Genèse 28 - Ma Zhiklè

Jacob a hi a kokwar Charan

¹ A Isaac a mbaha na Jacob, a mpshè na ma, a njè na, a ngaɗa na: Ka da co ngwoz te va dalahi Canaan bai!

² Slambaɗa, do a kokwar Paddan-Aram, a gi Béthuel, bab mam ngaya, a ka woy ngwoz te va dalahi Laban, kramam mam ngaya.

³ Zhiklè bi wuɗai da pshè ka ma, da gu a ka yi wudahi kumba, da gu a gerzi ngaya a mènè a vata, a ka ndi a ndohi herkeda a vata.

⁴ Da va ka mpshè ma Abraham, a ka a ndohi verzi ngaya, a ka da kwèr herkeda man ka nzi a pa ara mbrok, man Bi Zhiklè a va na Abraham.

⁵ A Isaac a mpra Jacob, a Jacob a mdo a kokwar Paddan-Aram, a sam Laban, kra Béthuel, ndo Aram, kramam Rebecca, mam Jacob a Esau.

⁶ Aman Esau a nrka, Isaac a mpshè na ma a Jacob, a nzlündo a kokwar Paddan-Aram, a ndè cè ngwoz te pa, a mpshè na ma a ngaɗa na: Ka co ngwoz te va dalahi Canaan bai,

⁷ a Jacob a nfu géɗ a ma bab na a mam na, a ndo a kokwar Paddan-Aram,

⁸ Esau a suna, dalahi Canaan ta ambaha Isaac, bab na, bai.

⁹ A Esau a ndo a sam Ismael, a ncka ngwoz a va gwoliaʼa: Mahalath, dem Ismael, kra Abraham, demam Nebajoth.

Nshunè a nkeɗa Jacob te Béthel

¹⁰ Aman Jacob a njèkeda kokwar Beer-Shéba, a ndo a civèɗ Paddan-Aram.

¹¹ A mshkè a sam ngiɗè man a woya a mʼmènè a pa, pats nkala ma. A mco kwa staɗ, a nfu a skwi nfi gèɗ, a mʼmanahi a samaʼa, a nzhun na.

¹² A nshunè a nkeɗaʼa: A mrka ksal nzlatsa tʼherkeda, gèɗ mɓaraʼa a zhiklè a golahi Zhiklè ta shkèhai, ta tivè a pa.

¹³ Na haha Ndo nzi pèc pècèk a nzlatsa te géɗèʼa, a ngaɗa na: I Ndo nzi pèc pècèk, Zhiklè Abraham, bab ngaya, a Zhiklè Isaac: herkeda man ka mana a pa, i da va ka, a wudahi ngaya.

¹⁴ Wudahi ngaya ta da gi a vata, ara wyak te woyam. Ka da zlèzlèmè te man a nkèl pats, te man a mvèng pats, te man a tsagi a tsagai, a ndohi herkeda tèlèba ta da ngècè mpshè ma te nzlembaɗ ngaya.

¹⁵ Anai i zhè a sam ngaya, a i ɓer ka a sam tèlèba man ka dè a pa, a i minde ka a deɓa a kokwar haha. I woy a i jèke ka azɓai, ha a i ga tèlèba man i pasla ka rai.

¹⁶ Aman Jacob a mpiɗèkwud na, a ngaɗa: A vava Ndo nzi pèc pècèk a zhè a sam haha, a i sun bai.

¹⁷ A ngu zlau, a ngaɗa: Sam haha a pi zlau a gèɗ a ndo. Na haha gi Zhiklè, ntamagi zhiklè a haha.

¹⁸ Te mangoslèmaʼa a prèk te gai, Jacob a nco kwa man a nfu a skwi nfi gèɗ na, a nzlatseda, aman a shin samaʼa, a mbada mbar a pa,

¹⁹ a mbaha na samaʼa: Béthel. Halaʼa ta baha na samaʼa Luz.

²⁰ A Jacob a ngaɗda ma a hai: Aman Bi Zhiklè a zhè a sam ga, a ɓeryè a civèɗ ga, a vay skwi nʼndai a i ndiaʼa, a maslaka a i vi a va,

²¹ a i shkè a deɓa a gi bab ga a pombai, te deɓaʼa Ndo nzi pèc pècèk, a da gi a Bi Zhiklè ga,

²² a kwa haha man i Zlatseda, aman i shin samaʼa, a gi a gi Zhiklè. Te skwi tèlèba man ka vayè, i da va ka skwi staɗ te va kula, zuraʼa.