Genèse 48 - Ma Zhiklè

Jacob a mpshè ta ma wudahi Joseph cèw

¹ Te deɓaʼa ta ngra na Joseph: Na haha bab ngaya mbelakaɓai. A nengaʼa a nhul wudahi na, Manassé a Ephraim, a to do a sam Jacob.

² A ta ngra na Jacob: Na haha, Joseph, kra ngaya, a shkè a sam ngaya.

³ A Jacob a ngaɗa na Joseph: Zhiklè Bi wuɗai a ngudokoy va a dai te Luz, te kokwar Canaan, a mpshèy ma,

⁴ a ngaɗayè: Na haha, i woy a i va ka wuda, a ka mènè a vata, a i ga ka a ndohi herkeda kumba. Kokwar haha i va ta a ndohi verzi ngaya a mèdèp.

⁵ Anai wudahi ngaya cèw man ka yu te kokwar Egypte, ga i shkè a kokwar Egypte, wudahi ga, lèmèlèmè ara Ruben a Siméon, Manassé a Ephraim a ga ga.

⁶ Aman wudahi man ka da yia te deɓaʼa, tengaʼa a ngaya. Ta mbi a nʼndi gi a nda kramamhi tengaʼa.

⁷ Aman i shkè auda te kokwar Paddan-Aram, Rachel a mʼmets na te kokwar Canaan, a civèɗ, ndul ndul a ma Ephrata. A i rda a pa a zolom civèɗ man a ndè Ephrata, man ta baha na Bethléhem.

⁸ Aman Israel a nrka ta wudahi Joseph, a ngaɗa: Tengaʼa wa?

⁹ A Joseph a mʼmbeɗa na a ma bab na: Wudahi ga, man Zhiklè a mvayè. A Jacob a ntakossa dai, a nʼnza a verzai. A ngaɗa: Helka ta a sam ga a haha, a i pshè ta ma.

¹⁰ Israel a nrka di zhèw zhèwaʼa, a slaha a nsen ta ɓai. A nherde ta ndul ndul a sam bab na. A nengaʼa a nkelawa ta ri a daʼai.

¹¹ A Israel a ngaɗa na Joseph: Te va nasa i hur a i gaɗa i da rka di ngaya asaɓai. Antanta Zhiklè a ntakahayè, a i rka wudahi ngaya ba.

¹² A Joseph a nhelka ta auda a gsa bab na, a nkalahi a deɓ sak nengaʼa.

¹³ Te deɓaʼa Joseph a nhul cèw, Ephraim te ri mandai, a mfeda a ri gula Israel, a Manassé a ngso te ri gula, a mfeda a ri mandi Israel. A nherde ta ndul ndul.

¹⁴ A Israel a ntor ri mandai, a mfa na a gèɗ Ephraim, ntabawaʼa. A ntor ri gula, a mfa na a gèɗ Manassé, a ndzavada rai. Manassé, nengaʼa tsuvomaʼa.

¹⁵ A mpshè na ma Joseph, a ngaɗa: Bi Zhiklè, man Abraham a Isaac, bababhi ga ta dzodzora, Bi Zhiklè man ndo mɓeryè a nshèffè ga tèlèba, ha patsna,

¹⁶ gol Zhiklè man a mbelyè auda te ri matakwan tèlèba, da pshè ta ma wudahi cèw haha, aman te tengaʼa nzlemɓad ga do do a ma ma, a nzlembaɗ Abraham, a Isaac, bababhi ga, a ta grè a ma ma, a ta mènè kumba a géɗ herkeda.

¹⁷ Aman Joseph a nrka, bab nengaʼa a mfa na ri mandi a gèɗ a Ephraim, ambaha ɓai, a ngso ri bab na, a woya a nfi a gèɗ Manassé.

¹⁸ A Joseph a ngaɗa na bab na: Az arsa ɓai, bab ga! Nengaʼa tsuvomaʼa, fa na ri mandi ngaya a gèɗ!

¹⁹ Aman bab nengaʼa a woya bai, a ngaɗa: I suna, kra ga, i suna. Verzi nengaʼa a da gi a mbiaʼa tʼherkeda. Aman ntabawaʼa, kramam na, a da fenaʼa, a ndohi verzi nengaʼa ta gi kumba tʼherkeda.

²⁰ Aranta a mpshè ta ma a pats nasa, a ngaɗa: Te nzlembaɗ kinè ndohi Israel ta da ngècè mpshè ma, a ta gaɗa: Zhiklè da ga ka ara Ephraim a Manassé. Aranta a mfeda Ephraim a ma Manassé.

²¹ A Israel a ngaɗa na Joseph: Na haha, nshèffè ga a ndev na. Aman Bi-Zhiklè a da zhè a nda kinè, a da mende kinè a deɓa a kokwar bab kinè.

²² A i va ka skwi man i va ta kramamhi ngaya ɓai: za Sichem, man i co te ri ndohi Amor a kafahi gwèsh a lèkèɗ.