Hébreux 11 - Ma Zhiklè

Ncè-a-ndav

¹ Aman ncè-a-ndav, nengaʼa man nga suna, nga ngècè skwi man nga zhèrè te ndav, skwi man nga rka a di ɓai, aman nga sun te ndav nga, na zhè a vava.

² A géɗ ncè-a-ndav arsa, ndohi halaʼa ta ngots skwi man Zhiklè a ngreda ta.

³ A géɗ ncè-a-ndav nga suna, ma Zhiklè a ngu herkeda, a skwi man nga rkaʼa, nʼngaʼa te skwi man nga rka a di ɓai.

⁴ A géɗ ncè-a-ndav, Abel a nzla na skwi man ambaha Zhiklè holholaʼa, a fena Cain. A géɗ ncè-a-ndav nengaʼa, Zhiklè a nʼngreda auda ara ndo nzuraʼa, a nco skwi man a va na; a Abel, ko mʼmetsa ma, a gèɗè.

⁵ A géɗ ncè-a-ndav, Zhiklè a nco Enoch, mʼmetsahi ɓai, a ta ngatsa a géɗ herkeda ɓai, aman Zhiklè a mco. Ga Zhiklè a ncèʼa, a nʼngra na, ka ambahayè.

⁶ Aman ndo man a nca a ndav ɓai, ambaha Zhiklè ɓai. Ko wawa man a herda na va a Zhiklè, sèi do co a ndav na, Zhiklè a zhè, a va ta skwi ntul ta a tengahiaʼa man ta hèshèʼa.

⁷ A géɗ ncè-a-ndav na, Noé a ngu zlau Zhiklè, a ngu wurom, man a mbela gi nengaʼa, aman a ntsena ma Zhiklè, a géɗ skwi man nʼnga di ɓai. Ncè-a-ndav nengaʼa a nfa na mali a gèɗ a herkeda; aman nengaʼa a ngots ngi-zuraʼa, man nga ngè-cèʼa, a géɗ man nga co Zhiklè a ndav nga.

⁸ A géɗ ncè-a-ndav na, Abraham a ndzodzor ma Zhiklè, aman a baha na, a ndo a sam man Zhiklè a gaɗa na do a pa, aman a da ngècèʼa a nda ndohi nʼndi gi nengaʼa. A nengaʼa a mdo, ko a sun sam man a dè a pa ɓai.

⁹ A géɗ ncè-a-ndav na, a nʼnza te kokwar man Zhiklè a ngaɗa a woya a mva na, ara mbrok, a nʼnza a gè-jèk-dak-hai, ara Isaac a Jacob, ndohi nʼndi mpesl ri Zhiklè ara nengaʼa.

¹⁰ Aman nengaʼa a zhor kokwar, man verzi na taraʼa, man Zhiklè a ngau, a nɗüzlo.

¹¹ A géɗ ncè-a-ndav na, Sara a nʼngots wuɗai man a ngècè kra, ko nhala ma, te man a gaɗa: nengaʼa man a mpaslay rai, nlèɓèslèa.

¹² Gar haha te ndo staɗ man zhuwaʼa a ma vèvèɗ ma, wudahi kumba ta shkè auda, ara bantihi te giɗfèk, a wyak a ma woyam mbiaʼa, man a ngrè azɓai.

¹³ Ndohi haha tèlèba ta bazl ta te ncè-a-ndav tengaʼa, a ta ngatsa skwi mpèsl a ri ɓai, aman ta rka dra genè. Ta ga na mbali dra, a ta suna a vava, ta mbrokihai, ta ndohi nshèwèlè a géɗ herkeda genè.

¹⁴ Ndohi man ta gèɗè arsa, ta ngredèʼa, ara man ta woy kokwar-bi ngiɗè.

¹⁵ Aman a matsa ta woyaʼa, ar ta slaha ta ngècè civèɗ a ta minè a deɓa a kokwar man ta shkè auda te pa dai.

¹⁶ Aman anai ta woy kokwar man amba holholaʼa te zhiklè te géɗèʼa. Gar haha Zhiklè a gi hori azɓai, man a gi a Zhiklè ta. A ntila ta kokwar mbelaʼa ma.

¹⁷ A géɗ ncè-a-ndav nengaʼa, Abraham a mvau Isaac a pats man Zhiklè a njkeda, a mvau kra nengaʼa, kra nengaʼa staɗgenè, ko a nʼngots ma mpèsl ri a géɗ nengaʼa ma.

¹⁸ Te nengaʼa Zhiklè a ngaɗa na: Skwi man a shkè te Isaac, ta da baha na gerzi ngaya.

¹⁹ A nhuro, Zhiklè a slaha a nslambaɗdekaɗ ta ndohi mʼmetsaʼa ba. A géɗ nengaʼa ara man a ngots a deɓa te mʼmetsai.

²⁰ A géɗ ncè-a-ndav nengaʼa, Isaac a mpshè ta ma a nda Jacob a Esau, a ngoɗ a géɗ skwi man a di a shkè.

²¹ A géɗ ncè-a-ndav nengaʼa, Jacob a mpshè ta ma wudahi Joseph cèw, ga a metsi na, a ntsu ri a Zhiklè, a ntho gèɗ a gada.

²² A géɗ ncè-a-ndav nengaʼa, Joseph a ngaɗa ta wudahi Israel, ga a metsi na, a géɗ man ta da jèkeda kokwar Egypte, a ngaɗa ta aman ta da hil vatasl nengaʼa a rai.

²³ A géɗ ncè-a-ndav tengaʼa, mam a bab Moise ta ngheda kra, man ta yau, ki makar, aman ta rka kra man amba, a ta ga zlau ma bi ɓai.

²⁴ A géɗ ncè-a-ndav nengaʼa, man Moise ngra ma, a woya a ndi a kra bai, kra dem Pharaon, ɓai;

²⁵ a nhur dara nga da nzi a matakwan a nda ndohi Zhiklè, a géɗ man i wèl va kètè tʼhwaɗ malai a géɗ herkeda.

²⁶ A nrka skwi ndzi a géɗ Kristi ara skwi mbiaʼa, a fena skwi mèshèlè te kokwar Egypte tèlèba, te man a mpu di a skwi ntulè man a ma, man a da ngècè te deɓaʼa.

²⁷ A géɗ ncè-a-ndav nengaʼa, a njèkeda kokwar Egypte, a nʼnga zlau ndzoan bi ɓai, aman a nʼnza taraʼa, ara man a rka nengaʼa man a rke a di azɓai.

²⁸ A géɗ ncè-a-ndav nengaʼa a ngu ngolala Pâque, a nguceda pombaz, aman gol Zhiklè, man a bèzlè ndo, a slaha a mbazl ta tsuvomhi Israel ɓai.

²⁹ A géɗ ncè-a-ndav nengaʼa ta beza a ndev woyam mbiaʼa nduzoa, ara man ta beza a sam man iyam az a pa ɓai. Ndohi Egypte ta woya a ta jkedè arsa, a iyam a nzede ta.

³⁰ A géɗ ncè-a-ndav, zlazlar Jé-richo a mʼmbeɗ ha hai, aman ta tèuda pa mʼmèn tsaraɗ.

³¹ A géɗ ncè-a-ndav ta keɗa Rahab, fali ngwoz, a nda ndohi ncè a ndav ɓi ɓai, te man a mpe ta ndohi nzeɓi kokwar a gai a gumai.

³² A i da njè kinè a va za mè? Ri azɓai man i njè ma Gédéon, ma Barak, ma Samson, ma Jephthé, ma David, ma Samuel, ma ndohi nhadka ma.

³³ A géɗ ncè-a-ndav tengaʼa ta duma kokwar-bi ngiɗè, ta gau zuraʼa, a ta ngots skwi man mpasla ta rai, ta pizlèma na ma a marzihèlè,

³⁴ ta mbatsa wuɗi vogwa, ta mbel ta te ri kafahi gwèsh, ta ngots wuɗai, man nshèlèkuraʼa wuɗi ta azɓai, ta ngots wuɗai a sam var, ta gu aman ndohi var mayamhai ta mindè va ta a deɓa.

³⁵ Ngwozihai ta ngots ndohi tengaʼa, man ta bazl ta, a deɓa, man ta slambaɗkaɗauda te mʼmetsai. Aman tengahi ngiɗè ta su matakwan mʼmetsai; aman ta woy a ta pre ta, ta kwolaʼa, a géɗ man ta ngècè nslambaɗkaɗauda man a fenaʼa.

³⁶ Tengahia ngiɗè tsaɗ tsaɗ ta pe ta a wai, ta ngwossaha ta, ta ndah ta a mènèwèɗ, ta dzaw ta, ta de ta a gi dangai.

³⁷ Ta kal ta a kwa, ta dasi ta ndèslè, ta tez ta a gwèsh, ta kal ta a tsakwal, ta sawala a bkwi tambak a bkwi ɓok a va, mi a bazl ta, matakwan a skwi mwuɗitpa a ga ta,

³⁸ ara man ndohi herkeda ta slaha ta sia arsa ɓai. Ta ndima te ndev hèshèkèɗ, te za, te slrats, te vèvèɗ herkeda.

³⁹ Tengaʼa tèlèba, ko ta ngreda ncè-a-ndav ta auda, ta ngatsa skwi man mpasla ta ri a pa di ɓai.

⁴⁰ Zhiklè a nhur skwi mbelaʼa holholaʼa a géɗ nga; aman nga da gi a njèlèlèʼa a nda tengaʼa.