta sam nshèk va ndohi Zhiklè a zhè dai.

¹⁰ Aman ndo man a ndikè a sam nshèk va Zhiklè, a shèk va te mizlinè nengaʼa tèlèba, lèmèlèmè ara Zhiklè man a sok va te mizlinè nengaʼa.

¹¹ Gar haha ngo-gokoy maya, aman nga dè a sam nshèk va haha, aman ndo da kalahi ɓai, a géɗ man a nca a ndav ɓai ara tengaʼa.

¹² Aman ma Zhiklè a zhè, a nshèffè, a wuɗai, ntasla wètwètèʼa, a fena kafahi man a zli skwi te tsagi cèw, a dè a pa, ha a kezla mèzhèɓ a ndav, kala nguzgoz ba. Nengaʼa a wuzhè skwi man ndo a hérè te gèɗ, a skwi man ndo a woya te ndav.

¹³ Ko skwi staɗ nʼngheda a sam nengaʼa ɓai. Aman skwi tèlèba nʼngreda tʼuda a sam di Zhiklè, nengaʼa aman te deɓaʼa sèi nga da menda na skwi tèlèba.

Yèsu, bi ndohi mvi skwi a Zhiklè

¹⁴ Aman nga ngots bi ndohi mvi skwi a Zhiklè aranta, Yèsu, kra Bi Zhiklè, man a beza a ndev zhiklè te géɗèʼa, ngo-gsokoy va a ma Zhiklè nga!

¹⁵ Nga, wuɗi nga azɓai; aman nga ngots bi ndohi mvi skwi a Zhiklè man a ngaka nga auda. Skwi a mpeda a wi lèmèlèmè ara nga, a sam tèlèba, aman nengaʼa a nʼnga mali ɓai.

¹⁶ Gar haha ngo-hurdokoy va a sam nʼnzi bi na, man pombi a ngècè a pa, a nga fi gèɗ a vna, a nga da ngècè nsi ndo te va a pombai a pats man a woy skwi ntakaha nga a zhè.