Hébreux 3 - Ma Zhiklè

Yèsu a fena Moise

¹ Gar haha, kramamhi ga a civèɗ Zhiklè, man Zhiklè a baha kinè ba, va-pu di a Yèsu, nengaʼa ndo sak, a bi ndohi mvi skwi a Zhiklè.

² Nengaʼa nlèɓèslèa a sam Zhiklè man a fau, lèmèlèmè ara Moise a géɗ gi Zhiklè tèlèba.

³ Amba aman Yèsu a ngècè nʼnjèl holholaʼa, a fena Moise, te man nʼnjèl ndo nrèm gai a fena gi man a roma.

⁴ Aman gi staɗ staɗ tèlèba, ndo a nroma. Aman Zhiklè, nengaʼa a ngu skwi tèlèba.

⁵ Moise, ndo mizlinè nlèɓèslèa te gi Zhiklè tèlèba, a ngu malwuɗi a géɗ ma man Zhiklè a woya a ngèɗè te deɓaʼa.

⁶ Aman Kristi nlèɓèslèʼa, nengaʼa kra gi nengaʼa. Nga, gi nengaʼa, aman nga gshè va a nʼnjèl skwi man nga zhèrè te ndav, a nga fi gèɗ a vna, ha ndikèmaʼa.

Sam nshèk va ndohi Zhiklè

⁷ Gar haha, ara man Mèzhèɓ Zhiklè nkezlaʼa a gaɗa: A patsna, aman kin tsena daʼai nengaʼa,

⁸ kin da sassaya ndav kinè ɓai, ara man ta gu a ndav, a pats man skwa a mpe ta a wai tʼhèshèkèɗ,

⁹ a sam man babhi kinè ta piyè a wai, a ta jkedyè, ko ta rka mizlinè ga mvi 40 ma.

¹⁰ A géɗ nengaʼa ndav a ndzayè a géɗ verzi ndohi haha, a i gaɗa: Ta bizhèzlawa te ndav ten-gaʼa pèc pècèk, a ta sun civèɗ ga ɓai.

¹¹ A i gu ndzoan, a i mbaɗa: Ta ndikè a sam nshèk va ga azɓai!

¹² Va-gu maya, dalahimam ga! A woy ndo te ndev kinè ɓai, man ndav na ambaɓai, man a njèkeda ncè-a-ndav, a Bi Zhiklè man a zhè a nshèffe.

¹³ Aman va-büd va kinè, ngiɗè a ngiɗè, pèc pècèk, a pats man ta baha na ‘patsna’; a woy ndo azɓai, man ndav nengaʼa nsassayaʼa, a malai a ngsedama.

¹⁴ Aman nga gaʼa a ndohi man nga humda a nda Kristi, aman sèi man ndav nga a pa pèc pècèk taraʼa, te nhinkaɗ skwai, a ndè a ma ma ha nʼndikèma skwai.

¹⁵ Aman ta winde: A patsna man kin cinè daʼai nengaʼa, kin da sassaya ndav kinè ɓai, ara man ta gu a pats man ta gu ma.

¹⁶ Ndohi man ta tsenaʼa, a ta gu ndav, wa? Ndohi tèlèba man ta shkè auda te kokwar Egypte a nda Moise ka ɓi ɗè?

¹⁷ A ndav a ndza na Zhiklè mvi 40 a géɗ ngè? A géɗ ndohi man ta gu malai, a nckondohi tengaʼa ta husl ta tʼhèshèkèɗ ka ɓi ɗè?

¹⁸ Zhiklè a mʼmbaɗa na wa, aman a ndikè a sam nshèk va nengaʼa azɓai? A ndohi man ta fa na gèɗ ɓi genè!

¹⁹ A nga rkaʼa ta slaha ta dè a pa azɓai, a géɗ man ta ca a ndav ɓai.