Genèse 24 - Ma Zhiklè

Ngwoz Isaac

¹ Abraham a nhala hurnjüfnjüfa ma, a Ndo nzi pèc pècèk a mpshè na ma te skwi tèlèba.

² A Abraham a ngaɗa na tsuvom ɓèl na, ndo mɓer skwi na tèlèba: Taraha zlazlar ga!

³ I woya aman ka mbaɗayè, a sam di Ndo nzi pèc pècèk, Zhiklè giɗfèk a Zhiklè herkeda, ka da cè na ngwoz a Isaac te va dalahi Canaan, man nga nza a nda ta a haha, ɓai!

⁴ Sèi ka dè a kokwar bab ga, a sam gwoli ga, a ka woyko na ngwoz a Isaac te pa.

⁵ A ɓèl na a ngaɗa na: Nkèkèkè? Ngiɗè ba, ngwoz a woya man a nshkè a kokwar haha ɓi, kè? I da kra ngaya a deɓa a kokwar man ka shkè te pa ɗè?

⁶ A Abraham a ngaɗa na: Azɓai! Ka da kra ga ahngata ɓai!

⁷ Ndo nzi pèc pècèk, Zhiklè giɗfèk, man a nckay auda te gi bab ga, te kokwar gwoli ga, man a ngaɗayè, a mbaɗayè: herkeda haha i woy a i va ta ndohi verzi ngaya – nengaʼa a da zlindè gol nengaʼa a ma ngaya, a ka da ngatsa na ngwoz a kra ga te pa.

⁸ Aman ngwoz a woya a nshkè a verzi ngaya ɓai, ka mendoko mʼmbèɗè auda ma. Aman kra ga ka da a deɓa ahngata ɓai!

⁹ A ɓèl Abraham a ntaraha zlazlar Abraham, babgi na, a mʼmbaɗa, a ngi ara ma na.

¹⁰ A ɓèlè a nhul zlugumihi 10 te ndev zlugumihi babgi na, a skwi mèshèlè tsaɗ tsaɗ, a nslambaɗa, a ndo a kokwar Syrie, a ma Euphrate, a kokwar Nachor.

¹¹ A mva ta nshèk va a zlugumihai, a ta mènèhai a dal kokwar, a sam thal, a dakwaɗ, man ngwozi ta shkè a mɓèl iyam. A ngaɗa:

¹² Ndo nzi pèc pècèk, Zhiklè Abraham, babgi ga, takahayè a patsna, va na pombai a Abraham, babgi ga!

¹³ I da nzi a ma thal haha, a dalahi kokwar ta shkè a ta ɓèl iyam.

¹⁴ Da gu ar haha: Dem man i gaɗa na: Hejèkeda duzlak ngaya a ka ɓedzkay iyam te pa a i siaʼa, te deɓaʼa a gaɗayè: Sau, i ɓala ta iyam a zlugumihi ngaya ba – nengaʼa man ka woya ka va na a ngwoz a Isaac, ɓèl ngaya. Te skwi haha i woy a i suna, ka va na pombai a babgi ga.

¹⁵ Njiɗè ngèɗ te ma, na haha, Rebecca, dem Bethuel, kra Milca, ngwoz Nachor, kramam Abraham, a mshkè, a duzlak a daʼai.

¹⁶ Dem amba te dai, bidalai, a sun baki di ɓai, a ndè a vèvèɗ thal; a nʼndha duzlak na, a nzuɓkoɗauda zaʼa.

¹⁷ A ɓèl Abraham a nhu a sam na, a ngaɗa: Ɓedzkay iyam te duzlak ngaya kètè, a i siaʼa!

¹⁸ A nengaʼa a ngaɗa: Sau, bi ga! Tsam-tsam a nzuɓko duzlak a hi a daʼai, a mfeda a rai, a mva na iyam a nsiaʼa.

¹⁹ Aman dèʼa na ma, dem a ngaɗa na: I woy a í ɓala ta iyam a zlugumihi ngaya ba, a ta siaʼa.

²⁰ Tsam-tsam a mɓalda iyam a torok, a nhu a deɓa a vèvèɗ thal iyam, a mɓèl iyam, a mɓala ta iyam a zlugumihi nengaʼa tèlèba.

²¹ Masli sa a nrzl na, a nʼnza tètè, a hérèʼa, ara man Ndo nzi pèc pècèk a da takaha te nshèwèlè nengaʼa ɗè, kè?

²² Aman zlugumihi ta sa klèng ma, ɓèl Abraham a mva na iyam htsan guro, a dasi ri guro ndaɓalaʼa a dam,

²³ a ngaɗa: Ka dem ngè? I woya ka ngrayè! Sam a zhè te gi kinè, aman nga da mènè a pa ɗè?

²⁴ A nengaʼa a ngaɗa na: I dem Béthuel, kra Milca, man a nya na Nachor.

²⁵ A ngaɗa na a vaʼa: Ksof a zhè a skwi nʼndi kumba; sam mʼmènè ba a zhè.

²⁶ A nguraʼa a nguɓda deɓ a hai, a nkalahi a deɓ sak Zhiklè,

²⁷ a ngaɗa: I shid gèd a Ndo nzi pèc pècèk, Zhiklè Abraham, bab ga, man a mva na pombai, a gi skwi man amba a sam na. A vava Bi Zhiklè a ngray civèɗ a sam gi kramam bab ga.

²⁸ A demaʼa mhu a ma, a da ngra na tèlè a mam na.

²⁹ Kramam Rebecca a zhè, nzlembaɗ na Laban.

³⁰ Aman a rka iyam htsan te htsan, a dasi ri te ri demam na, a ntsena ma man Rebecca, demam na, a ntsu tsaval maʼa: ndo sa a ngaɗayè kata kata kata… a nhu auda a sam ndo massa a ma thal iyam. Aman a nʼndika a sam ndoʼa, a nʼngotso, a nzlatsa a sam zlugumihi a ma thal iyam genè.

³¹ A Laban a ngaɗa na: Washkè a gai, ka ndo man Ndo nzi pèc pècèk a pshè ka ma. Ka zlatsa auda èhèmè? I tila ka sam te gi ga ma, sam zlugumihi ba a zhè.

³² A ndo massa a ndo a gai, a Laban a mpra ta skwi auda a deɓ zlugumihai, a mpa ta ksof a kuza a hai, a mɓala ta iyam a nengaʼa a ndohi na, a ta pènè sak ta.

³³ Te deɓaʼa a mva ta skwi nʼndai. Aman nengaʼa a ngaɗa: I ndi skwi nʼndi azɓai ha i ndeva mizlinè man ta vay a rai. Laban a ngaɗa: Goɗ ma ngaya mènè!

³⁴ A ɓèl Abraham a ngaɗa: I ɓèl Abraham.

³⁵ Ndo nzi pèc pècèk a mpshè na ma babgi ga a vata, a nʼnda a ndo mèshèlè. A mva na tambakhi a zlèhi a verzhè-genè a guro, ɓèlèlihai – ngwozi a ngurhi – zlugumihi a kɗèhihai.

³⁶ Sara, ngwoz babgi ga, a mya na kra, man nhala ma. A bab na a mva na skwi gi na tèlèba a nengaʼa.

³⁷ Anai bab ga a mbaɗdaye, a ngaɗa: Ka woya na ngwoz a Isaac te va dalahi Canaan ɓai, te kokwar tengaʼa man i nza te pa a haha.

³⁸ Aman do a gi bab ga, a sam gwoli ga, a ka woyka na ngwoz a kra ga te pa.

³⁹ A i gaɗa na bab ga: Aman ngwoz a woya a nshkè a verzi ga ɓi, kè?

⁴⁰ A ngaɗayè: Ndo nzi pèc pècèk, man i zhè a nshèffè a sam di nengaʼa, a di a zlindè gol nengaʼa a ma ngaya, a da takaha ka a sam nshèwèlè ngaya, a ka da ngatsa na ngwoz a kra ga te va gwoli ga, te gi bab ga.

⁴¹ Man ka do a ta va ka ɓai, ka mendokoɗi mʼmbèɗè ngaya auda ma.

⁴² Aman a patsna i shkè a ma thal iyam, a i gaɗa: Ndo nzi pèc pècèk, Zhiklè Abraham, bab ga; aman ka da takahayè a vava a sam nshèwèlè ga haha,

⁴³ i da nzi a ma thal iyam haha. Bidali man a shkè a mɓèl iyam, a i gaɗa na: Ɓedzkay iyam te duzlak ngaya a i siaʼa,

⁴⁴ a nda gaɗayè: Sau, a i woy a i ɓala ta iyam a zlugumihi ngaya ba, nengaʼa man Ndo nzi pèc pècèk a woya a nva na a ngwoz a kra babgi ga.

⁴⁵ Njiɗè ngèɗ te ma, a Rebecca a mshkè, a duzlak a daʼai, a ndo a vèvèɗ thal iyam, a mɓèl iyam. A i gaɗa na: Ɓedzkay iyam a i siaʼa!

⁴⁶ Tsam-tsam a nzuɓda duzlak a hai a daʼai, a ngaɗa: Sau, a i woy a i ɓala ta iyam a zlugumihi ngaya ba. A i sau, a nengaʼa a mɓala ta iyam a zlugumihai.

⁴⁷ A i dzhoɗo a sam na: Ka dem ngè? A nengaʼa a ngaɗayè: I dem Bethuel, kra Nachor, man Milca a ya na. A i va na iyam htsan, a dasi rai,

⁴⁸ a i guɓda deɓ a hai, a i kalahai a deɓ sak Ndo nzi pèc pècèk, a i shüd gèɗ a Ndo nzi pèc pècèk, Zhiklè Abraham, babgi ga, man a dyè a civèɗ zuraʼa, a i ngatsa na dem kramam babgi ga a ngwoz a kra na.

⁴⁹ Anai, aman kin woy a kin ga na skwi man amba, a kin va na pombai a babgi ga, va-gadayè. Man ɓai, va-gaɗayè, a i ngècè civèɗ ga.

⁵⁰ A Laban a Béthuel ta mbeɗa na a ma: Skwi haha, Ndo nzi pèc pècèk a ngau. Nga slaha nga gèɗè ma ngiɗè a vaʼa azɓai, ko man amba, ko man ambaɓai.

⁵¹ Rebecca a na! Co, a ko do a deɓa, a kra babgi ngaya a ncè a ngwoz, ara man Ndo nzi pèc pècèk a goɗa.

⁵² Aman ɓèl Abraham a ntsena ma haha, a nkalahai a deɓ sak Ndo nzi pèc pècèk.

⁵³ Te deɓaʼa a ncko skwi wi verz-hègenè a guro, a maslaka, a mpa na Rebecca; a kramam nengaʼa, a mam na ba a mva ta skwi mèshèlè tsaɗ tsaɗ.

⁵⁴ Te deɓaʼa ta ndau a ta sau, nengaʼa a nda ndohi man ta zhè a sam na, a ta mana a pa. A prèk ta slambaɗa, a ta gaɗa: Va-vay civèɗ a i dè a deɓa a sam babgi ga.

⁵⁵ Aman kramam na a mam Rebecca ta gaɗa na: Jèkeda dem nga kètè dai! A gi mʼmèn 10 dai, te deɓaʼa kin dè.

⁵⁶ A ngaɗa ta: Kin gay ndudoh a gèɗ ɓai! Aman Ndo nzi pèc pècèk a ntakahayè a sam nshèwèlè ga, va-vay civèɗ, a i dè a deɓa a sam babgi ga.

⁵⁷ A ta gaɗa na: Sèi nga baha na dam, a nga jhèɗèʼa.

⁵⁸ A ta baha na Rebecca, a ta gaɗa na: Ka woya ka dè a verzi ndo haha ɗè? A nengaʼa a ngaɗa: Halau, i woyaʼa.

⁵⁹ A ta va na civèɗ a Rebecca, demam ta, a nda dèd na, a to do a verzi ɓèl Abraham a ndohi na.

⁶⁰ A ta pshè na ma Rebecca, a ta gaɗa na: Demam nga, yu wuda pshehpshehkaʼa. A ndohi verzihi ngaya da dum ntamagi kokwar mayamhi tengaʼa.

⁶¹ A Rebecca a ɓèlléhi na ta slambaɗa, ta nza a deɓ zlugumihai, a ta dzodzor ndo massa. A ɓèl Abraham a nco Rebecca, a nʼndo na.

⁶² Isaac a nʼndo dak Négeb, a ma thal Lachai-roi, a nʼnza a pa.

⁶³ Pats ngiɗè, a dakwaɗ, a nʼndo dak, aman a hér gèɗ. A ncede gèɗ a zhiklè, a nrka zlugumihai a civèɗ.

⁶⁴ Aman Rebecca a mpu di a ma, a nrka Isaac, a mshkè na hai a deɓ zlugumai,

⁶⁵ a ngaɗa na ɓèl Abraham: Ndo ngata man a shkè te dak, wa? A ɓèl a ngaɗa na: Nasa bi ga. A Rebecca a mbè di na a maslaka.

⁶⁶ A ɓèl Abraham a nʼngra na skwi tèlèba man a gau, man a nʼngotso, a Isaac.

⁶⁷ A Isaac a nda Rebecca a gai, a nco a ngwoz, a woyaʼa a ndav na. Aranta Isaac a nʼngots ndo man a pi ndav a vna te di man a mam na man a mets na.