Genèse 50 - Ma Zhiklè

Sam kuɗa Jacob

¹ A Joseph a ntuzloma na gèɗ a bab nengaʼa, a nkuɗiaʼa.

² A Joseph a ngaɗa ta ndohi madzaf nengaʼa, aman ta faɗa na mbar burdi a va bab na. A ndohi madzaf ta faɗa na mbar burdi a va Israel.

³ A ta gu mizlinè mfèɗè mbar burdi a va, mʼmèn 40. A ndohi Egypte ta kuɗiaʼa mʼmèn 70.

⁴ Aman sam kuɗa klèng ma, Joseph a ngaɗa ta ndohi gi Pharaon: Aman kin woy iyè, kin da menda na Pharaon a kin gaɗa na:

⁵ I mbaɗa na bab ga, aman a ngaɗayè: Aman i da metsi ga, ka da riyè a gi dzavi man i tülo te kokwar Canaan. Anai i woy a i dè a i ri bab ga a vèvèɗ, a i da shkè a deɓa.

⁶ A Pharaon a ngaɗa: Do, rda bab ngaya a vèvèɗ, ara man ka mbaɗa na.

⁷ A Joseph a ndo, a nda ri bab na. A ndohi mizlinè Pharaon, a ndohi nhalaʼa te gi na, a ndohi nhalaʼa te kokwar Egypte tèlèba,

⁸ a ndohi gi Joseph tèlèba, a kramamhi na, a ndohi gi bab na, tèlè to do a vna. Sèi wudahi nkèshèa, a zlèhai a tambakihai ta jèke ta te kokwar Gosen.

⁹ A kiki ba a ndohi plèsh ba to do a vna, ndohi rèdèdèa, kol gèɗ gada tawaɗa azɓai.

¹⁰ Aman ta shkè a Goren-Atad, a wud woyam Jourdain, ta kuɗiaʼa a lalau mbiaʼa, Joseph a nkuɗu bab na, mʼmen 7.

¹¹ A ndohi kokwar Canaan, man ta rka sam kuɗa te Goren-Atad, ta gaɗa: ndohi Egypte ta kuɗi ndo a vata. A géɗ nengaʼa ta baha na sam Abel-Mizraim. Samaʼa te wud woyam Jourdain.

¹² A wudahi nengaʼa ta gu a, ara man a gaɗa ta,

¹³ ta ckoɗa deɓa a kokwar Canaan, a ta rda a gi dzavai te gi dau Macpéla, zuraʼa a Mamré, man Abraham a nsum te ri Ephron, ndo Heth, a geɗ gi dzavai.

Joseph a pa ta a pa a ndav a kramamhi na

¹⁴ Aman Joseph a nrda bab nengaʼa a vèvèɗ arsa ma, a mʼmena a deɓa a kokwar Egypte, nengaʼa a kramamhi na a ndohi tèlèba man to do a verzi nengaʼa, a ta da ri bab na.

¹⁵ Aman kramamhi Joseph ta rka, bab tengaʼa a mʼmets na ma, ta gaɗa: Gar Joseph a da hér shèwa, a woy nga ma, a géɗ mali man nga gu a sam na, kè?

¹⁶ Ta zlündo ndo da gaɗa na Joseph: Ga bab ngaya a mʼmetsi na, a ngaɗa:

¹⁷ Kin da gada na Joseph aranta: Pra ta malai a mphömè a kramamhi ngaya. Aman ta gau skwi ambaɓiaʼa a sam ngaya. Gar haha pra nga mali nga; aman nga ba nga gi mizlinè Zhiklè bab ngaya. A Joseph a kuɗai, aman ta gaɗa na arsa.

¹⁸ Te deɓaʼa kramamhi na to do a sam na a ri ta, a ta kalahai a deɓ sak nengaʼa, a ta gaɗa: Na haha, ge nga a ɓèlèlihi ngaya!

¹⁹ A Joseph a ngaɗa ta: Kin gu zlau ɓai! I Zhiklè ɗè?

²⁰ Kinè, kin hur aman kin gay skwi man ambaɓai; aman Bi Zhiklè a nʼngwoda a skwi man amba, aman a gi skwi man nga rka a patsna: a mʼmbel nshèffè ndohi kumba.

²¹ Gar haha kin gu zlau ɓai! I woy a i wara kinè dai kinè a wudahi kinè. A mbid ta, a ngaɗa ta ma nhènèkèa.

Mʼmetsi Joseph

²² A Joseph a nʼnza te kokwar Egypte, nengaʼa a ndohi gi bab na, a nʼnza a nshèffè mvi 110.

²³ A Joseph a nrka wudahi Ephraim, te verzi, te verzi, a gi makar. A Joseph a nge ta wudahi Machir, kra Manassé, a wudahi na.

²⁴ A Joseph a ngaɗa ta kramamhi na: Anai, i metsi ga. Aman Bi Zhiklè a da takaha kinè, a da hel kinè auda te kokwar haha, a de kinè a kokwar man a mbaɗa na a Abraham, Isaac a Jacob.

²⁵ A Joseph a nco ma mʼmbèɗè a sam wudahi Israel, a ngaɗa: Aman Zhiklè a da takaha kinè, kin da helda vatasl nckondo ga a rai.

²⁶ Te deɓaʼa Joseph a mʼmets na, mvi nengaʼa 110. A ta faɗa na mbar burdi a va, a ta feda nckondo a koti te kokwar Egypte.