Genèse 26 - Ma Zhiklè

Isaac te Guérar

¹ Mi mbiaʼa a ngu a kokwar, a fena mi te va man Abraham a di dai. A Isaac a ndo a kokwar Guèrar, a sam bi Abimélec, bi Philistie.

² A Ndo nzi pèc pècèk a ngudoko na va a dai, a ngaɗa na: Ko do a kokwar Egypte ɓai, nza te kokwar man i da ngra ka.

³ Nza a kokwar haha a mbrok, i woy a i zhè a nda ka, a i pshè ka ma. Aman i woy a i va ka herkeɗa haha tèlèba, i woy a i va ka a ndohi verzi ngaya, a i gi ara man i mbaɗa na a Abraham, bab ngaya.

⁴ I woy a i ga ndohi verzi ngaya kumba, ara bantihi te giɗfèk, a i va ta herkeda haha tèlèba a ndohi verzi ngaya, a ndohi herkeda tèlèba ta da ngècè mpshè ma a nzlembaɗ ngaya,

⁵ a géɗ man Abraham a nfu gèɗ a ma ga, a ngu skwi tèlèba ara man i jhèɗèʼa te ma nkwèr ga, te ma bi ga, te ma kita ga.

⁶ A Isaac a nʼnza a Guérar.

⁷ Aman ndohi kokwar sa ta dzhoɗo a géɗ ngwoz nengaʼa, a ngaɗa: Demam ga! A gi zlau man a gaɗa ta, nengaʼa ngwoz ga. A nhur te ndav, ndohi kokwar sa ta da kéɗèʼa a géɗ Rebecca, a géɗ man nengaʼa mbikaɓai.

⁸ Aman a nʼnza a pa nʼnzi a zhè, a Abimélec, bi ndohi Philistie a mpu di auda a nvakavar, a nrka Isaac ta shimèɗ va a Rebecca, ngwoz na.

⁹ A Abimélec a mbaha na Isaac, a ngaɗa na: Nengaʼa ngwoz ngaya, a ka gaɗa demam ga èhè-mè? A Isaac a mʼmbeɗa na a ma: I hur i da ngècè mʼmetsai a géɗ nengaʼa.

¹⁰ A Abimélec a ngaɗa: Ka ga nga a haha mè! Ka suna, tsam-tsam ndohi kokwar haha ta slaha ta kala na a va ngwoz ngaya, a ka fa nga mali a gèɗ, kè!

¹¹ A Abimélec a mfa ta ma a gèɗ a ndohi kokwar nengaʼa tèlèba: Ndo man nda lama na ngwozai, man ɓai géɗ va bakiaʼa, ta da kéɗèʼa.

¹² A Isaac a ngu dau te kokwar sa, a nʼngots skwi a ndiv ɓai. Aman Ndo nzi pèc pècèk a mpshè na ma.

¹³ Isaac a nʼnga a ndo mèshèlè a ma ma, ha a nʼnde na a ndo mbiaʼa a vata.

¹⁴ Rèwè tambakihi na a zhè, rèwè zlèhai, a ndohi mizlinè kumba. A ndohi Philistie ta gu srak a géɗ nengaʼa.

Thal iyam te ndev Guérar a Beer-Shéba

¹⁵ A thal iyam tèlèba, man ɓèlèlihi bab na ta rau, te va man Abraham a zhè dai, ndohi Philistie ta vshèʼa a herkeda.

¹⁶ A Abimélec a ngaɗa na Isaac: Do ngaya, ka mbiaʼa, ka fen nga.

¹⁷ A Isaac a ndo na, a ngu gi na a dal Guérar, a nʼnza a pa.

¹⁸ A Isaac a nrau thal iyam zaʼa, man ɓèlèlihi Abraham, bab na, ta rau te va nasa, man Abraham a zhè dai, a ndohi Philistie ta vshèʼa, te deɓ mʼmetsi Abraham. A mva ta nzlembaɗ lèmèlèmè ara man Abraham a mva ta.

¹⁹ Aman ɓèlèlihi Isaac ta tsaka thal, ta ngots iyam a loloyko va auda.

²⁰ A ndohi mɓer skwi te Guérar ta bozl va a ndohi mɓer skwi Isaac, a ta gaɗa: Iyam nga! A mbaha na thal sa Esek, a géɗ man ta gu ma a géɗèʼa.

²¹ Te deɓaʼa a nrau thal ngiɗè, a ta bozl va a géɗèʼa zaʼa. A mbaha na Sitna.

²² Te deɓaʼa a nslambaɗa, a nrau thal ngiɗè zaʼa; a géɗ nengaʼa ta ga ma ɓai. A géɗ nengaʼa a mbaha na Rehoboth, a ngaɗa: Antanta Ndo nzi pèc pècèk a mva nga sam mpraʼa, a nga grè a ma ma te kokwar.

²³ Te pa a ndo a Beer-Shéba.

²⁴ A Ndo nzi pèc pècèk a ngudoko na va a dai a vaɗ sa, a ngaɗa: Iyè Zhiklè Abraham, bab ngaya. Ka gu zlau ɓai, i zhè a sam ngaya. I woy a i pshè ka ma a ndohi verzi ngaya ta mènè a vata, a géɗ Abraham, ɓèl ga.

²⁵ A nengaʼa a nrom sam mvi skwi a Zhiklè a pa, a ntsa na ri a Ndo nzi pèc pècèk. A Isaac a ngu gi na a pa, a ɓèlèlihi na ta rau thal iyam a pa.

Nderzlè-ma a Abimélec

²⁶ Pats ngiɗè Abimélec te Guérar a mshkè a sam na, a nda Ahuzath, mandai na, a Picol, bi-sojè na.

²⁷ A Isaac a ngaɗa ta: Anai kin gi shèwa a nga, a kin dzam nga auda a sam kinè. Kin shkè a sam ga èhèmè?

²⁸ Ta gaɗa na: Anai nga rka a vava, Ndo nzi pèc pècèk a zhè a nda ka. Gar haha nga huro, dara nga dérzlè ma nga a ka a mʼmbèɗè, a nga derzla ma nga a ka,

²⁹ a ka da ga nga matakwan azɓai, lèmèlèmè ara nga, nga ga ka matakwan azɓai, nga va ka civèɗ a gumai. Ka ndo man Ndo nzi pèc pècèk a pshè na ma.

³⁰ A Isaac a ntila ta skwi nʼndai, a ta ndau, a ta sau.

³¹ Te mangoslèmaʼa a prèk, ta mboɗ mʼmbèɗè. A Isaac a mpre ta, a ta kezla gèɗ a gumai.

³² A pats nasa ɓèlèlihi Isaac ta shkè a ta gaɗa na a géɗ thal man ta rau, a ta gaɗa: Nga ngots iyam!

³³ A mbaha na Shiba. A géɗ nengaʼa, nzlembaɗ samaʼa Beer-Shéba, ha patsna.

³⁴ Aman mvi Esau 40, a nco Judith, dem Beéri, ndo Heth, a Basmath, dem Elon, ndo Heth, a ngwozi na.

³⁵ A géɗ ta cèw ba, ndav a ndza ta nda Isaac a Rebecca kumba.