Habakuk 1 - Ma Zhiklè

¹ Ma man Habakuk, ndo nhadka ma, a goɗ a géɗ skwi man a rka na dai.

Ntsi rai man Zhiklè a mʼmbeɗa na a pa ɓai

² Ndo nzi pèc pècèk, i kuɗi a sam ngaya, a ka tsena ɓi genè, ka woya aman i nzi tèkè? I bèhè a géɗ wuɗai man a ga nga, a ka takaha nga azɓai.

³ Ka geday malai a dai, a i rka matakwan a di ga èhèmè? Metsar, wuɗai, ndzoan, mbèzl va, ta zhè a sam di ga.

⁴ Wuɗi ma kita ba azɓai, skwi nzuraʼa a nʼngredekaɗauda ɓai. Te man ndo malai nfa na a gèɗ a ndo nzuraʼa, ta terɗa ma kita.

Ndohi Chaldée man wuɗi ta zhè

⁵ Ndohi herkeda va-wora! Va-pu dai, va-rzl kinè! I woy a i gi skwi ngiɗè, a pats man kinè a zhè dai, skwi man ko ta njè kinè, kin da cè azɓai.

⁶ Na haha, i da baha ta ndohi Chaldée, ndohi mwuɗitpa, ndohi shèwa, man ta hi a verzi herkeda, a ta duma gihi man a tenga ka ɓai.

⁷ Tengaʼa vogwa te pa, wuɗitpa, ta gi kita a wuɗi ta.

⁸ Plèshihi tengaʼa, nhi tengaʼa a fena kokoya, a fena kdadihi dak. Ndohi plèsh tengaʼa ta haka dra, ara vezai man a ngézl wotsak.

⁹ Ta shkè tèlèba a ta gi skwi a wuɗai, ta hakaɗi ara kozlar te civèɗ mvèng pats, ta ɓic ta ɓèlèlihi ara wyak a ma woyam.

¹⁰ Ta livè bihai, ta ngwossaha ta wud bihai, ta ngwèshè a zlazlar man ta ngala kokwar a vna, ta ɓicè herkeda a ta tivè a pa a vna, a ta da dumaʼa.

¹¹ Ta hi ara ndombozlor, a ta fu wuɗi ta a zhiklè ta.

Ndo malai a ndeda ndo nzuraʼa a ma èhèmè?

¹² Ndo nzi pèc pècèk, Zhiklè ga nkezlaʼa, ka daga zlè-zlèzlèa ka ɓi ɗè? Nga da metsi azɓai. Ka zlindeka ta ndohi haha a ka ga nga kita a gèɗ, ka zede nga. Tengaʼa ara ndohi sak ngaya, aman ta ngez nga.

¹³ Di ngaya nlizhɓai, kumba nkuzleraʼa, ka slaha a ka rka skwi ambaɓiaʼa azɓai, ka slaha a ka pi di a matakwan azɓai; ka rka ta ndohi ambaɓihiaʼa a ka nze tètè èhèmè? Ehèmè, aman ndo malai a ndeda ndo nzuraʼa a ma?

¹⁴ Ka gi a sam ndohai ara a sam klèfihi te woyam, ara a sam meturɗai man bi ta azɓi, ɗè?

¹⁵ Man ta par ta tèlèba a jir, ta gs ta a lata, ta pi a gozhèm ta, a ta wuffè a géɗèʼa, a ndav ta langlangaʼa.

¹⁶ Gar haha ta mbèh skwi a lata ta, ta fèɗè madzaf a gozhèm ta, a ta pèr skwi kumba, a ta ndi skwi kumba.

¹⁷ Da geda ta tsakwal a ndohi herkeda, da bazl ta a mèdèp ɗè?