Genèse 47 - Ma Zhiklè

A sam Pharaon

¹ A Joseph a mdo, a ngra na Pharaon, a ngaɗa: Bab ga a kramamhi ga ta shkè a tambakhai a zlèhai a skwi ta tèlèba te kokwar Canaan. Antanta ta zhè te kokwar Gosen.

² Te va kramamhi na a nhul 5, a nzlatsede ta a sam Pharaon.

³ A Pharaon a ngaɗa ta kramamhi na: Mizlinè kinè mè? A ta mbeɗa na a ma Pharaon: Ɓèlèlihi ngaya ta wèr skwi te dak, lèmèlèmè ara babhi ta.

⁴ Te deɓaʼa ta gaɗa na Pharaon: Nga shkè, aman nga nzi te kokwar ara mbrok. Aman ɓèlèlihi ngaya te ngatsa sam mandi tambakhi ta ɓai. Mi mbiaʼa a gi a kokwar Canaan tèlèba. Gar haha va-ta civèɗ a ɓèlèlihi ngaya, a ta nzi a kokwar Gosen.

⁵ A Pharaon a ngaɗa na Joseph: Bab ngaya a kramamhi ngaya ta shkè a sam ngaya.

⁶ Herkeɗa Egypte nwinèa a sam ngaya. Woya ta sam kokwar mbelaʼa, man a fena sam ngiɗè, a bab ngaya a kramamhi ngaya a ta nzi a pa. Ta slaha ta nzi a kokwar Gosen. Aman ka da sun ndohi man maya ta zhè te vaʼa, ge ta a ndohi mɓer zlèhi a tambakihi ga ba.

⁷ A Joseph a ngeda na Jacob, bab na, a Pharaon ba. A Jacob a nga na mbalai a Pharaon, a mpshè na ma.

⁸ A Pharaon a ndzhodo Jacob: Mvi ngaya ngama? A Jacob a mʼmbeɗa na a ma Pharaon:

⁹ Mvi nʼnzi ga a géɗ herkeda 130. Mvi ga az a vata ɓai; aman i sau matakwan kumba; mvi nshèffè ga kumba lèmèlèmè ara mvi bababhi ga man ta nza a nshèffè ɓai.

¹⁰ A Jacob a mpshè na ma Pharaon zaʼa, a nslambaɗa, a ndo na.

¹¹ A Joseph a ntila na sam ngwi a bab na, a kramamhi na, a mva ta sam te kokwar Egypte a rai, sam man amba a fena civèɗ ngiɗè, sam Ramses, ara man Pharaon a gaɗa na.

¹² A Joseph a wara na di a bab na a kramamhi na a ndohi gi bab na tèlèba, a mva ta skwi nʼndai, ngiɗè a wud na, ngiɗè a wud na.

Maya Joseph a mprè dau

¹³ Te kokwar tèlèba, skwi nʼndi azɓai. Mi mbiaʼa, holholaʼa; a kokwar Egypte a kokwar Canaan ta tiɗè a mai.

¹⁴ A Joseph a mɓicko Suli te kokwar Egypte a kokwar Canaan tèlèba, man ndohi ta sum dau a vna. A Joseph a mfeda Suli a gi Pharaon.

¹⁵ Aman Suli te kokwar Egypte, te kokwar Canaan, a ndev na, ndohi Egypte ta shkè a sam Joseph, a ta gaɗa: Va-nga skwi nʼndai! Ka woya aman nga teɗ nga a sam di ngaya ɗè? Suli klèng!

¹⁶ Joseph a ngaɗa: Aman Suli klèng, va-hulko skwi kuɗom kinè, a i pa kinè dau a pa.

¹⁷ A ta hulko skwi ta a sam Joseph, a ta prè a dau: plèshi, rèwè tambakihai, rèwè zlèhai a kɗèhihai. A nengaʼa a ntakaha ta a vi sa, a ta prèʼa a skwi nʼndai, ara nshum skwi ta.

¹⁸ Aman mvi sa a ndeva ma, a vi ngiɗè, ta za shkè a deɓa zaʼa, a ta gaɗa na: Nga slaha nga ngheda a sam di bi nga ɓai: Suli klèng, skwi kuɗom nga, nte ri ngaya. Anai skwi man nga slaha nga va na bi nga ngiɗè azbai, sèi va nga, a dak nga.

¹⁹ Ka woy a nga teɗ nga a sam di ngaya, a dak nga a nde na hèshèkèɗ ɗè? Suma nga va nga a dak nga a skwi nʼndai, a nga gi ɓèl Pharaon, a dak nga a nengaʼa. Va-nga tser skwai, a nga nzi a nshèffe, nga da bazl nga bai, a dak nga da nda a hèshèkèɗ ɓai.

²⁰ Aranta Joseph a nsuma na dak kokwar Egypte tèlè a Pharaon. Aman ndohi Egypte ta preda dak ta a ma, staɗ staɗ tèlèba, a géɗ mi man a zhè holholaʼa. Kokwar tèlèba a Pharaon.

²¹ A nge ta ndohi a ɓèl Pharaon, a hinè a ma kuma staɗ, a ndè a ma kuma ngiɗè.

²² Sèi dak ndohi ncèsl skwai a nsuma ɓai. Aman ndohi ncèsl skwai ta ngots skwi ta a sam Pharaon pèc pècèk, a ta ngots skwi nʼndi ta a vna. A géɗ nengaʼa, dak ta nze ɓai.

²³ A Joseph a ngaɗa ta ndohai: Anai i suma na va kinè a dak kinè a Pharaon. Na haha tser skwai, vo-do, va-zlekeda dak!

²⁴ Aman te skwi man kin da ɓicèʼa, kin va na Pharaon skwi staɗ te va zlam, zlam, zlam. Skwi faɗ, a kinè, a kinè a ndohi gi kinè a wudahi kinè kin ndiaʼa, a kin ngè-cè tser skwi zaʼa.

²⁵ Ta gaɗa: Ka mbela nga nshèffe nga. Aman nga ngots pombai a sam ngaya genè, ambaha nga genè; ko nga gi ɓèl Pharaon.

²⁶ A Joseph a mvau ma nkwèr kokwar Egypte aranta, ha patsna, a géɗ dak ndohi Egypte. Ko wawa a da va na skwi staɗ te va zlam a Pharaon. Sèi dak ndohi ncèsl skwai, skwi Pharaon ka ɓai.

Jacob a nju ma

²⁷ A Israel a nʼnza te kokwar Egypte, te kokwar Gosen. A ta gu gi te pa, a ta yu wuda, a ta mana a vata.

²⁸ A Jacob a nʼnza a nshèffe mvi 17 dai, te kokwar Egypte. Mvi nengaʼa tèlèba a gi 147.

²⁹ A pats mʼmetsi nengaʼa a mshkè, a mbaha na Joseph, kra na, a ngaɗa na: Aman ka woy iyè, taraha zlazlar ga! Gu skwi nzuraʼa a sam ga, a ka riyè te kokwar Egypte ɓai.

³⁰ Aman i dè a va bababhi ga, ka diyè auda te kokwar Egypte, a ka riyè a va tengaʼa. A ngaɗa: I woy a i giaʼa, ara man ka gaɗayè.

³¹ A nengaʼa a ngaɗa: Mbaɗayè a pa! A mʼmbaɗa na. A Israel a nkalda gèɗ a hi a sam mʼmènè na.