Genèse 9 - Ma Zhiklè

Zhiklè a nderzla ma a nda Noé

¹ A Bi Zhiklè a mpshè na ma a Noé a wudahi nengaʼa, a ngaɗa ta: Va-yu wuda, a kin mana a vata, va-ndha herkeda!

² Skwi dak a ɗiakihai tʼhwaɗ giɗfèk, a skwi man a hi a géɗ herkeda, a klèfhi tʼhwaɗ iyam, da gu zlau kinè: I pe ta a ri kinè.

³ Skwi man a zhè a nshèffè a géɗ herkeda, tèlèba, da ga a skwi nʼndi kinè. Lèmèlèmè ara vah nɗaʼa, i va kinè tèlèba.

⁴ Sèi zluèɗ man pombaz a keɗa na va, kin ndi azɓai.

⁵ Aman nshèffè kinè ba, i da jhèɗè a deɓa. I jhèɗè a deɗa te ri skwi dakhi tèlèba, a i jhèdè nshèffè ndohi a deɓa te ri ndawa ndawa.

⁶ Ko wawa man a keɗa ndo, ta da kéɗèʼa, lèmèlèmè. Aman Bi Zhiklè a ngu ndo ara Mèzhèɓ nengaʼa.

⁷ Kinè, va-yu wuda, va-zlazlama a géɗ herkeda, va-gu bai a géɗèʼa.

⁸ A Bi Zhiklè a ngaɗa na Noé a wudahi nengaʼa man ta nza a nda nengaʼa:

⁹ Anai i derzla ma ga a nda kinè, a nda tser kinè,

¹⁰ a skwi a nshèffè tèlèba man a zhè a nda kinè, a ɗiakihai, skwi ndzhamhai, skwi dak a skwi tèlèba man ta shkè auda te wurom.

¹¹ I woy a i derzla ma ga a nda kinè, aman anai iyam nchè nchè mbiaʼa a da zeda nshèffè a géɗ herkeda asaɓai, a iyam mbiaʼa a da gédèshè herkeda asaɓai.

¹² Bi Zhiklè a ngaɗa: Skwi nʼngreda kinè nderzlè-ma ga a nda kinè a skwi a nshèffè tèlèba a sam kinè, a mèdèp, a haha:

¹³ I vi kwarai a giɗfèk, da ga a skwi man a ngreda kinè nderzlè-ma ga a herkeɗa.

¹⁴ Aman vani a gi a giɗfèk, a kwari mɓara,

¹⁵ i woya man a i hér nderzlè-ma ga a nda kinè a skwi a nshèffè tèlèba, a iyam a da shkè nchè nchè mbiaʼa a da gédèshè nshèffè tèlèba asaɓai.

¹⁶ Aman kwari mɓara, i pi diaʼa, a i hér nderzlè-ma, man nga derzla a mèdèp a nda Bi Zhiklè a skwi man a nshèffè a géɗ herkeda tèlèba.

¹⁷ Bi Zhiklè a gada: Nasa skwi man a ngrédè nderzlè-ma nga auda, man nga derzla a medèp a nda skwi man a shèffè a géɗ herkeda tèlèba.

Wudahi Noé

¹⁸ Wudahi Noé man ta shkè auda te wurom: Sem, Cham, Japhet. Cham, bab Canaan.

¹⁹ Tengahi wudahi Noé, a verzi tengaʼa ndha a géɗ herkeda tèlèba.

²⁰ Noé ndo mpizhè, ndo nshélèkuraʼa man a hüno mpizhè gi wof barassa.

²¹ Aman a msau iyam ny i wofaʼa, barassa, a nkeɗaʼa, a mʼmanahi a gi na adai.

²² A Cham, bab Canaan, a nrka bab na, skwa az a va ɓai, a ngra ta kramamhi na, tʼuda.

²³ A Sem a Japhet ta co maslaka a ta feda a deɓ ta, a to do a gi a deɓa a deɓa, a ta kalda na maslaka a va bab ta, ta ngwoda na deɓa, ta pa na di ɓai, a ta rka bab ta man adi ɓai.

²⁴ Aman zom a ndaha va na auda te gèɗ Noé ma, a sun skwi man ntabaw na a ga na,

²⁵ a ngaɗa: Canaan mphomda! Da ga a ɓèlè holholaʼa a sam kramamhi na!

²⁶ A ngod a vaʼa: I slébèrdè Ndo nzi pèc pècèk, Zhiklè Sem; aman Canaan da ga ɓèl Sem!

²⁷ Bi Zhiklè da pra na sam nʼnzi a hai woɗaʼa a Japhet; aman Canaan da ga a ɓèl na!

²⁸ Te deb iyam nchè nchè mbiaʼa, Noé a nʼnza a nshèffè mvi 350 dai.

²⁹ Gar haha mvi Noé tèlèba a gi 950. Te deɓaʼa a mʼmets na.