Genèse 22 - Ma Zhiklè

Zhiklè a jkeda Abraham

¹ Te deɓ nengaʼa, Bi Zhiklè a woya a njkeda Abraham, a ngaɗa na: Abraham! A Abraham a mʼmbeɗa na a ma: Iyè a nai!

² A Bi Zhiklè a ngaɗa na: Co Isaac, kra ngaya, kra ngaya staɗ-genè, man ka woya a ndav ngaya, a ko do a kokwar Morija, a ka vayè a sam nʼndèr skwi a Zhiklè a géɗ za man i da ngra ka.

³ Te mangoslèmaʼa a prèk, Abraham a nslambaɗa, a mpeda skwi a deɓ kɗèh, a mbaha ta ɓèlhi nengaʼa cèw, a Isaac, kra na. A nfüd shègwa man a da ndèr skwi a vna, a ta slambaɗa, a to do a sam man Bi Zhiklè a gada na:

⁴ Te mʼmèn mamakaraʼa, Abraham a mpu di a ma, a nrka samaʼa dra.

⁵ A Abraham a ngaɗa ta ɓèlhi nengaʼa: Va-nza a haha a sam kdèh! Nga a kra ga nga woya nga dè ahngata. Aman nga da tsu ri klèng ma, nga woya nga shkè a deɓa a sam kinè.

⁶ A Abraham a nco shègwa man a woya a ndèr skwi a vna, a mʼmana na a gèd a Isaac. A Abraham a nco skwi nüb vogwa, a gwèsh, a to do cèw.

⁷ Isaac a ngaɗa na Abraham, bab na: Bab ga! Abraham a ngaɗa na: Awai, kra ga! A ngaɗa: Na haha, vogwa a zhè, shègwa a zhè. Aman kra tambak man ka da zli a Zhiklè, na tema?

⁸ A Abraham a ngaɗa na: Zhiklè a da wèrè dai, a gèd kra tambak na, kra ga. A to do, cèw.

⁹ Aman ta ndikè a sam man Zhiklè a ngra na, Abraham a nram sam mvi skwi a Zhiklè, a ndüzl shègwa, a ndzawa Isaac, kra na, a mʼmanda a deɓ shègwa a sam mvi skwi a Zhiklè.

¹⁰ A Abraham a ntor rai, a nco gwèsh, aman a zli daʼai kra na.

¹¹ A gol Zhiklè a mboho te zhiklè te géɗèʼa: Abraham, Abraham! A Abraham a mʼmbeɗa na a ma: Iyè anai!

¹² A Zhiklè a ngaɗa: Jèkeda kra ngaya, ka lama na ɓai! Aman antanta i suna, ka gi zlau Zhiklè. Ko kra ngaya staɗgenè, ka jèkaha a sam ga ɓai.

¹³ Aman Abraham a ncede gèɗ a zhiklè, a rka drok man drom ngezlala te va wof thossossoʼa. A Abraham a mdo, a nco drok, a nzla na a sam nʼnder skwi a Zhiklè, te di man a kra na.

¹⁴ A Abraham a mbaha na samaʼa: Zhiklè ntilda skwi a hai. Ko a patsna ta baha na za sa: Zhiklè a wèrè dai.

¹⁵ A gol Zhiklè a mbaha na Abraham zaʼa te zhiklè te géɗèʼa:

¹⁶ Ndo nzi pèc pècèk a ngaɗa: I gèɗè a mʼmbèɗè: a gèɗ man ka gu ar haha, a ka jèkaha kra ngaya staɗgenè a sam ga ɓai,

¹⁷ i woy a i pshè ka ma, a i gi ndohi verzi ngaya kumba, ara bantihai a giɗfek, ara wyak te woyam, a ndohi verzi ngaya ta da kwèr ntamagi kokwar ndohi mayamhi ngaya.

¹⁸ Ndohi a géɗ herkeda tèlèba ta da ngècè mpshè ma a géɗ nzlembaɗ ngaya, a géɗ man ka fu gèɗ a ma ga.

¹⁹ Te deɓaʼa Abraham a mʼmen na a deɓa a sam ɓèlèlihi na, a ta slambaɗa, a to do Beer-Shéba. A Abraham a nʼnza te Beer-Shéba.

Verzi Nachor

²⁰ Te deɓ skwi sa, ta ngra na Abraham: Milca ba a nya na wudahi a Nachor, kramam ngaya.

²¹ Tsuvom nengaʼa Uts; Buz, kramam na; Kemuel, bab Aram;

²² Késed, Hazo, Pildash, Jidlaph a Bethuel.

²³ Bethuel a myu Rebecca. Nasa wudahi 8 man Milca a ya na Nachor, kramam Abraham.

²⁴ Ndurɗi na ba, nzlembaɗ na Réuma, a yu wudahai: Thébach, Gaham, Tahash a Maaca.