Hébreux 1 - Ma Zhiklè

Zhiklè a goɗ ma te kra nengaʼa

¹ Zlèzlè a Bi Zhiklè a ngaɗa ta bababhi nga te ma ndohi nhadka ma, pats ngiɗè pats ngiɗè a maya tsaɗ tsaɗ.

² Antanta, man tiɗè sama ma, a ngaɗa nga ma te kra nengaʼa. Zhiklè a ngu nengaʼa a ndo ngècè skwi Zhiklè tèlèba. Te nengaʼa ba a ngu herkeda.

³ Nengaʼa a ngreda nʼnjèl Zhiklè auda; nengaʼa mèzhèɓ va na, a gshè skwi tèlèba a ma wuɗi nengaʼa; te deɓaʼa man a mpana ta ndohi te mali ta ma, a nʼnza hai te ri mandi Bi mbiaʼa te géɗèʼa.

⁴ Gar haha a fen ta golahi Zhiklè mbelambela, lèmèlèmè nzlembaɗ nengaʼa a fena man a tengaʼa mbelambela.

Kra Zhiklè a fen ta golahi Zhiklè

⁵ Aman gol Zhiklè nangwa, man Bi Zhiklè a ngaɗa na: Ka kra ga, a patsna i fe ka? A vaʼa: I ndi a bab nengaʼa, a nengaʼa a ndi a kra ga?

⁶ A va zaʼa, aman a cko tsuvom nengaʼa a herkeda, a ngaɗa: Golahi Zhiklè tèlèba sèi ta kèlèhi a deɓ sak nengaʼa.

⁷ A géɗ golahi Zhiklè a gaɗa: Nengaʼa a ge ta kozlarhai a golahi nengaʼa, a nèʼèn vogwa a ndohi mizline nengaʼa.

⁸ Aman a géɗ kra na: Zhiklè, sam nʼnzi bi ngaya a nzi a mèdèp. A va zaʼa: Gada-bi ngi zuraʼa, nengaʼa gada-bi kokwar-bi ngaya.

⁹ Ngi zuraʼa ambaha ka, ka gi shèwa a malai. Gar haha Zhiklè ngaya a faɗa ka mbar a gèɗ, mbar mwuffè, aman ndo ngiɗè a tsagi ngaya a ngècè arsa azɓai.

¹⁰ A va zaʼa: Ka, Bi Zhiklè, te nhinkaɗ na ka gu herkeda; giɗfèk mizlinè ri ngaya.

¹¹ A di ta ze ta, aman ka, ka nza. Ta da hai ta tèlèba ara maslaka.

¹² Ka da paɗ ta ara dawar, ta ngwèd ta ara maslaka. Ka, ka ara nʼnzi ngaya, ka, ka hèlèhi azɓai.

¹³ Gol Zhiklè wa, man Bi Zhiklè a ngaɗa na: Nza a ri mandi ga, ha i ge ta mayamhi ngaya tèlèba a skwi nfi sak ngaya.

¹⁴ Tengahi tèlèba mèzhèɓhi man ta gi mizlinè Zhiklè, man a takaha ta ndohai, aman ta ngècè skwi mʼmbel ta, ara nʼndi gai.