Genèse 30 - Ma Zhiklè

¹ Aman Rachel a nrka, a nʼngatsa kra a sam Jacob ɓai, a ngu srak a géɗ demam nengaʼa, a ngaɗa na Jacob: Vay kra, man bai i metsi ga!

² A Jacob a ngu ndav a géɗ Rachel, a ngaɗa na: Aman Bi Zhiklè a mva ka kra ɓai, iyè i Zhiklè ɗè?

³ A Rachel a ngaɗa na: Na haha Bilha, ɓèl ga. Mana a vna, a da ya ka kra, a i ba i ngècè wudahai.

⁴ A mva na Bilha a ngwoz a Jacob. A Jacob a mʼmana a vna.

⁵ A Bilha a ngu a hwaɗ, a nya na kra nguraʼa a Jacob.

⁶ Rachel a ngaɗa: Bi Zhiklè a ngay skwi nzuraʼa, a ntsena ma ga, a mvay kra nguraʼa. A mbaha na Dan.

⁷ A Bilha, ɓèl Rachel, a nʼngots kra zaʼa, a nya na kra nguraʼa macecèwaʼa a Jacob.

⁸ Rachel a ngaɗa: Nga bozl va a nzlembaɗ Bi Zhiklè a demam ga, a i ga a ngulaʼa. A mbaha na Naphthali.

⁹ Aman Léa a nrka, a yi kra asaɓai, a nco Silpa, ɓèl na, a mva na a ngwoz a Jacob.

¹⁰ A Silpa, ɓèl Léa, a nya na kra nguraʼa a Jacob.

¹¹ Léa a ngaɗa: I zhè a manam! A mbaha na Gad.

¹² Te deɓaʼa Silpa, ɓèl Léa, a nya na kra nguraʼa macecèwaʼa a Jacob.

¹³ Léa a ngaɗa: I wuffè! A dalahi ta da gaɗayè: Mwuffe a sam nengaʼa! A mbaha na Asser.

¹⁴ A pats ngiɗè Ruben a ndo dak, a pats ntsi dau. A nʼngots madzaf ngwoz, a nckoɗa ngwai a sam Léa, mam na. Rachel a ngaɗa na Léa: Tsakay madzaf ngwoz man kra ngaya a nʼngotskoɗai!

¹⁵ Aman nengaʼa a mʼmbeɗa na a ma: Aman ka cèmay baki ga, a slra di ɓi ɗè? A ka woy madzaf ngwoz man kra ga a ngotskoɗi a va ɗè? A Rachel a ngaɗa na: Jacob da mana a sam ngaya a patsna te di madzaf ngwoz man kra ngaya a nʼngot-skoɗi mènè.

¹⁶ Aman Jacob a mshkè ngwi te dak, Léa a nhaka na ma, a ngaɗa: Sèi ka shkè a nga da mènè a ka! I sum ka a madzaf ngwoz man kra ga a nʼngot-skoɗi te dak. A Jacob a nda mana a sam na a vaɗ sa.

¹⁷ A Bi Zhiklè a ntsena nkuɗi Léa, a nʼngots kra, a nya na kra nguraʼa mazlamaʼa a Jacob.

¹⁸ A Léa a ngaɗa: Bi Zhiklè a mvay skwi ntul ga a géɗ man i va na ɓèl ga a baki ga. A mbaha na Issacar.

¹⁹ A Léa a nʼngots kra zaʼa, a nya na kra nguraʼa mamokwaʼa a Jacob.

²⁰ A Léa a ngaɗa: Bi Zhiklè a mvayè skwi mbiaʼa. Antanta baki ga a nzi a sam ga mènè. I ya na wudahi 6. A mbaha na Sébulon.

²¹ Te deɓaʼa a myu demaʼa, a mbaha na Dina.

²² Aman Bi Zhiklè a nhur Rachel, a ntsena ntsi ri nengaʼa, a nʼngots kra.

²³ A ngu a hwaɗ, a myu kra nguraʼa, a ngaɗa: Bi Zhiklè a ncèmay hori auda a dai.

²⁴ A mbaha na Joseph, a ngaɗa: Bi Zhiklè da vay kra a vaʼa staɗ dai!

Jacob a ngwèdè Labar!

²⁵ Aman Rachel a myu Joseph ma, Jacob a ngaɗa na Laban: Vay civèɗ a i dè a deɓa a kokwar ga, a herkeda ga!

²⁶ Pay ngwozi ga, man i ga ka mizlinè a géɗ tengaʼa, a wudahi ga, aman nga dè nga. Ka sun man i gu mizlinè a sam ngaya.

²⁷ Laban a ngaɗa na: Ka gay skwi staɗ dai! I rka Bi Zhiklè a mpshèy ma a géɗ ngaya.

²⁸ A ngaɗa na: Ngray skwi ntul ngaya man ka woyaʼa, a i da va ka.

²⁹ A nengaʼa a mbeɗa na a ma: Ka sun te géɗ ngaya, ara man i gu mizlinè a sam ngaya, a skwi kuɗom ngaya tèlèba ka vayè a ri a iyè.

³⁰ Aman i shkè a sam ngaya, skwi ngaya kèshkata genè. Antanta a zhè kumba ma. Ndo nzi pèc pècèk a mpshè ka ma, aman i zhè a sam ngaya. Anai i da til gi ga ma.

³¹ A Laban a ngaɗa na: I va ka mè? A Jacob a mbeɗa na a ma: I voy skwa ɓai! Aman gu ara man i gaɗa ka, a i woy a i wèr skwi ngaya zaʼa.

³² A patsna i bizhè a ndev skwi kuɗom ngaya tèlèba. Tambakihi a ɓokhi mʼmadzaʼa, a ndurtsotsoʼa, a ntsatsaslaʼa, hul auda te vaʼa! Tengaʼa ta gi a skwi ntul ga.

³³ A skwi haha a da ngrédè auda pats ngiɗè, aman i gau zuraʼa. Aman ka da shkè a ka zeɓi skwi ntul ga, ɓok man ndurtsotsoʼa, ntsatsaslaʼa ka bai, a tambak man mʼmadza ka ɓai, skwi man i co a sam ngaya a metsar.

³⁴ A Laban a ngaɗa na: Gau ara man ka godo.

³⁵ A pats nasa, nkezla mazawal ndurtsotsoʼa a ntsatsaslaʼa a ɓokhi ndurtsotsoʼa a ntsatsaslaʼa, skwi tèlèba man nslekaɗaʼa a va, a tambakihi mʼmadzáʼa, a mpa ta a wudahi na,

³⁶ dra a sam Jacob, a ndè a mènè a civèɗ makar. A Jacob a wèr njèkèɗi skwi Laban.

³⁷ A Jacob a nco gada wof tsaɗ, tsaɗ, a mvècè deɓaʼa.

³⁸ A mpeda gada mvècèʼa a wurom a sam man skwihi ta si iyam a pa, a sam di tambakihi a ɓokhi. A ta vèr va man ta shkè a sam iyam.

³⁹ A mazawal man a nzi a deɓ ɓok, a drok man a nzi a deɓ tambak, a ma gada mvècèʼa, ta ngots kra, a ta yu kra ntsatsaslaʼa, ndurtsotsoʼa.

⁴⁰ A Jacob a nhel ta dalahi tambakihi auda, a nʼngwoda ta di a civèɗ skwi ntsatsaslaʼa, ndurtsotsoʼa, a rèwè man a Laban. Aranta a nʼngots skwi na auda, a mpa na a va skwi Laban ɓai.

⁴¹ Pèc pècèk man skwi man va ta te pa ta tsi deɓa, Jacob a mva ta gada mvècèʼa a wurom a sam di skwai, a ta ngots kra a hwaɗ a ma gada mvècèʼa.

⁴² Aman skwi man va ta a te pa ɓai, a pi gada a pa azɓai. Aranta Laban a nʼngots skwi man va ta a te pa ɓai, a Jacob a nʼngots skwi man va ta te pa.

⁴³ A nengaʼa a ngaʼa a ndo mèshèlè mbiaʼa, a nʼngots skwi ndzham kumba, a ɓèlèlihi, ngwozi a ngurhi ba, zlugumihai a kɗèhihai.