Habakuk 3 - Ma Zhiklè

Ntsi rai: nga da se ka te va!

¹ Ntsi ri Habakuk, ndo nhadka ma.

² Ndo nzi pèc pècèk, i tsena labar ma ngaya, i rka skwi man ka giaʼa, Ndo nzi pèc pècèk! Ngrede va ngaya auda te ndev anta, ko te ndev ndzoan, nga da se ka te va!

³ Bi Zhiklè a shkè te Théman. Zhiklè nkezlaʼa a shkè te za Paran. Giɗfekihai ta ndha a wuɗi-bi nengaʼa. Nʼnjèlè nengaʼa a ndha herkeda.

⁴ A si di ara skwi nhél sam, ko ri nengaʼa a hél sam, wuɗi nengaʼa a zhè te pa.

⁵ A ma nengaʼa, gidiɓèr; te deɓ nengaʼa, gidiɓèr.

⁶ A mbècè sak a herkeda, a herkeda a gudzai. A pi dai, a ndohi herkeda ta gi gurts kata, a za man ta nzi a mèdèp, ta wurzl ta, a ngègèɗhi zlèzlèa ta nde ta hai; civèɗ nengaʼa ziè-zlèa nɗaʼa a ma nengaʼa.

⁷ I rkaʼa, gèɗ gi Ethiopie mpre na, gi te Madian mʼmbeɗa.

⁸ Ndo nzi pèc pècèk a gi ndav a géɗ woyam ɗè? A gi ndzoan a géɗ iyam mbiaʼa ɗè? Aman ka hi a deɓ plèsh ngaya, a géɗ kiki nʼngul ndo ɗè?

⁹ Ka lata lèkèɗ, godoma ngaya nʼndha a sulom, ka cizl herkeda, a woyam a hi a pa.

^10-11 Zahi ta rka ka, ta gudzai, vanai a dzurvko iyam a hai, iyam mbiaʼa a kuɗkaɗai, pats a kia ta vangkaɗauda te gi azɓai, man sulom ngaya nwosla, a tsakwal a ndi dai ara ndidiyam.

¹² Ka shèwèlè a géɗ herkeda a ndav, ka mbatsa ta ndohi herkeda a sak a ndzoan.

¹³ Ka dè aman ka takaha ta ndohi ngaya, a ka mbela ndo ngaya man ka bada na mbar a gèɗ. Ka pelassa gèɗ gi ndo ambaɓia, ka mbeɗaʼa, a verzi gi a nzi a dala.

¹⁴ Ka ɓarama ta gèɗ ndohi mbibihiaʼa, man ta kalay a va, a ta kerɗyè a pa, a ta wuffè aman ta zede ndo ntawassaʼa a sam nʼnghedaʼa.

¹⁵ Ka pre ta plèshihi ngaya a géɗ iyam mbiaʼa, a iyamʼa a hubètè.

¹⁶ I tsenaʼa… a va ga a gi sawaʼa, tapiɗaf ma ga a gudzi te ri zlau, vatasl ga a wurr na, a mpay gudɓi a sak. I zhèr pats man matakwan a kala ta va a ndohi man ta kala nga va.

¹⁷ Aman wof kslor a da wurzhè azɓai, wof nte gi lak a da yi wuda azɓai, wof tsna a da yi wuda azɓai, skwi a da gi a gi dau azɓai, rèwè tambak ba azɓai, zlè a te kuɗom ɓai.

¹⁸ Aman iyè, i da slébèrdè Ndo nzi pèc pècèk, a i wuffè a géɗ Zhiklè, Zhiklè man a mbelyè.

¹⁹ Ndo nzi pèc pècèk, Bi Zhiklè, nengaʼa wuɗi ga, a ntaslyè te sak, aman i hi ara mènèɗ, a fiyè a sam man a géɗèʼa.