Genèse 29 - Ma Zhiklè

Jacob, Rachel, Léa

¹ A Jacob a nslambaɗa, a ndo a kokwar te man a mvèng pats.

² Aman a ngul dai, a nʼngots thal iyam tʼhèshèkèɗ. Rèwè tambakihi makar ta mana a pa. Te thal sa ta ɓala ta iyam a skwi ta. Aman kwa mbiaʼa a mpizlè géɗèʼa.

³ Aman rèwè tèlèba mɓica ma, ta gudumbala na kwa mbiaʼa auda a gèɗ, a ta ɓala ta iyam a tambakihai. Te deɓaʼa ta gudumbolko na kwa a ma zaʼa.

⁴ A Jacob a ngaɗa ta ndohai: Kramamhi ga, kin shkè tema? Ta gaɗa na: Nga shkè te Charan.

⁵ Jacob a ngaɗa ta: Kin sun Laban, kra Nachor, ɗè? Ta mbeɗa na a ma: Halau, nga suna.

⁶ Jacob a ngaɗa ta: Nʼnza genè cè? A ta mbeɗa na a ma: A nʼnza genè. Na haha, Rachel, dem nengaʼa, a shkè a tambaki a ma.

⁷ Jacob a ngaɗa: Pats kumba dai, njèkè man ta lè skwi a gi dai. Va-ɓala ta iyam a tambakihi kinè, a kin mende ta a deɓa a sam mandai.

⁸ Ta mbeɗa na a ma: Nga slaha bai, sèi nga ɓica tambakihi tèlèba, ga nga gudumbèl kwa auda a ma thal, a nga ɓala ta iyam a tambakihai.

⁹ Aman ta gèdè dai, Rachel, dem Laban, kramam mam na, a shkè a tambakihi Laban, kramam mam na.

¹⁰ Aman Jacob a rkaʼa, a ndo a ngudumbala na kwa auda a ma thal iyam, a mɓala ta iyam a tambakihi Laban, kramam mam na.

¹¹ A Jacob a nga na mbali a Rachel, a hinè a kuɗai.

¹² A ngaɗa na Rachel: I te va gwoli bab ngaya, kra Rebecca. A nengaʼa a nhu a ma, a nda ngra na bab na.

¹³ Aman Laban a ntsena ma kra demam na, a nhaka na ma, a nhumbatda a ndav, a nga na mbalai, a nɗaʼa a gi na. A Jacob a ngra na ma nengaʼa tèlèba a Laban.

¹⁴ A Laban a ngaɗa na: A vava, ka zluèɗ va ga. Ka vatasl va ga. A nʼnza a sam na ki staɗ.

¹⁵ Te deɓaʼa Laban a ngaɗa na Jacob: Ka kra demam ga! Ka gay mizlinè ambali ɗè? Goɗ skwi te ndav ngaya: Ka war mè?

¹⁶ Dalahi Laban cèw: tsuvomaʼa Léa, ntabawaʼa Rachel.

¹⁷ Léa, di nengaʼa burzozaʼa. Rachel, va na amba, hudemsha te dai.

¹⁸ A Jacob a woy Rachel a ndav na. A ngaɗa: I woy a i ga ka mizlinè mvi 7 a gèɗ Rachel, ntabaw ngaya.

¹⁹ A Laban a mbeɗa na a ma: Dara i va ka nengaʼa, a géɗ man i va na a ndo mbrok ngiɗè. Nza a sam ga.

²⁰ A Jacob a ngu mizlinè mvi 7 a géɗ Rachel. A nhur ara mʼmèn 7 genè, te man a woy Rachel a vata.

²¹ Te deɓaʼa Jacob a ngaɗa na Laban: Vay ngwoz ga ma, i ndikeda mizlinè ga; i woy a i cè a ngwoz.

²² A Laban a mbaha ta ndohi kokwar tèlèba, a ntu skwi nʼndi ngolala.

²³ A dakwaɗ a nco Léa, dem na, a nɗaʼa a gai, a Jacob a nco a ngwoz.

²⁴ A Laban a mva na Silpa, ɓèl na, a ɓèl Léa, dem nengaʼa.

²⁵ A prèk, Jacob a rkaʼa, Léa! A Jacob a ngaɗa na Laban: Ka gay haha mè? I gu mizlinè a sam ngaya a géɗ Rachel ka ɓi ɗè? Ka ngwodyè èhèmè?

²⁶ A Laban a ngaɗa na: Ta gia te kokwar haha arsa azɓai. Ntabawaʼa a cèma ngwoz azɓai.

²⁷ Kin nzi a gi a vna luma staɗ, a i da va ka ngiɗè ba, a ka da gay mizlinè mvi 7 a va zaʼa.

²⁸ A Jacob a nʼnza a gi a vna, ta nza a Léa, luma staɗ. A Laban a mva na Rachel, dem na, a ngwoz zaʼa.

²⁹ Laban a mva na Bilha, ɓèl na, a ɓèlè Rachel, dem na.

³⁰ A Jacob a nco Rachel ba a ngwoz. A woy Rachel holholaʼa, a fena Léa. A ngu mizlinè a géɗ nengaʼa mvi 7 zaʼa.

Wudahi Jacob

³¹ Aman Ndo nzi pèc pècèk a nrka, Léa ta fan gèɗ azɓai, a mva na kra. Rachel a nʼngatsa kra ɓai.

³² Léa a ngu a hwaɗ, a nyu kra nguraʼa, a mbaha na Ruben. A ngaɗa: Ndo nzi pèc pècèk a nrka matakwan ga. Antanta baki ga a da woy iyè a ndav na.

³³ A nʼngots kra zaʼa, a nyu kra nguraʼa, a ngaɗa: Ndo nzi pèc pècèk a ntsenaʼa, ta kaldyè a deɓa. A géɗ nengaʼa a mvay kra a vaʼa. A mbaha na Siméon.

³⁴ A nʼngots kra zaʼa, a nyu kra nguraʼa, a ngaɗa: Antanta nga da nzi a baki ga zura ma, aman i ya na wud ngurhi makar. A mbaha na Lévi.

³⁵ A nʼngots kra zaʼa, a nyu kra nguraʼa, a ngaɗa: Antanta i woy a i slébèrdè Ndo nzi pèc pècèk. A mbaha na Juda. Te deɓaʼa a nya kra asaɓai.