Genèse 23 - Ma Zhiklè

Mʼmetsi Sara

¹ Sara a nʼnza a nshèffè mvi 127.

² Te deɓaʼa a mʼmets na te Kirjath-Arba, nasa Hébron, te kokwar Canaan. A Abraham a mdo, aman a lèyèʼa, a kuɗiaʼa.

³ Te deɓaʼa Abraham a nslambaɗa, a sam nckondoʼa, a ngaɗa ta ndohi Heth:

⁴ I ndo mbrok, kra ngwi ka ɓai a sam kinè. Va-vay sam a i da ri ngwoz ga a pa.

⁵ A ndohi Heth ta gaɗa na Abraham:

⁶ Bi nga, tsena ma nga! Ka, ka kra bai a sam nga. Rda ngwoz ngaya a sam gi dzavi nga mbelaʼa. Ko staɗ ndo man a gaɗa i vi azɓi ɓai, nʼazbai.

⁷ A Abraham a nslambaɗa, a ngurɓahai, a sam ndohi kokwar, ndohi Heth,

⁸ a ngaɗa ta: Aman kin woy a i cko nckondo ngwoz ga a i riaʼa, sèi kin tsena ma ga, a kin nzay a deɓa a sam Ephron, kra Tsochar,

⁹ aman a vay sam gi dzavi Macpéla, man a nengaʼa, a kuma gi dau na. I pilèʼa, ara gani nengaʼa, da vayè a gi dzavi ga a sam kinè.

¹⁰ A Ephron a nʼnza a pa te ndev ndohi Heth. A Ephron, ndo Heth, a ngaɗa na Abraham a sam di ndohi Heth, a sam di ndohi a ntamagi kokwar na tèlèba;

¹¹ Bi ga, tsena ma ga! Sam dak, i va ka ambalai. Vèvèɗ ba man a zhè te pa, i va ka ambalai; i va ka a va ngaya a sam di gwoli ga. Rda ngwoz ngaya a pa!

¹² A Abraham a ngurɓahai a sam ndohi kokwar,

¹³ a ngaɗa na Ephron, a ndohi kokwar ta tsenaʼa: Kam, kam, tsena ma ga! Sèi ka hil Suli dak te ri ga dai, ga i ri ngwoz ga a pa.

¹⁴ A Ephron a mbeɗa na a ma a Abraham:

¹⁵ Bi ga, tsena ma ga! Sam dak te di gurso 400, kala mè a sam nga? Rda ngwoz ngaya a pa genè!

¹⁶ A Abraham a ngu ara man Ephron a woyaʼa, a nʼngra na gurso 400 a Ephron a sam di ndohi Heth. Gurso 400 ara Suli ta.

¹⁷ A Abraham a shum dak Ephron te Macpéla, zuraʼa a Mamré. Gi dau a nda gi dzavi te za, a wofhi a pa, tèlèba,

¹⁸ a nʼnde na a skwi Abraham, a sam di ndohi Heth, a ndohi a ntamagi kokwar na tèlèba.

¹⁹ Te deɓaʼa Abraham a nreda Sara, ngwoz na, a vèvèɗ, te dak Macpéla, zuraʼa a Mamré, nasa Hébron, te kokwar Canaan.

²⁰ Aranta dak man zlèzlèa a ndohi Heth, vèvèɗ te za, a ngu a sam gi dzavi man a Abraham.