Genèse 44 - Ma Zhiklè

Kokwi Joseph te gozhém Benjamin

¹ Joseph a ngaɗa na ndo mɓer gi na: Ndha ta dau a gozhèm tengaʼa, dèʼa deɓ kɗèh, a ka hul Suli staɗ staɗ tèlèba, a ka menda ta a deɓa a gozhèm.

² Kokwi verzhègenè ga, a ka co a ka va na a gozhèm ntabawaʼa, a géɗ dau a Suli dau na. A nengaʼa a ngau, ara man Joseph a gaɗa na.

³ A prèk te gai, ta pra ta ndohai a kɗèhi ta.

⁴ Mshkè ta auda tʼhwaɗ kokwar ma, to do dra di ɓai, Joseph a ngaɗa na ndo mɓer gi na: Hu a verzi ndohai, aman ka da ngats ta, a ka gaɗa ta: Kin menda skwi mbelaʼa a deɓa a skwi ambaɓiaʼa èhèmè? Kin cèmay kokwi verzhègenè ga èhèmè?

⁵ Nengaʼa man bi ga a si skwi te pa ka ɓi ɗè, a ɗèl skwi a vna ka ɓi ɗè? Kin gau skwi man ambaɓai.

⁶ Aman a nʼngats ta, a ngaɗa ta ar haha.

⁷ A ta mbeɗa na a ma: Bi nga a goɗ ar haha èhèmè? Ɓèlèlihi ngaya ta slaha ta gi arsa azbai!

⁸ Suli ba man nga ngots te gozhèm, nga mendkoɗa deɓa te kokwar Canaan. A nga za gi metsar verzhègenè a guro te gi bi ngaya ɗè?

⁹ Nengaʼa man ka ngècè skwi sa te gozhèm nengaʼa, da mets na, a nga woy a nga gi ɓèl bai.

¹⁰ A ngaɗa ta: Da gu ara ngèɗ kinè. Nengaʼa a man ta da ngècèʼa a sam nengaʼa, nengaʼa ɓèl ga. Kinè njèkèɗiaʼa, kin dè kinè.

¹¹ Staɗ staɗ a mpreda gozhèm na a hai, a ta winèʼa.

¹² A nengaʼa a ntor ri a va dau, a hinè a sam tsuvomaʼa, ha a ndikè na ma ntabawaʼa. A nʼngots kokwi te gozhèm Benjamin.

¹³ A ta kuratseda maslaka tengaʼa aussa a va, a ta peda gozhèm a deɓ kɗèh zaʼa, a ta mena a deɓa a kokwar.

¹⁴ A Juda a ndo a gi Joseph a nda kramamhi nengaʼa. Jospeh a zhè dai. A ta kalahi a deɓ sak nengaʼa.

¹⁵ Joseph a ngaɗa ta: Kin gai haha mè? Kin hur ndo gar iyè a da shinè skwi haha azɓi ɗè?

¹⁶ A Juda a mʼmbeɗa na a ma: Nga da gaɗa na bi nga kè, a nga da tsi gèɗ auda te mè? Zhiklè a ngudko mali ɓèlèlihi ngaya auda a di pats ma. Na haha, nga ɓèlèlihi bai, nga tèlèba, a nda nengaʼa man ta ngots kokwi a sam na.

¹⁷ Aman nengaʼa a ngaɗa: Aʼai, i gi arsa azɓai! Sèi nengaʼa man ta ngots kokwi te gozhèm na, da ga a ɓèl ga. Aman kinè njèkèɗiaʼa, vo-do kinè a deɓa a sam bab kinè a gumai!

Juda a tsi rai a géɗ Benjamin

¹⁸ Juda a nherda na va, a ngaɗa: Ɗakwa, bi ga, va na civèɗ a ɓèl ngaya, a ka tsena ngèɗè ga staɗ. Ka gu ndav a géɗ ɓèl ngaya ɓai! Ka mbiaʼa lèmèlèmè ara Pharaon.

¹⁹ Bi ga, ka dzhaɗ ta ɓèlèlihi ngaya: Bab kinè, a kramam kinè a zhè di ɗè?

²⁰ A nga gaɗa ka: Bi nga, bab nga a zhè, nhala ma, a kramam nga a zhè, man a myu te babgi ma. Kramam nengaʼa a mʼmets na, njèkè kramam na, man ta mba a mama a vna staɗ, a bab nengaʼa a woya a ndav na.

²¹ A ka gaɗa ta ɓèlèlihi ngaya: Vo-ckoɗa sam nga, a i rkaʼa.

²² A nga gaɗa ka, bi nga: Kra a slaha a njèkeda bab na azbai; aman a da jèkeda bab na, ar bab na a metsi na.

²³ A ka gaɗa ta ɓèlhi ngaya: Aman ntabaw kinè a shkè a verzi kinè azɓai, kin menkaɗa deɓa a sam ga asaɓai.

²⁴ Aman ngo do a deɓa a sam bab nga, ɓèl ngaya, nga ngra na ma ngaya, bi nga.

²⁵ Te deɓaʼa bab nga a gaɗa: Vo-do a deɓa a kin shum skwi nʼndi nga kètè.

²⁶ Aman nga gaɗa na: Nga slaha nga dè azbai, sèi man ntabaw ngaya a dè a verzi nga di kla, a nga dè. Nga slaha nga zlècè a sam ndo ngata azɓai, aman ntabaw nga az a verzi nga ɓai.

²⁷ A ɓèl ngaya, bab ga, a ngaɗa nga: Kinè ba kin sun te gèɗ kinè, ngwoz ga a myu wudahi cèw genè.

²⁸ Staɗ a njè-kyè, a i hur i gaɗa: skwi ngiɗè a nʼndedama, ha patsna i ngots a deɓa ɓai.

²⁹ A kin cè nengaʼa a vaʼa, a skwi a da ga na a civèɗ, bab kinè nhala ma, kin ndevdyè a nlèyè.

³⁰ Aman i dè a deɓa a sam ɓèl ngaya, bab ga, a kra a te ri nga ɓai, man ndav nengaʼa a woya holholaʼa,

³¹ a da metsi na, te man a rka, kra az a verzi nga ɓai.

³² Iyè ɓèl ngaya, i voko na va ga a hai a bab ga, a i gaɗa na: Aman i da cko ka kra a deɓa ɓai, mali ga a zhè a sam bab ga, ha i metsi ga.

³³ Gar haha, va na civèɗ a ɓèl ngaya, a nzi a ɓèlè bai te di man a kramam ga. Kra do do a verzi kramamhi nengaʼa.

³⁴ Aman kra a te ri ga ɓai, i slaha a i dè a deɓa a sam bab ga ɗè? I slaha a i rka nkuɗi bab ga man a da kuɗiaʼa ɓai.