Genèse 25 - Ma Zhiklè

Mʼmetsi Abraham

¹ A Abraham a nco ngwoz ngiɗè, nzlembaɗ na Ketura.

² A nya na Jokshan, Zimran, Medan, Madian, Jishbak a Shuach.

³ Jokshan a myau Séba a Dedan. Wudahi Dedan, Ashurim, Letushim a Leummim.

⁴ Wudahi Madian, Epha, Epher, Hénoc, Abida a Eldaa. Na haha wudahi Ketura tèlèba.

⁵ Abraham a mva na skwi na tèlèba a Isaac.

⁶ A wudahi ngwozi ngiɗè a mva ta skwi mbalai, a nzlinda ta dra a sam Isaac, kra na, a herkeda te man a civèɗ mvèng pats, te va man Abraham a zhè a nshèffè dai.

⁷ Mvi Abraham a gi 175.

⁸ Te deɓaʼa a mʼmets na. Abraham a mʼmets na, nhala kumba ma, a nzu a nshèffè kumba, a mʼmets na a va gwoli na.

⁹ A Isaac a Ismael, wudahi na, ta rda a gi dzavi Macpéla, te dak Ephron, ndo Heth, zuraʼa a Mamré,

¹⁰ te dak man Abraham a suma a sam ndohi Heth. Ta rda nda Abraham a Sara, ngwoz na, a pa.

¹¹ Te deɓ mʼmetsi Abraham, Bi Zhiklè a mpshè na ma Isaac kra na. Isaac a nʼnza a sam thal Lachai-roi.

Verzi Ismael

¹² Na haha ndohi verzi Ismael, kra Abraham, man Agar, ngwoz Egypte, ɓèl Sara, a ya na Abraham.

¹³ Na haha nzlembaɗ wudahi Ismael, ara nzlembaɗ ta a gwoli ta: Nebajoth, tsuvom Ismael; Kédar,

¹⁴ Adbeel, Mibsam, Mishma, Duma, Massa,

¹⁵ Hadad, Théma, Jethur, Naphish a Kedma.

¹⁶ Na haha wudahi Ismael, ara nzlembaɗ ta, ara sam gi ta. Tengaʼa bihi herkeda 12 te verzi ta.

¹⁷ Mvi Ismael tèlèba, 137. Te deɓaʼa a mʼmets na, a mʼmets na a va gwoli na.

¹⁸ Wudahi nengaʼa ta nza a kokwar Havila, ha ndè Shur, a tsagi Assyrie. A nʼnza ta ma a kramamhi na tèlèba.

Nyi Esau a Jacob

¹⁹ Na haha ndohi verzi Isaac, kra Abraham: Abraham a myu Isaac.

²⁰ Mvi Isaac 40 aman a nco dem Béthuel, ndo Aram, te Paddan-Aram, demam Laban, ndo Aram, a ngwoz.

²¹ Isaac a ntsu ri a Zhiklè a gèɗ ngwoz na. Ta ngatsa kra ɓai. A Ndo nzi pèc pècèk a ntsena ntsi ri nengaʼa, a Rebecca, ngwoz nengaʼa, a ngu a hwaɗ.

²² Wudahi cèw tʼhwaɗ na ta bèzl va, a nengaʼa a ngaɗa: Aman skwi a gi ar haha, dara i mets ga. A mdo, a ndzhoɗo Ndo nzi pèc pècèk.

²³ A Ndo nzi pèc pècèk a ngaɗa na: Verzi ndohi herkeda cèw tʼhwaɗ ngaya. Verzi ndohi cèw ta da shkè auda tʼhwaɗ ngaya a ta kezli gèɗ. Verzi ndohi staɗ a gi a ngul ngiɗè, a tsuvomaʼa a da gi ɓèl ntabawaʼa.

²⁴ A pats nyi nengaʼa, a myu tsakali.

²⁵ Nshèlèkuraʼa, nteva, gwots a va ara tambak, a ta baha na Esau.

²⁶ Te deɓaʼa a myu ngiɗè, a ri nengaʼa a ngsko va a ndudok sak Esau, a ta baha na Jacob. Mvi Isaac 60, man a yi wudahai.

Esau a preda nʼndi-gi nengaʼa a ma

²⁷ Aman wudahi ta grè, Esau a nda a ndo lèkèɗ, a nshèwèlè te dak. Jacob a nʼnza shèffaʼa te ngwai.

²⁸ Isaac a woy Esau holholaʼa, a gèɗ man a cko na zluèɗ dak. A Rebecca a woy Jacob holholaʼa.

²⁹ A pats ngiɗè, Jacob a nta ɗaf. Esau a mshkè ngwi te dak, mi a keɗaʼa.

³⁰ A Esau a ngaɗa na Jacob: Tsakay skwi nʼndi nduzaʼa a haha dai! Mi a keɗyè. A géɗ nengaʼa ta baha na Edom (nteva).

³¹ A Jacob a ngaɗa na: Sèi ka pray nʼndi-gi ngaya dai!

³² A Esau a mʼmbeɗa na a ma: Na haha pats ngiɗè i da metsi ga genè, a i gi a nʼndi-gi mè?

³³ A Jacob a ngaɗa na: Sèi ka mbaɗayè dai! A nengaʼa a mʼmbaɗa na, a mpreda nʼndi-gi nenga a ma aranta a sam Jacob.

³⁴ A Jacob a mva na movar a lak a Esau. Nengaʼa a nʼndau, a msau, a nslambaɗa, a ndo na. Aranta Esau a nkwola nʼndi-gi nengaʼa.