Genèse 40 - Ma Zhiklè

Joseph a ngreda nshunè ndohi dangai

¹ Te deɓaʼa ndo ngsa na zom bai, a ndo nti ɗaf bai te Egypte, ta gu malai a sam bi ta, bi Egypte.

² A Pharaon a ngu ndav a géɗ ndohi mizlinè nengaʼa, a géɗ ndo ngsa na zom nengaʼa mbiaʼa, a ndo nti ɗaf,

³ a mpe ta a dangai a ri bi so-jèhai, a dangai man Joseph ba te pa.

⁴ A bi sojèhai a mpe ta a ri a Joseph, aman a ɓer ta. A ta nza a pa kètè.

⁵ A vad ngiɗè, nshunè a nkeɗ ta ndohi ncèw a haha, nshunè a nkeɗe ndo ngsa na zom bai tsaɗ, a nkeɗe ndo nti ɗaf tsaɗ, man ta te gi dangai.

⁶ Aman a prèk Joseph a dè a sam ta, a nrka, ta gshè gèɗ,

⁷ a ndzhaɗ ta ndohi mizlinè Pharaon, man a mɓer ta te dangai bi na: A patsna kin nza a nhér gèɗ èhèmè?

⁸ Ta mbeɗa na a ma: Nshunè a nkeɗ nga, a ndo nʼngra nga verzi nshunaʼa azɓai. A Joseph a ngaɗa ta: Sèi Zhiklè a shin nshunè kinè a haha. Va-ngreday dai!

⁹ A ndo ngsa na zom bai mbiaʼa a ngra na nshunè nengaʼa a Joseph, a ngaɗa na: Nshunè a nkeɗyè, a i rka wof man a yiè,

¹⁰ wof a dia makar. Aman a tsi ntsatserai, ntsa ma, a wurzhè tsam-tsam langa, a wuda nengaʼa nʼndha ma.

¹¹ Iyè a kokwi Pharaon te rai, a i cè nyièʼa, a i ɗatseda a kokwi Pharaon, a i va na kokwi a ri a Pharon.

¹² Joseph a ngaɗa na: Na haha verzi nshunè ngaya: Ntsatserai makar, mʼmèn makar.

¹³ Njèkè mʼmèn makar, Pharaon a da ce ka auda te dangi zaʼa, a fe ka a mizlinè ngaya zaʼa, a ka va na kokwi a ri a Pharaon ara zlèzlèa zaʼa, te va man ka ndo ngsa na zom.

¹⁴ Aman ka da nzi amba amba, ka héryè! Aman ka woyè, ka da til ma a géɗ ga a sam Pharaon, a ka takahayè, aman i shkè auda te gi haha.

¹⁵ Ta cyè a metsar te kokwar Hébreu; a haha ba i ga mali ɓai, man ta vyè a dangai a géɗèʼa.

¹⁶ Aman ndo nti ɗaf bai mbiaʼa a nrka, Joseph a ngreda skwi man a shkè auda te nshunè, skwi man amba, a ngaɗa na: I ba nshunè a nkeɗyè. I zuɓa gadagar makar a gèɗ, movar nʼndha te pa.

¹⁷ Te gadagar man a géɗèʼa, skwi nʼndi Pharaon te pa tsaɗ tsaɗ. A ɗiakihai ta ndedama te gadagar man a gèɗ ga.

¹⁸ A Joseph a mʼmbeɗa na a ma: Na haha verzi nshunè ngaya: gadagar makar, nara mʼmèn makar.

¹⁹ Te deɓ mʼmèn makar, Pharaon a di a mana teɓa a daʼai ngaya, a ta man ka a wof, a ɗiakihai ta da ndi zluèɗ va ngaya.

²⁰ Te mʼmèn mamakaraʼa, a pats nhér nyi Pharaon, Pharaon a ngu skwi nʼndi ngolala a ndohi mizlinè nengaʼa, a nhelka ta ndo ngsa na zom mbiaʼa a ndo nta na ɗaf mbiaʼa auda te dangai.

²¹ Ndo ngsa na zom mbiaʼa, a mfeda a deɓa a sam mizlinè na, aman a va na kokwi a Pharaon zaʼa.

²² Aman ndo nti ɗaf mbiaʼa a mʼmanda a wof, ara man Joseph a ngra ta.

²³ Aman ndo ngsa na zom bi mbiaʼa a nhur Joseph te deɓaʼa asaɓai, mpca na a gèɗ.