Genèse 35 - Ma Zhiklè

Zhiklè a pshè na ma Jacob te Béthel

¹ A Bi Zhiklè a ngaɗa na Jacob: Slambaɗa, do a kokwar Béthel, a ka nza a pa, a ka rom sam mvi skwi a Zhiklè a pa, a Zhiklè man a ngudoko ka va a dai, aman ka hu ngaya auda a sam Esau, kramam ngaya.

² A Jacob a ngaɗa ta ndohi gi na tèlèba, a ndohi tèlèba man ta zhè a sam na: Va-wusheda vrihi kinè aussa! Va-tül va kinè, va-humbaɗa maslaka kinè!

³ Te deɓaʼa ngo-slomboɗokoya, a ngo-dokoya a Béthel! Te pa i da rèm sam mvi skwi a Zhiklè, a Zhiklè man a takahayè a pats man skwi mwuɗitpa a gayè, a zhè a sam ga a civèɗ man i beza a pa.

⁴ A ta tèlèba ta va na vri ta a Jacob, a skwi zlembaɗ ta, a ta rda a vèvèɗ a sam gètèl wof a ma Sichem.

⁵ Te deɓaʼa ta slambaɗa. A zlau Zhiklè a ndza ta ndohi kokwar tèlèba, a ta dzar ta wudahi Israel ɓai.

⁶ A Jacob a mshkè Luz, nasa Béthel, te kokwar Canaan, nengaʼa a ndohi man ta zhè a sam na, tèlèba.

⁷ Te pa a nrom sam mvi skwi a Zhiklè, a mbaha na samaʼa El-Béthel, a géɗ man Zhiklè a ngudoko na va a dai, aman a nhu na a sam Esau, kramam na.

⁸ A Debora, dèd Rebecca, a mʼmets na, a ta rda a verzi lakalak, a tsagi Béthel. A ta baha na ‘lakalak kuɗa’.

⁹ A Bi Zhiklè a ngudoko na va a di a Jacob zaʼa, te deɓ man a mshkè auda te Paddan-Aram ma, a mpshè na ma.

¹⁰ Zhiklè a ngaɗa na: Nzlembaɗ ngaya Jacob. Aman ani ta baha ka Jacob asa-kaɓai, ta da baha ka Israel; nʼngaʼa a bab Israel.

¹¹ A Bi Zhiklè a ngaɗa na: I Zhiklè Bi wuɗi tèlè, yau wuda, a ka mana a vata! Ndohi kumba, ndohi herkeda kumba, ta da shkè auda te ka. A bihi ba ta da shkè te verzi ngaya.

¹² A herkeda man i va na Abraham a Isaac, i woy a i va ka, a i woy a i va ta ndohi verzi ngaya.

¹³ A Bi Zhiklè a ndo a géɗèʼa a sam man ta goɗ a vna.

¹⁴ A Jacob a nzlatseda kwa ndzaraʼa, aman a nshinè samaʼa, a sam man ta goɗ a pa, a mbada iyam a hai a sam mvi skwi a Zhiklè, a mbada na mbar a gèɗ.

¹⁵ A Jacob a mbaha na sam man Bi Zhiklè a ngaɗa na, Béthel.

Mʼmetsi Rachel

¹⁶ Te deɓaʼa ta slambaɗa te Béthel. Ndul ndul a ma Ephrata, Rachel a ɗish va holholaʼa.

¹⁷ Aman a yi kra a wuɗai, ngwoz nyi kra a ngaɗa na: Ka gu zlau ɓai, ka yi kra nguraʼa zaʼa.

¹⁸ Ga ncè nshèffè na, a mbaha na Ben-Oni; aman Rachel a mʼmets na. A bab nengaʼa a mbaha na Benjamin.

¹⁹ Rachel a mʼmets na, a ta rda a vèvèɗ a civèɗ ndè Ephrata, te Béthlehem.

²⁰ A Jacob a nzlatseda kwa ndzaraʼa a géɗ gi dzavi nengaʼa a ta sun samaʼa kwa man ta sun gi dzavi Rachel te pa, ha patsna.

Wudahi Jacob 12

²¹ Te deɓaʼa Israel a ndo a ma ma, a ngu gi na te wud kokwar Migdal-Eder.

²² Te ndev nasa, man ta nza te kokwar Migdal-Eder, Ruben a mdo, a ta mana a Bilha, ngwoz bab na. Aman Israel a ntsenaʼa, a ngu ndav a vata. Wudahi Jacob 12.

²³ Wudahi Léa, ta a haha: Ruben, tsuvom Jacob; Siméon, Lévi, Juda, Issacar a Sébulon.

²⁴ Wudahi Rachel: Joseph a Benjamin.

²⁵ Wudahi Bilha, ɓèl Rachel: Dan a Naphthali.

²⁶ Wudahi Silpa, ɓèl Léa: Gad a Asser. Nasa wudahi Jacob man ta yu te kokwar Paddan-Aram.

Mʼmetsi Isaac

²⁷ Jacob a mshkè a sam Isaac, bab na, a kokwar Mamré, te Kirjath-Arba, nasa Hébron – a sam man Abraham a Isaac ta nza a pa ara mbrokihai.

²⁸ Mvi Isaac a ngu 180.

²⁹ Te deɓaʼa Isaac a mʼmets na a va gwoli na, nhala ma, nshèffè dèʼa na di ma. A Esau a Jacob, wudahi na, ta rda a vèvèɗ.