Genèse 42 - Ma Zhiklè

Kramamhi Joseph ta shkè Egypte a nshum dau

¹ Aman Jacob a ntsenaʼa, dau nshumè a zhè te kokwar Egypte, a ngaɗa ta wudahi na: Kin pi di a va, va, va, ar haha èhèmè?

² I tsena, dau nshumè a zhè te kokwar Egypte; vo-do, a kin da sumko nga dau, a nga nzi a nshèffè, a nga tiɗ nga azɓai.

³ A kramamhi Joseph 10 ta slambaɗa, a to do a kokwar Egypte, a ta shum dau.

⁴ A Benjamin, kramam Joseph, Jacob a mva na civèɗ ɓai, skwa a da ga na a civèɗ ar na.

⁵ A ndohi Israel ba to do a ta shkèda ndev ndohi ngiɗè tsaɗ tsaɗ, aman mi a ngu a herkeda Canaan tèlèba.

⁶ A Joseph a nkwor kokwar tèlèba, a mpra ta dau a ndohi kokwar tèlèba. Aman kramamhi Joseph ta shkè, ta kalahi a deɓ sak nengaʼa.

⁷ Aman Joseph a nrka ta kramamhi na, a nsen ta, aman a nga va ara man a sen ta ɓai. A ngaɗa ta ma a wuɗai, a ndzhoɗo: Kin shkè tema? Ta gaɗa na: Te kokwar Canaan, a nga shkè a nga da shum skwi nʼndai.

⁸ A Joseph a nsen ta kramamhi na, aman tengaʼa ta sun nengaʼa ɓai.

⁹ Joseph a nhur nshunè na. A ngaɗa ta: Kin shkè a nzeɓi kokwar! Kin shkè a kin woy civèɗ a pa!

¹⁰ A ta mbeɗa na a ma: Aʼai, bi nga! ɓèlèlihi ngaya ta shkè a ta da shum skwi nʼndai.

¹¹ Nga tèlèba wuda ndo staɗ. Nga ndohi nzuraʼa, ɓèlèlihi ngaya ta zeɓi kokwar ka ɓai.

¹² Aman nengaʼa a ngaɗa ta: Tsaval! Kin shkè a kin woy civèɗ a kokwar haha!

¹³ A ta mbeɗa na a ma: Nga, ɓèlèlihi ngaya, te va nasa nga 12. Nga tèlèba a kramam staɗ, wuda ndo ngiɗè te kokwar Canaan. Ntabawaʼa a zhè a sam bab nga anai, a ngiɗè staɗ azɓai.

¹⁴ Joseph a ngaɗa ta: Ara man i gaɗa kinè: Kin ndohi nzeɓi kokwar!

¹⁵ I woy a i jkede kinè aranta: A sam di Pharaon, kin slèmbèɗè a haha azɓai, sèi ntabaw kinè a shkè.

¹⁶ Va-zlündo ndo te ndev kinè, aman a ndè a nckoɗi ntabaw kinè. Kin njèkèɗiaʼa, kin nzi a gi dangai, a i ɗèlè dai, aman kin goɗ zuraʼa. Man ɓai, kinè ndohi nzeɓi kokwar, a sam di Pharaon.

¹⁷ A mpe ta a gi dangai, mʼmèn makar.

¹⁸ Te mʼmèn mamakaraʼa, Joseph a ngaɗa ta: Aman kin woy a kin mbel nshèffè kinè, va-gu ara man i gaɗa kinè – i gi zlau Zhiklè –

¹⁹ Aman kinè ndohi nzuraʼa, kin jèkeda kramam kinè staɗ, a nzi a gi dangai. Kin njèkèɗiaʼa, vo-do, va-helda dau a rai, a kin da a sam ndohi ngwi kinè a ta ndiaʼa.

²⁰ Te deɓaʼa kin ckoɗi ntabaw kinè a sam ga, a i dè shinè te pa, kin cèkèlma azɓai. A kin zi azɓai.

²¹ A ta goɗ a va ta: A vava, skwi haha a ga nga a géɗ mali man nga gu a sam kramam nga. Nga rka ndav na a kuɗai, a ntsa nga rai, a nga fa na zlembaɗ ɓai. A géɗ nengaʼa matakwan ar haha a ga nga.

²² A Ruben a ngaɗa ta: Te va nasa i gaɗa kinè ɓi ɗè? Kin gu mali a sam kra haha ɓai! Aman kin fa na zlembaɗ a ma ga ɓai. Anai kin rka, Zhiklè a jhèɗè Pombaz nengaʼa te ri nga antanta.

²³ Ta sun a ta gaɗa Joseph a ntsena ma nga, ta sun ɓai. Aman nengaʼa a ngaɗa ta a ndo nʼngwè-dè ma na.

²⁴ A nengaʼa a njèke ta, a nda kuɗai. A mʼmenkaɗa deɓa a sam ta, a ta goɗ a nda tengaʼa. A nengaʼa a nco Siméon auda te va tengaʼa, a ndzawaʼa a sam di ta.

Wudahi Jacob ta dè a deɓa a Canaan

²⁵ Te deɓaʼa a ngoɗa aman ta ndha gozhèm dau tengaʼa, a ta hul Suli ta a ta pa na a géɗ dau te gozhèm ta. A ngoɗa, aman ta va ta skwi nʼndi a ri a civèɗ. A ta ga ta arsa.

²⁶ A ta mana na dau a deɓ kɗèhihai, a to do ta.

²⁷ Aman ngiɗè a nzahai a ta shèk va, a mpra gozhèm na, a woya a va na dau a kɗèh na, a nʼngots Suli na te pa.

²⁸ A ngaɗa ta kramamhi na: Suli ga ani i ngotso! Nana te gozhèm ga! Ndav tengaʼa a mbeɗè, a ta pi di a va ta a zlau, a ta gaɗa: Zhiklè a ga nga a haha mè?

²⁹ Aman ta shkè ngwai a sam Jacob, bab ta, a kokwar Canaan, ta ngra na skwi man a gaka ta tèlèba, a ta gaɗa:

³⁰ Masli sa, bi kokwar Egypte, a ngaɗa nga ma a wuɗai, a mpe nga a dangai, a nhur nga ndohi nzeɓi kokwar.

³¹ A nga gaɗa na: Nga ndohi nzuraʼa, nga ndohi nzeɓi kokwar ka ɓai.

³² Nga kramamhi 12, nga mba a bab staɗ, ngiɗè staɗ ani azɓai. Ntabawaʼa a zhè a sam bab nga te kokwar Canaan dai.

³³ A masli sa, bi kokwar, a ngaɗa nga: I war a i rka, aman kinè ndohi nzuraʼa, te skwi haha: Va-jèkeda kramam kinè staɗ a sam ga. Va-helda dau a rai man kin ndiaʼa, a nda ndohi ngwi kinè.

³⁴ Aman sèi kin ckoy ntabaw kinè a haha, ga i shinéa, kinè ndohi nzeɓi kokwar ka ɓai, kinè, kin ndohi nzuraʼa. Te deɓaʼa i pra kinè kramam kinè zaʼa, a kin praʼa, a kin shèwèlè te kokwar haha.

³⁵ Aman ta zuvda dau a hai te gozhèm, staɗ staɗ a nʼngots Suli na, mpaɗa te skwi te pa. Aman ta rka go-zhèm Suli ta, ta gu zlau a vata, ta tèlèba a nda bab ta.

³⁶ A Jacob, bab ta, a ngaɗa ta: Kin helamay wuda ga auda a tsagai. Joseph azbai, Siméon azɓai, a kin woy a kin cè Benjamin a vaʼa. Skwi haha tèlèba kin gayè!

³⁷ A Ruben a mʼmbeɗa na a ma bab na: Aman i da ckoɗa deɓa ɓai, hul wudahi ga cèw, a ka bazl ta te diaʼa. Vayè a ri a iyè. I cko ka a deɓa.

³⁸ Aman a ngaɗa: Kra ga a dè a verzi kinè asaɓai. Kramam nengaʼa a mʼmets na, njèkè séi nengaʼa mènè. Man skwi a da ga na a civèɗ man kin dè, ani i hala ma, kin woy a kin ndevdyè a nlèyè.