Genèse 38 - Ma Zhiklè

Juda a Tamar

¹ Te ndev nasa, Juda a njèkeda kramamhi na, a ndo a verzi ndo ngiɗè, te Adullam, man ta baha na Hira.

² Te pa a nrka dem Canaan, nzlembaɗ na Shua, a nco a ngwoz, a mʼmana a vna.

³ A nʼngots kra, a nyu kra nguraʼa, a mbaha na Er.

⁴ A nʼngots kra zaʼa, a myu kra nguraʼa, a mbaha na Onan.

⁵ A myu kra ngiɗè zaʼa, a mbaha na Shéla. Aman a myu nengaʼa, na zhè te kokwar Cezib.

⁶ A Juda a nca na ngwoz a gi a tsuvom na, nzlembaɗ na Tamar.

⁷ Aman Er, tsuvom Juda, a ngu skwi ambaɓiaʼa a sam Zhiklè, a Zhiklè a nkeɗaʼa.

⁸ A Juda a ngaɗa na Onan: Co ngwoz kramam ngaya a mazai, a ka gu tser te di man a kramam ngaya!

⁹ Aman Onan a suna, ko a yu wudahai, ta a nenga ka ɓai. A géɗ nengaʼa a mʼmana a ngwoz kramam na, aman a mbada va a pa ɓai, a skwi man a gi a tsera a ngedas na aussa ambalai, a woya a ya na wudahi a kramam na ɓai.

¹⁰ Aman skwi man a gau, ambaha Zhiklè ɓai, a nkeɗa nengaʼa ba.

¹¹ A Juda a ngaɗa na Tamar, ngwoz kra na: Men ngay a deɓa a gai, nza a pa ara ngwoz mazai, ha pats, man Shéla, kra ga, ngra ma. A nhur te ndav na: Nengaʼa ba a da metsi na ara kramamhi na. A Tamar a mdo, a mʼmen na a deɓa a gai.

¹² Te deɓ mvi kètè, dem Shua, ngwoz Juda, a mʼmets na. Aman nkuɗa klèng ma, Juda a mandai nengaʼa, Hira te Adullam, to do a kokwar Thimna, a sam ndohi nzli gwots tambakhi na.

¹³ A ta ngra na Tamar: Na haha, bab baki ngaya a dè Thimna, a nda zli gwots tambakhi na.

¹⁴ A nengaʼa a nsuɗa na maslaka mazi nenga a auda a va, a mfeda maslaka a gèɗ, a nʼngheda di na, a nʼnza a ntamagi kokwar Enaim, a civèɗ ndè Thimna. Nengaʼa a nrka, Shéla a ngra ma, aman ta va na a baki ɓai.

¹⁵ Aman Juda a nrkaʼa, a nhur ara man nengaʼa fali dam. Aman nengaʼa a nʼngheda di na a maslaka.

¹⁶ A Juda a nʼngalda ma a sam na, a ngaɗa: I woy a i dè mènè a sam ngaya. A sun a ngaɗa ngwoz kra ga ɓai. A nengaʼa a mbeɗa na a ma: Ka da tsakay mè, aman ka mènè a sam ga?

¹⁷ A ngaɗa: I da va ka ɓok. Ngwoz a mʼmbeɗa na a ma: Sèi ka feda skwi a hai, ha pats man ka zlündo ɓok.

¹⁸ A nengaʼa a ngaɗa: Ka war a i va ka a hi mè? A ngaɗa na: I woya tèslri ngaya a skwi deɓ ngaya, a gada nte ri ngaya. A nengaʼa a mpa na tèlèba, a ndo a sam na, a mʼmana a vna. A nengaʼa a ngu a hwaɗ.

¹⁹ A mshkè, a ncè na maslaka auda a gèɗ, a mfeda maslaka mazi a va.

²⁰ A Juda a nzlündo ɓok a ri ndo Adullam, mandai nengaʼa, a woy skwi man a mpedahi a deɓa te ri ngwoz. Aman nengaʼa a ngatsa ngwozaʼa ɓai.

²¹ A ndzhoɗo ndohi kokwar sa: Fali dam man a nza a civèɗ Enaim, na tema? A ta mbeɗa na a ma: Nga sun fali dam a haha ɓi fèt.

²² A nengaʼa a mshkè a deɓa a sam Juda, a ngaɗa na: I ngatsa ngwoza ɓai. Ndohi kokwaraʼa ta gaɗa, fali dam az a sam nga ɓai.

²³ A Juda a ngaɗa: Da hul skwi sa mènè. I woy aman a ta diyè a hi ɓai. Iyè, i zlinda na ɓok, a ka ngatsa ɓai, tsoi mènè!

²⁴ Te deɓ ki makar, ta ngra na Juda: Tamar, ngwoz kra ngaya, a ngu mphömè. Kra tʼhwaɗ na. A Juda a ngaɗa: Sèi ta gskoɗi a ta kalda a vogwa!

²⁵ A ta gskoɗai, a nengaʼa a nzlündo ndo a sam babaki na, da gaɗa na: Kra tʼhwaɗ ga a ndo man skwi nte ri ga a nengaʼa. A ngaɗa: Wora: skwi haha, tèslrai, skwi deɓa, a gada, a ngè?

²⁶ Aman Juda a wora, a ngaɗa: Nengaʼa a ntsedyè. A ngu a géɗ man i va na Shéla, kra ga, a baki ɓai. Aman te deɓaʼa ta kezla gèɗ ta.

²⁷ A pats nyi kra nengaʼa a mshkè, a nyoko tsakalai.

²⁸ Aman ta yia, staɗ a ngudko ri auda. A ngwoz nyi kra a ngso, a mʼmana na zaʼai nduzoa a rai, aman a shinè te pa: nengaʼa nshèlèkuraʼa.

²⁹ Aman nengaʼa a mʼmenda ri na a deɓa, a ngiɗè a nshkè nshèlèkuraʼa. A nengaʼa a ngaɗa: Ka kra nkalda ma a hai! A ta baha na Perets.

³⁰ Te deɓaʼa kramam nengaʼa mshkè auda, man zaʼai nduzoa, te rai, a ta baha na Zérach.