Hébreux 2 - Ma Zhiklè

Skwi mʼmbel ndo mbiaʼa

¹ Gar haha sèi nga gshè va holholaʼa a ma mbelaʼa, man nga tsenaʼa, man ɓai nga da pèkèt nga a zlawa a sam nʼndikèma nga.

² Aman ma man golahi Zhiklè ta vau a nʼngots wuɗai, a ndohi malihi tèlèba, a ndohi mèdègèɗ, ta ngots di man a ta;

³ kos nga da mbél te mè, aman nga fi gèɗ a skwi mʼmbel ndo mbiaʼa aranta azɓai. Aman Bai Yèsu a njè nga skwi mʼmbel ndo haha nshèlèkuraʼa a ri na, a ndohi man ta tsenaʼa ta da na va.

⁴ A géɗ nengaʼa Zhiklè a ngu malwuɗai a skwi man a ngreda auda, a nrkedai, a skwi mbiaʼa man a gu tsaɗ tsaɗ, a Mèzhèɓ nkezlaʼa, man a venu ara ndav nengaʼa man a woyaʼa.

Tsuvom skwi mʼmbel ndo

⁵ Herkeda man a di a shkè, nengaʼa man nga gèɗèʼa haha, a mva ta a ri golahi Zhiklè ka ɓai.

⁶ Aman a sam ngiɗè ɗèlèwèr Zhiklè a gaɗa: Ndo kala mè, aman ka hér nengaʼa? Kos ndo kala mè, aman ka gi maya a géɗ nengaʼa?

⁷ Nʼnzi kètè ka mèndè gèɗè a hai a sam golahi Zhiklè: te deɓaʼa ka da paɗa na gèɗ a nslébèrdè, a nʼnjèlè,

⁸ a ka feda skwi tèlèba a hwaɗ sak nengaʼa. Aman a feda skwi tèlèba a hwaɗ sak nengaʼa, skwi man a nfa a hwaɗaʼa ɓai, azɓai. Aman antanta nga rka skwi tèlèba tʼhwaɗ sak nengaʼa di ɓai.

⁹ Nga rkaʼa, Yèsu man nʼnzi kètè ta manda na gèɗ a hi a sam golahi Zhiklè; a géɗ matakwan mʼmetsi nengaʼa ta paɗa na gèɗ a nslébèrdè, a nʼnjèlè, te man a ntor mʼmetsai te di man a ndohi tèlèba.

¹⁰ Zhiklè, a géɗ nengaʼa skwi tèlèbá a zhè, a skwi tèlèba a zhè te nengaʼa, a nʼnga Yèsu a ndo ncè ma ndohai a sam mʼmbel ndo, jèlèlèʼa te matakwan, aman a de ta wudahi kumba a sam nʼnjèlè.

¹¹ Aman nengaʼa man a kezla ndav ndohai, a ndohi man nengaʼa a kezla ta ndav, ta shkè tèlè te verzi staɗ. Gar haha nengaʼa a gi hori azɓai, man a sla ta kramamhi na.

¹² A gaɗa: I war i njè nzlembaɗ ngaya a sam kramamhi ga, a i sli dimèsh nslébèrdè ngaya a sam mpi ndohi Zhiklè tèlèba.

¹³ A vaʼa: I woy aman i fi gèɗ a ka. A vaʼa: Na haha, iyè a wudahi man Zhiklè a vayè.

¹⁴ Ara man wudahi ta ngots gada va a Pombaz ara ndohai, nengaʼa ba lèmèlèmè. Aman te mʼmetsi nengaʼa a nguzlo wuɗi te ri bi madzagai, man a ngots wuɗi mʼmetsai.

¹⁵ A mpreka ta ndohi man ta nza ara ɓèlèlihi te nshèffè tèlèba, a géɗ zlau mʼmetsai, auda.

¹⁶ Aman nengaʼa a mshkè a ntakaha ta golahi Zhiklè ka ɓai, aman a ntakaha ta wudahi Abraham.

¹⁷ A géɗ nasa sèi nʼngaʼa lèmèlèmè te skwi tèlèba ara kramamhi na, nʼngaʼa a bi ndohi mvi skwi a Zhiklè a sam di Zhiklè, nlèɓèslèa, man ndo a sia te va, man a mpela gèɗ mali ndohai.

¹⁸ Aman nengaʼa a nsu matakwan, skwi a mpeda a wai, anai a slaha man a ntakaha ta ndohi man skwa a pe ta a wai.