Genèse 41 - Ma Zhiklè

Nshunè Pharaon

¹ Te deɓ mvi cèw nshunè a nkeɗe Pharaon: a nzlatsa a ma woyam Nil,

² a nrka zlèhi ngraʼa ndaslndaslaslaʼa 7 ta shkè auda te iyam, a ta ndi mandai.

³ Te deɓ tengaʼa, zlèhi 7 ngiɗè ta shkè auda te iyam, ta gwora hanza-keɗkeɗaʼa, a ta dè a tsagi zlèhi ngraʼa a ma woyam.

⁴ A zlèhi ngworaʼaʼta ndeda zlèhi ngraʼa ndaslndaslaslaʼa 7 a ma. A Pharaon a mpiɗèkwud na.

⁵ Te deɓaʼa a nzhun zaʼa, a nshunè a nkeɗa zaʼa: a nrka gèɗ dau 7 ta shkè auda te gada dau staɗ, ta sia ngolalaʼa.

⁶ Te deɓ tengaʼa gèɗ dau ngiɗè 7, shèkètèr, tser te di staɗ staɗ, ta shkè auda, man kozlar a ntseda na gèɗ a mbazla na diaʼa.

⁷ A shèkètèr dau matsa ta ndeda gèɗ dau nsla ngolalaʼa a ma. Pharaon a mpiɗèkwud na, a suna, nshunè a nkeɗaʼa.

⁸ A prèk a gshè gèɗ. A nzlündo a sam ndohi maya a ndohi kilèa te kokwar Egypte tèlèba, a nʼngra ta nshunè nengaʼa; ndo azbai man a slaha a nʼngra na verzi nshunè nengaʼa.

⁹ A ndo ngsa na zom mbiaʼa a ngaɗa na Pharaon: Mali ga te va nasa a hakay a gèɗ a patsna.

¹⁰ A pats man Pharaon a ngu ndav a géɗ ɓèlèlihi nengaʼa, a mpe ta a dangai a gi bi sojè, nga a ndo nti ɗaf mbiaʼa.

¹¹ A vaɗ ngiɗè, nshunè a nkeɗ nga a vna, nshunè nga tsaɗ tsaɗ.

¹² A gol Hébreu a zhè a sam nga, ɓèl bi sojè, a nga ngra na nshunè nga a nengaʼa; a nengaʼa a ngra nga verzi nshunè nga, ngiɗè a géɗ na, ngiɗè a géɗ na.

¹³ Ara man a ngra nga, a ngu te deɓaʼa arsa. Iyè, ta viyè a deɓa a sam mizlinè ga, a nengaʼa ta manda a wof.

¹⁴ A Pharaon a nzlündo ndo, da baha na Joseph. A ta prekoɗauda tsam-tsam te gi dangai. Nengaʼa a nsha gèɗ, a mfeda maslaka ngiɗè a va, a ndo a sam Pharaon.

¹⁵ A Pharaon a ngaɗa na Joseph: Nshunè a nkeɗyè, ndo ngiɗè a slaha a ngreday verziaʼa ɓai, ko staɗ. A i tsena, aman ndo a ngra ka nshunè nengaʼa, ka slaha ka ngredè verzi nengaʼa.

¹⁶ A Joseph a mʼmbeɗa na a ma Pharaon: I ka ɓai, aman Bi Zhiklè a da ngra na Pharaon ma man amba.

¹⁷ A Pharaon a ngaɗa na Joseph: Nshunè a nkeɗyè: i zlatsa a ma woyam Nil,

¹⁸ a zlèhi ngraʼa ndaslndaslaslaʼa 7 ta shkè auda te iyam, a ta ndi mandai.

¹⁹ Te deɓ tengaʼa zlèhi ngiɗè 7 ta shkè, ta gwora hanzakeɗkeɗaʼa. Te kokwar Egypte tèlèba i rka zlèhi hanzakeɗkeɗaʼa ambaɓihiaʼa arsa ɓai.

²⁰ A zlèhi ngworaʼa hanzakeɗkeɗaʼa 7 sa, ta ndeda zlèhi ngraʼa nshèlèkurhiaʼà a ma.

²¹ Aman ta nde ta ma, ta gwora genè, ara man ta nda skwa ɓai. A i piɗèkwe ga.

²² Te deɓaʼa nshunè a nkeɗyè zaʼa: gèɗ dau 7 ta shkè auda te gada staɗ, nsla ngolalaʼa.

²³ Te deɓ tengaʼa gèɗ dau 7 ngiɗè, shèkètèr a tser te di staɗ staɗ, man kozlar a ntseda na gèɗ, a mbazla na diaʼa,

²⁴ a shèkètèr dau ta ndeda gèɗ dau 7 mbelaʼa a ma. I ngra ta ndohi maya arsa, aman ta slaha ta ngray verziaʼa ɓai, ko staɗ.

²⁵ A Joseph a ngaɗa na Pharaon: Nshunè Pharaon, cèw haha, nara skwi staɗ. Zhiklè a ngra na Pharaon skwi man a woya a nda giaʼa.

²⁶ Zlèhi ngraʼa 7, a gèɗ dau mbelaʼa, nara mvi 7. Nshunè, na staɗgenè.

²⁷ Zlèhi ngworaʼa hanzakeɗkeɗaʼa 7, man ts shkè auda te iyam, te deɓ tengaʼa, nara mvi 7. Shèkètèr dau, man tser te pa staɗ staɗ, man kozlar a tseda na gèɗ a mbazla na diaʼa, nara mvi 7, man mi a gai.

²⁸ Nasa skwi man i gaɗa na Pharaon. Zhiklè a ngra na Pharaon skwi man a woya a nda giaʼa.

²⁹ Na haha, mvi 7 ta da shkè, skwi nʼndi a zhè te kokwar Egypte, a ndev ɓai.

³⁰ Te deɓ tengaʼa, mi a gi mvi 7. A skwi nʼndi matsa man a ndev ɓi te kokwar Egypte, mpca ta a gèɗ. Mi a gi a herkeda a vata, a ta tiɗ ta,

³¹ a ta hér skwi nʼndi man ta ngots kumba sa asaɓai, a géɗ mi mbiaʼa man a shkè te deɓa. Aman mi mbiaʼa holholaʼa.

³² Aman nshunè a nkeɗa Pharaon sak cèw, a skwi man Zhiklè a nhur te ndav, a gi a vava, a gia ndul ndul.

³³ Anai Pharaon da woy ndo mwoslaʼa, man maya na zhè, aman a gi a ndo mbiaʼa te kokwar Egypte.

³⁴ Pharaon da gu maya, a fi ndohi ntakaha a kokwar tèlèba, a ta cèkèlè dau a gi gi tèlè, agoda staɗ te va zlam, tʼhwaɗ mvi 7, man skwi nʼndi a zhè a vata.

³⁵ Ta da ɓicè dau, a mvi man amba man a shkè, a ta ngheda a wov man a Pharaon. A ta hulko dau a kokwar mbiaʼa, a ta ɓiceda pa.

³⁶ A dau a gi a skwi man ta da ngheda a hai, tʼhwaɗ mvi 7, man mi a keɗa kokwar Egypte tèlèba, a ndohi kokwar ta da tiɗ ta a mi azɓai.

³⁷ Ma haha ambaha Pharaon a ndohi mizlinè nengaʼa tèlèba.

Joseph ndo mɓer kokwar Egypte

³⁸ A Pharaon a ngaɗa ta ndohi mizlinè nengaʼa: Nga da ngècè ndo man Mèzhèɓ Zhiklè te ndav na, ara ndo haha tema?

³⁹ A Pharaon a ngaɗa na Joseph: Aman Zhiklè a ngra ka ar haha, ndo man mwosla kumba ara ngaya, man maya na zhè ara ngaya, nʼazɓai.

⁴⁰ Sèi ka ɓer gi ga, a ndohi ga tèlèba, sèi ta fi gèɗ a ma ngaya. Sèi sam nʼnzi bai man i fen ka a vna.

⁴¹ A Pharaon a ngaɗa na Joseph: Na haha, i va ka kokwar Egypte tèlèba a rai.

⁴² A Pharaon a ncko tèslri auda te ri na, a mva na a ri a Joseph, a mva na maslaka bata a va, a skwi daʼai guro.

⁴³ A ta shèwèldèʼa a kiki bi macecèwaʼa, a ta boho a ma nengaʼa: Va-nzalaʼa! A ta gaʼa a ndo mɓer kokwar Egypte aranta.

⁴⁴ A Pharaon a ngaɗa na Joseph: I Pharaon; aman ndo te kokwar a gidè va azɓai, ko keshkata, man ka woya ɓai.

⁴⁵ A Pharaon a mbaha na Joseph, Tsaphnath-Paenéach. A mva na Asnath, dem Poti-Phéra, ndo ncèsl skwai te On, a ngwoz. A Joseph a ngu a ndo mɓer kokwar Egypte tèlèba.

⁴⁶ Mvi Joseph 30, aman a nzlatsa a sam Pharaon, bi Egypte. Aman a nslambaɗa te gi Pharaon, a shèwèlè te Egypte tèlèba.

⁴⁷ Mvi 7, herkeda a nftsko dau a ndev ɓai, a vata ba.

⁴⁸ A nengaʼa a mɓica dau tʼhwaɗ mvi 7, man dau a ndev ɓai te kokwar Egypte, a nɗaʼa a kokwar mbiaʼa. A kokwar mbiaʼa staɗ staɗ tèlèba, dau a shkè te tsagi kokwar.

⁴⁹ A Joseph a nʼngheda dau a vata ba, ara wyak te woyam, a livè azɓai.

Wudahi Joseph

⁵⁰ Joseph a nyu wudahi cèw, ga mi a mshkè, man Asnath, dem Poti-Phéra, ndo ncèsl skwai te On, a nya na.

⁵¹ Joseph a mbaha na tsuvomaʼa Manassé, a ngaɗa: Zhiklè a ngu aman matakwan te gi bab ga tèlèba mpcèy a gèɗ.

⁵² Mbegéɗèʼa a mbaha na Ephraim, a ngaɗa: Zhiklè a mvay wuda te kokwar man i lèyè te pa.

⁵³ Aman mvi 7 man skwi nʼndi a ndev azbai, te kokwar Egypte, klèng ma,

⁵⁴ a hinè mvi 7 man mi a gai, ara man Joseph a ngreda na Pharaon. A mi mbiaʼa a ngau a herkeda tèlèba. Aman te kokwar Egypte, skwi nʼndi a zhè.

⁵⁵ Aman ndohi Egypte ta tiɗè a mai, ndohi ta kuɗai a sam Pharaon, a ta woy skwi nʼndai. Pharaon a ngaɗa ta ndohi Egypte tèlèba: Vo-do a sam Joseph! Skwi man a da gada kinè, va-gau!

⁵⁶ A mi a gi tʼherkeda tèlèba. A Joseph a mwinè wov, a mpra ta dau a ndohi Egypte. A mi a gi holholaʼa te kokwar Egypte.

⁵⁷ A ndohi ta shkè te man a verzi gai tèlèba, a kokwar Egypte, a sam Joseph, aman ta shum dau; aman mi a gi a herkeda a vata.