Genèse 3 - Ma Zhiklè

Nhin malai

¹ Te va skwi dakhi man Ndo nzi pèc pècèk Zhiklè a nge ta, zhüzhok a fen ta a maya nʼngwèdè ndo tèlèba. A ngaɗa na ngwoz: Gokwèn, Zhiklè a ngaɗa kinè: Kin da ndau nyi wofhi te gi lak haha ɓi ɗè?

² A ngwoz a mʼmbeɗa na a ma a zhüzhok: Nga ndi nyi wofhi te gi lak.

³ Sèi nyi wof te ndev gi lak, Zhiklè a gada, kin ndu nengaʼa ɓi fèt, kin lama na ɓi fèt, man ɓai kin da metsi kinè.

⁴ A zhüzhok a ngaɗa na ngwoz: Kin metsi azɓai;

⁵ aman Zhiklè a suna, a pats man kin da ndau, di kinè a da win na, a kin da gi lèmèlèmè ara zhiklèhai, kin da sun skwi man amba a skwi man ambaɓai.

⁶ A ngwoz a nrka, nyi wof amba a skwi nʼndai, amba a dai, amba a ngècè maya. A nʼngulo nyi wof, a nʼndau, a mva na baki nengaʼa ba, man ta nza a vna. A nengaʼa ba a nʼndau.

⁷ A tengaʼa cèw ba, a di ta a win na, a ta rka, ta adai. A ta tsaffa vah, a ta manda a ma.

⁸ Aman ta tsena sam sak Ndo nzi pèc pècèk Zhiklè man a shèwèlè a pats dakwaɗ te gi lak, Adam a ngwoz na ta ngheda va ta a sam di Ndo nzi pèc pècèk Zhiklè, a hwaɗ wof te gi lak.

⁹ A Ndo nzi pèc pècèk Zhiklè a mbaha na Adam, a ngaɗa na: Ka tema?

¹⁰ A nengaʼa a ngaɗa: I tsena sam sak ngaya te gi lak, a i gu zlau, te man iyè adai, a i ngheda va ga.

¹¹ Bi Zhiklè a ngaɗa na: Ngaɗa ka, ka adi, wa? Ɗè, ka ndau nyi wof man i njè ka ma a gèɗ, ka ndau nengaʼa ɓi, ɗè?

¹² A Adam a ngaɗa: Ngwoz man ka vayè, a mvayè nyi wof, a i ndau.

¹³ A Ndo nzi pèc pècèk Zhiklè a ngaɗa na ngwoz: Ka ga mè? A ngwoz a mʼmbeɗa na a ma: Zhüzhok a mpiyè a wai, a i ndau.

¹⁴ A Ndo nzi pèc pècèk Zhiklè a ngaɗa na zhüzhok: A géɗ man ka gau ar haha, ka phomdaʼa, te va skwi ndzhamhi tèlèba, a skwi dak tèlèba. Ka hi a hwaɗ ngaya, ka bhöm herkeda a pats nshèffè ngaya tèlèba.

¹⁵ I woya a i pa kinè gèɗ a va a ngwoz ara ndohi mayamhai; a wud ngaya a wuda nengaʼa ba. Nengaʼa a da batsama ka gèd, a ka, ka da je ndudok sak nengaʼa.

¹⁶ A ngaɗa na ngwoz: Aman ka a hwaɗ, ka si matakwan kumba. Ka da yi kra a wuɗi a va. Mi baki ngaya keɗ ka, a nengaʼa a da gi a bi ngaya.

¹⁷ A ngaɗa na Adam: A géɗ man ka fa na zlembaɗ a ma ngwoz ngaya, a ka ndau nyi wof man i gada ka, ka ndau nengaʼa ɓai, herkeda mphomdaʼa a géɗ ngaya. Ka da ngècè skwi tʼherkeda a wuɗi a va, a pats nshèffè ngaya tèlèba.

¹⁸ Herkeda a da fcè vatak a nkuɗdzarai, a ka da ndi lak te dak.

¹⁹ Ka ngècè movar ngaya a vazaza a va, ha pats man ka men ngaya a deɓa a va mberfcnèk, man i ce ka te pa. Ka mberfenèk, a ka min ngaya a deɓa a va mberfenèk.

²⁰ A Adam a mbaha na ngwoz nengaʼa, Eve, aman nengaʼa nʼnga a mam ndohi nshèffè tèlèba a géɗ herkeda.

²¹ A Ndo nzi pèc pècèk Zhiklè a mva ta bkwi a va a nda Adam a ngwoz na.

²² A Ndo nzi pèc pècèk a ngaɗa: Na haha, ndo a nʼnga lèmèlèmè ara nga, a sun skwi man amba a skwi man ambaɓai. Anai da tor ri asaɓai, a ngul nyi wof nshèffè a vaʼa, aman a da nzi a mèdèp.

²³ A ndzomkoɗauda te gi lak te Eden, aman a dè a pizhè herkeda, te nasa Bi Zhiklè a mco.

²⁴ A ndzomko ndo auda, a nzlatseda chérubim a ma gi lak, a kafahi gwèsh te rai, man vogwa te pa, a ta ɓer civèɗ man a dè a sam wof nshèffè.