Genèse 39 - Ma Zhiklè

Joseph a ngwoz Potiphar

¹ Aman ta da Joseph a kokwar Egypte ma, a Potiphar, ntokotasl Pharaon, tsuvom ndohi mɓer gèɗ bai, ndo Egypte, a nsuma te ri ndohi Ismael, man to do a pa.

² A Ndo nzi pèc pècèk a zhè a sam Joseph; a skwi tèlèba man a gau, ngau amba, a slaha a nʼnzi a gi ndo Egypte, babgi na.

³ Aman babgi nengaʼa a nrka, Ndo nzi pèc pècèk a zhè a sam na, a Ndo nzi pèc pècèk a ntakaha te skwi tèlèba man a gau,

⁴ Joseph a nʼngots pombai a sam na. A nengaʼa a ngaʼa a ndo mɓer gèɗ bai, a skwi gi nengaʼa tèlèba, a mva na a ri a nengaʼa.

⁵ Daga pats man a mva na skwi gi na a ri tèlèba, Ndo nzi pèc pècèk a mpshè na ma a gi ndo Egypte, a géɗ Joseph. Mpshè ma Ndo nzi pèc pècèk a zhè a géɗ skwi tèlèba man a nʼngotso, te gi ba, te dak ba.

⁶ Gar haha a mva na skwi tèlèba a ri a Joseph, a nhera a géɗ skwi ngiɗè ɓai, sèi a géɗ skwi nʼndi man a ndiaʼa. Va Joseph, va gola man saɗaɗaɗekaʼa.

⁷ A ngwoz bai a cèkè diaʼa, a ngaɗa: Nga mana a ka!

⁸ Aman nengaʼa a woya ɓai, a ngaɗa na ngwoz bi na: Na haha babgi ga a mvay skwi gi na tèlèba a rai, a hérè a géɗ skwi ngiɗè azɓai.

⁹ Nengaʼa ba a fenyè te gi haha azɓai. A mvay skwi tèlèba; sèi ka man ka ngwoz nengaʼa a mvay ɓai. A i gi mphömè mbiaʼa arsa, a i gi mali a sam Zhiklè ɗè?

¹⁰ Ko a bidè Joseph pèc pècèk, a nfa zlembaɗ ɓai, a ndo a sam nengaʼa ɓai, a mʼmana a vna ɓai.

¹¹ A pats ngiɗè, Joseph a ndo a hwaɗ gai, a ntil mizlinè nengaʼa. Ndo mizlinè ngiɗè a te gi ɓai.

¹² A ngwoz a ngso te maslaka, a ngaɗa: Nga mana a ka! A nengaʼa a mpra na maslaka a rai, a nhu na auda te gai.

¹³ Aman ngwoz a nrka, a njèka na maslaka a rai, a nhu na auda te gai,

¹⁴ a mbaha ta ndohi mizlinè nengaʼa, a ngaɗa ta: Kin rka, bi a ncko ɓèlè, ndo Hébreu, a gi nga, aman a da ngwossada nga a hai. Nengaʼa a mshkè a gi a sam ga, a woy a nga mènè a vna. Aman i tsu lalau.

¹⁵ Aman a ntsenaʼa, i tsi lalau, a i bèhè, a nkalda maslaka a pa, a nhu na auda te gai.

¹⁶ A mfeda maslaka a hai, a zhèr bi na man a shkè ngwai,

¹⁷ a ntsa na tsaval lèmèlèmè, a ngaɗa: ɓèl Hebreu man ka ckoɗa gi nga, a woya a nkalde nga a malai, a mshkè a gi a sam ga.

¹⁸ Aman i tsu lalau, a i boho, a njèkeda maslaka na a sam ga, a nhu na auda te gai.

¹⁹ A bi a ntsena tsaval ma ngwoz na, man a gaɗa na: ɓèl ngaya a ngay kata, a ngay kata – a ngu ndav a vata,

²⁰ a ngso Joseph, a nda a gi dangai, a sam man ta peda ndohi dangai bi Egypte a pa. A nʼnza te gi dangai.

²¹ Aman Ndo nzi pèc pècèk a zhè a sam Joseph, a ngu aman ndohi tèlèba ta woyaʼa, a ngu aman a nʼngots pombai a sam ndo mɓer dangai.

²² A ndo mɓer dangai a mpa na ndohi dangai tèlè a ri a Joseph. Skwi tèlèba te gi dangai, Joseph a ngau.

²³ Ndo mɓer gi dangai a nhera a géɗ skwi ngiɗè ɓai, man a mva na a ri a Joseph, a géɗ man Ndo nzi pèc pècèk a zhè a sam na, a ntakaha te skwi tèlèba man a giaʼa, a gi amba.