Habakuk 2 - Ma Zhiklè

Gi mɓer kokwar

¹ I woy a i zlècè a sam man i ɓer kokwar a pa, i zlècè a géɗ gi ndakmaʼa, a i zhèrèʼa, a i rka, a da gaɗkay ma mè? A da mbeɗkay a ntsi ri ga kè?

² A Ndo nzi pèc pècèk a mʼmbeɗkay a ma, a ngaɗkayè: Windo skwi man ka rkaʼa, windeda a wof a ta slaha ta jèngè tsarayaʼa.

³ Skwi a da rka ka a di a ma dai, ndikèmaʼa a herdeka va, a ngwèdè azɓai. Ko a nzi dai, zhoro! A da gi a vava, a da gi ndèzl.

Wobau faɗ

⁴ Nengaʼa ndo nzura ka ɓai, ndo nfi va; aman ndo nzuraʼa, nengaʼa a nzi a nshèf-fè a géɗ ncè-a-ndav.

⁵ Lèmèlèmè ara ndo man zom a keɗaʼa, ara ndo wai, ndo nfi va a ngézhè a skwi azɓai. A winè vèvèɗ daʼai ara sam mʼmetsai, a ngézhè azɓai ara mʼmetsai. A ɓic ta ndohi herkeda tèlèba a sam na, a ɓic ta kokwar-bihi tèlèba a verzi na.

⁶ Ta tèlèba ta ngala na gèɗ, ta gèɗè ma njkedè ndo a géɗ nengaʼa, a ta gaɗa: Wobau a géɗ ndo man a ɓicè skwi man a nengaʼa ka ɓai – a da ndikè ta ahngwa? Wobau a géɗ ndo man a ɓicè dua a gèɗ.

⁷ Ndohi man dua tengaʼa te ri ngaya, ta slèmbèɗè a nasa nasa, a ndohi nʼnga ka matakwan ta piɗèkwe ta, a ta gs ka ma.

⁸ Njèkèɗi ndohi herkeda ta da dum ka, a géɗ man ka, ka dum ta ndohi herkeda kumba, a géɗ man ka bazl ta ndohai, a ka gu shèwa a kokwar, a ndohi kokwar tèlèba man ta te pa.

⁹ Wobau a géɗ ndo man a ɓicè skwi a gi na a ngi rai, a pi gi na a ntskal, a woy a mbél na te ri skwi ambaɓia man a da gshèʼa.

¹⁰ Ka pa na hori a di a gi ngaya te skwi man ka huro. Mali man ka gau, man ka bazl ta ndohi kumba, ka geda a gèɗ ngaya.

¹¹ Kwa man ta ɗizlda zlazlar, a bèhè, a wof nciɓè a mbeɗa na a ma.

¹² Wobau a géɗ ndo man a rèm kokwar a pombaz, aman a pi verzi gai a géɗ malai.

¹³ Zhiklè bi mbiaʼa a ngoɗ ka ɓi ɗè: Ndohi herkeda ta gi mizlinè vogwa; kokwar-bihai ta geda matakwan a va ambalai.

¹⁴ Aman nshin nʼnjèl Ndo nzi pèc pècèk a da ndhè herkeda, ara iyam man a ndha te woyam mbiaʼa.

¹⁵ Wobau a géɗ ndo man a va na zom a ndo ngiɗè, a gi a zom a keɗaʼa, a rkaʼa, na adai. Ka ba hori a keɗe ka.

¹⁶ Gar haha ka ba sau! Ha a keɗe ka! Kokwi te ri mandi Ndo nzi pèc pècèk a da baɗa ka a gèɗ. Hori a da keɗe ka, agédèshè nʼnjèl ngaya.

¹⁷ Mali man ka ga na Liban, a da ngwoda ka va a gèɗ, skwi dak a da pa ka zlau a gèɗ, te man ka ga na wuɗi a kokwar, ka bazl ta ndohi te kokwar tèlèba.

¹⁸ Skwi man ndo a pètèʼa, a takaha te mè? Skwi man ndo a viɗèʼa, skwi mbèh skwi ncèkèlma, a vri man a gèɗè azɓai; ndo ngau a pi ndav a vna, kè!

¹⁹ Wobau a géɗ ndo man a gaɗa na wof: Piɗèkwe ngaya! A sam kwa man a gèɗè azɓai: Slambaɗa! A slaha a nhodko ma ɗè? Verzhègenè a guro te maʼa; aman nshèffè a te pa ɓai a vava.

²⁰ Ndo nzi pèc pècèk a zhè te gi nengaʼa nkezlaʼa: Herkeda tèlèba da nza tètèʼa a sam na!