Hébreux 13 - Ma Zhiklè

Mizline man ambaha Zhiklè

¹ Va-nze taraʼa te mwoy kramamhi kinè te Kristi!

² Nfi mbrokihi a gai, da pca kinè a gèɗ ɓai; aman arsa ndohi ngiɗè ta peda golahi Zhiklè a gai, a ta senaha ɓai.

³ Va-hur ndohi dangai, ara man kinè te dangai a nda tengaʼa, a ndohi te skwi mwuɗitpa, ara man kin te vaʼa.

⁴ Va-slubordo nʼnzi nda baki a ngwoz, kin lizhè sam mènèe kinè ɓai, aman Zhiklè a da ga ta kita a ndohi ngi baki a dala, a ndohi mphömè.

⁵ Mwoy Suli da gso ndav kinè ɓai; skwi man kin ngotso, da dèʼa kinè! Aman Bi Zhiklè a ngaɗa: I pra ka ma gèɗ azɓai, i jèke ka a géɗ ngaya azɓai.

⁶ Gar haha nga slaha a nga mènè ndav nga, a nga gaɗa: Bi Zhiklè, nengaʼa man a takahayè, i woya man i gi zlau azɓai. Ndo a slaha a ngay mè?

⁷ Va-hur ndohi ncè kinè ma nhalaʼa man ta njè kinè ma Zhiklè. Va-pu di a ndikèma nshèffè tengaʼa, va-dzodzor ncè-a-ndav tengaʼa.

⁸ Yèsu Kristi lèmèlèmè ara madatsa, a patsna, a mèdèp.

⁹ Va-gu maya aman njè-ma ngiɗè tsaɗ tsaɗ da ngazl kinè a ri ɓai. Amba, aman ndav nga a ngècè wuɗai te pombi Zhiklè, te nhér gèɗ a géɗ skwi nʼndi genè ka ɓai; a takaha ta tengaʼa man ta jèjèrèʼa arsa, azɓai.

¹⁰ Nga ngots sam mvi skwi a Zhiklè, te nengaʼa ndohi man ta gi mizlinè a sam nkezlaʼa, ta slaha ta ndia ɓai.

¹¹ Skwihi man bi ndohi mvi skwi a Zhiklè a nckoɗi pombaz a sam nkezlaʼa a géɗ malai, ta fa na vogwa a nckondohiaʼa a dal kokwar.

¹² Gar haha Yèsu ba, aman a nkezle ta ndohi nengaʼa a pombaz va nengaʼa, a mʼmets na a dal kokwar.

¹³ Gar haha ngo-dokoy auda a sam nengaʼa a dal kokwar, a nga mbi a hori nengaʼa.

¹⁴ Aman a haha, nga ngatsa kokwar man a nzi a mèdèp ɓai; aman nga hèsh nengaʼa man a di a shkè.

¹⁵ Gar haha ngo-vokoy skwi nshid gèɗ a Zhiklè pèc pècèk; nasa ma nga, man a ngrédè nzlembaɗ nengaʼa.

¹⁶ Mvi skwai, a ngi skwi man amba a sam ndohi ngiɗè, da pca kinè a gèɗ ɓai; aman mvi skwi arsa, ambaha Zhiklè.

¹⁷ Va-fa na gèɗ a ma ndohi ncè kinè ma, va-dzodzor tengaʼa man ta ɓer nshèffe kinè; ta ara ndohi man Zhiklè a da dzhaɗ ta a géɗèʼa. Va-gu aman ta slaha a ta gi mizlinè tengaʼa a mwuffè; man ta ɗish va a ta kuɗai, a takaha kinè te mè?

¹⁸ Va-tsu rai a géɗ nga! Nga sun a vava mèzhèɓ ndav nga amba, a nga gi maya, aman nga gi zuraʼa te skwi tèlèba.

¹⁹ I dzhaɗ kinè holholaʼa, aman kin tsi rai a gèɗ ga, a i slaha a i dè a sam kinè ndul ndul.

Mpshè ma a mbali man a deɓa

²⁰ Aman Zhiklè gumai, man a ncko Bi nga Yèsu auda te mʼmetsai, ndo mɓer tambakhi mbiaʼa te pombaz nderzlè-ma a mèdèp,

²¹ da va kinè maya, aman te skwi man amba tèlèba kin gi ara man a woyaʼa. Da gu skwi man ambaha te ndav nga, te Yèsu Kristi. A Yèsu, nʼnjèlè pèc pècèk a mèdèp. Amen.

²² Aman i bid kinè, dalahimam ga, va-ɓür ma haha man i bid kinè a vna! I Windo kinè kèshkata genè.

²³ Va-suna, Timothée, kramam nga, ta pra zaʼa. Aman a da shkè tsam tsam, i woya nga dè a sam kinè a vna.

²⁴ Va-ga ta mbalai a ndohi ncè kinè ma, a ndohi Zhiklè tèlèba! Kramamhi te Italie ta ga kinè mbalai.

²⁵ Pombai da zhè a nda kinè tèlèba!