Hébreux 10 - Ma Zhiklè

¹ Aman ma kita Zhiklè nengaʼa mèzhèɓ skwi mbelaʼa man a di a shkè, skwi géɗagèɗ ka ɓai. Gar haha a slaha a nʼnge ta ndohi man ta zli skwi a Zhiklè jèlèlèʼa a mèdèp azɓai. Aman a mvi a mvai ta zli skwi a Zhiklè pèc pècèk lèmèlèmè.

² Aman a matsa a slaha, ar mizlinè mvi skwi a Zhiklè klèng. A ndohi man ta gu mizlinè Zhiklè, aman ndav ta mpana sak staɗ, te deɓaʼa klèng, ar ta hér malihi te deɓaʼa asaɓai.

³ Aman anai ta hér malihi ta arsa, a mvi a mvai.

⁴ Aman Pombaz ɓok wai a marihi a slaha a ncè malihi azɓai.

⁵ Gar haha aman Kristi a shkè a herkeda, a ngaɗa: Zhiklè, mvi a nzli skwai ambaha ka ɓai. Aman ka tilay va ma.

⁶ Nʼndèr skwai, a mvi skwai a géɗ malai ambaha ka ɓai.

⁷ A i gaɗa: Na haha, i shkè – ta Windo te ɗèlèwèr a géɗ ga – aman i gi skwi man ka woyaʼa, Zhiklè ga.

⁸ Nshèlèkuraʼa a ngaɗa: Mvi skwai a nzli skwai, nʼndèr skwai a mvi skwai a géɗ malai, ka woya ɓai, ta ambaha ka ɓai (ara man ndohi ta viaʼa, aman ta jèjèr ma kita Zhiklè).

⁹ Te deɓaʼa a gaɗa: Na haha, i shkè ma, aman i gi skwi man ka woyaʼa. Ar haha a mcko skwi nshèlèkuraʼa auda, a mfeda ngiɗè a pa.

¹⁰ Te skwi man a woyaʼa haha, ndav nga nkezla sak staɗ te deɓaʼa klèng, te Yèsu Kristi, man a vau va na.

¹¹ Ndo mvi skwi a Zhiklè staɗ staɗ tèlèba a zlècè, aman a gi mizlinè nengaʼa a nciɗ sam a nciɗ sam, a zli skwi lèmèlèmè sak kumba, a ta slaha ta cè malihi auda azɓai.

¹² Aman ndo haha, man a va na skwi staɗgenè a Zhiklè a géɗ malihai, te deɓaʼa klèng, antanta a nza tʼhai te ri mandi Zhiklè a mèdèp,

¹³ a zhèr pats man ta va na mayamhi nengaʼa a skwi nfi sak na.

¹⁴ A skwi man a va na Zhiklè sak staɗ, a nʼnge ta ndohi man ta kezla ndav ta, jèlèlèʼa a mèdèp.

¹⁵ Na haha ma malwuɗi Mèzhèɓ Zhiklè nkezlaʼa ba, man a gaɗa:

¹⁶ Na haha nderzlè-ma man i da derzlèʼa a nda tengaʼa te deɓ patshi sa, Bi Zhiklè a gaɗa: I woya man i va ta ma kita ga a ndav tengaʼa, a i woya man i winda ta a gèɗ ta.

¹⁷ A i woy a i hér malihi tengaʼa, a skwi man ambaɓi man ta gau, asaɓi fèt.

¹⁸ Aman a sam man mali mpraʼa, ta vi skwi te deɓaʼa a géɗ mali azɓai.

Ngo-herdokoy va, ngo-nzokoy taraʼa!

¹⁹ Gar haha, dalahimam ga, te pombaz Yèsu, nga ngots civèɗ, aman nga dè a sam nkezlaʼa,

²⁰ a ntila nga civèɗ mɓuaʼa a nshèffe te maslaka man a kezla gai; civèɗ sa gèɗ va na,

²¹ a nga ngots ndo mvi skwi a Zhiklè mbiaʼa a géɗ ndohi Zhiklè.

²² Gar haha ngo-herdokoy va a ndav nzuraʼa, a ncè-a-ndav tèlèba, mèzhèɓ ndav nga man ambaɓai ngucaʼa, a va mpanaʼa a iyam nkéɗècèʼa.

²³ Ngo-nzokoy taraʼa te nʼngrédè skwi man nga zhèrè te ndav; aman nengaʼa man a mpasla nga rai, nengaʼa nlèɓèslèa.

²⁴ Ngo-gokoy maya, ngiɗè a géɗ ngiɗè, ngo-büdokoy va nga, ngiɗè a ngiɗè, a nga woy ndo, a nga gi mizlinè man amba.

²⁵ Ngo-jokokoy mɓicè va ɓai, ara tengahi ngiɗè ta giaʼa. Aman ngiɗè da büd ngiɗè, holholaʼa, aman kin rka, patsa a herdeka kinè va.

²⁶ Aman nga gi mali a wuɗai, te deɓaʼa man nga sun ma nzuraʼa ma, nga slaha nga zli skwi a géɗ malihi asaɓai.

²⁷ Sèi nga zhèr skwi man mwuɗitpa holholaʼa, kita, a vogwa man a ndi skwi tèlèba, a mayamhi tèlèba.

²⁸ Ndo man a jèjèr ma kita Moise azɓai, sèi a metsi na a géɗ ma malwuɗihi cèw, man makar, a se ta te va azɓai.

²⁹ Va-huro, kita mbiaʼa holholaʼa ndo a ngècèʼa, aman a mbatsaha kra Zhiklè a sak, a nrka Pombaz nderzlè-ma, te nengaʼa man a gaʼa a ndo nkezlaʼa, ara skwi nlizhèa, a nderɗe Mèzhèɓ pombi Zhiklè.

³⁰ Aman nga sun nengaʼa, man a gaɗa: Mbèzlè kita, iyè i mbèzlèʼa. Iyè a mpilèʼa. Zaʼa: Bi Zhiklè a da gi kita ndohi na.

³¹ Woba ndo man a kèlèhi a ri Zhiklè man a zhè a nshèffè.

³² Aman va-hur patshi man ta kala a deɓa ma, aman di kinè mwina tok tok, a kin nza taraʼa te skwi mwuɗitpa mbiaʼa.

³³ A sam ngiɗè kin su matakwan, a ta paraha kinè, a kin ngreda auda a sam di ndohai. A sam ngiɗè kin mba a nda tengahi man ta su matakwan aranta.

³⁴ Aman a vava kin su matakwan a nda ndohi dangai; kin co a mwuffè genè, aman ta hula ma kinè skwi a wuɗai, a géɗ man kin suna, kin ngots skwi mbelaʼa holholaʼa man a nzi dai.

³⁵ Gar haha kin kwola nfi gèɗ a ncè-a-ndav ɓai! Skwi ntul nengaʼa mbiaʼa.

³⁶ Aman skwi man a woy a zhè a sam kinè: Nzhèr skwia dai, nʼnzi taraʼa. Te deɓaʼa man kin gu skwi man Zhiklè a woyaʼa, kin ngècè skwi man Zhiklè a mpasla kinè ri a pa.

³⁷ Aman njèkè kèshkata, a nengaʼa man sèi a di a shkè, a mshkè ma, a gi ndudoh azɓai.

³⁸ Aman ndo nzuraʼa a sam di ga, a da nzi a nshèffè a géɗ ncè-a-ndav. Aman ndo man a men na a deɓa, ambahayè ɓai.

³⁹ Aman nga te va ndohi man ta mende va ta a deɓa ka ɓai, a ta ze ta; nga co a ndav, a nga mbela nshèffè nga.