Genèse 21 - Ma Zhiklè

Nyi Isaac

¹ Aman Sara a nsu Ndo nzi pèc pècèk te va, a ngu ara man a pasla na rai, a ngaɗa na.

² Sara a nʼngots kra a hwaɗ, a nya na kra a Abraham, man a nhala ma, a pats man Bi Zhiklè a ngra na nshèlèkuraʼa.

³ Abraham a mbaha na kra, man Sara a nya na, Isaac.

⁴ A pats matsamakaɗaʼa, Abraham a nʼngela na ngwon a Isaac, ara man Bi Zhiklè a njè na.

⁵ Mvi Abraham 100, ga a yi Isaac, kra na.

⁶ Sara a ngaɗa: Bi Zhiklè a mvayè aman i ngwèshè. Ko wawa man a da tsenaʼa, a da ngwèshè a géɗ ga.

⁷ A ngaɗa: Kra a da cèɗè wa Sara, – ndo a nʼngra na Abraham halaʼa arsa dè? Ko man nhala ma, i ya na kra nguraʼa.

Abraham a ndzama Agar a Ismael

⁸ A kra a grè, a njèkeda wa. A Abraham a ngau skwi nʼndi ngolala mbiaʼa, a pats man Isaac a njèkeda wa.

⁹ Aman Sara a nrka, kra man Agar, dem Egypte, a ya na Abraham, a ngwossaha Isaac, kra nengaʼa,

¹⁰ a ngaɗa na Abraham: Dzama ngwoz ɓèlè sa, cèw a kra na! Kra ɓèl sa da mba a nʼndi gi a Isaac, kra ga, bai!

¹¹ Ma haha ambaha Abraham bai, a géɗ kra na.

¹² Aman Bi Zhiklè a ngaɗa na Abraham: Ka hur a géɗ kra ngaya a ɓèl ngaya bai! Ma tèlèba man Sara a gaɗa ka fu gèɗèʼa. Verzi ngaya a da gi sèi te Isaac.

¹³ Aman kra ɓèl ngaya ba, i woy a i giaʼa a verzi ndohi mbiaʼa, te man nengaʼa tser ngaya.

¹⁴ Te mangoslèmaʼa a prèk, Abraham a nco movar, a iyam te gozhèm bkwai, a mva na Agar. A ncko kra, a mva na a daʼai na, a ndzardaussa. A nengaʼa ndo na, a nsawala tʼhèshèkèɗ Beer-Shéba.

¹⁵ Aman iyam te gozhèm a nʼndev na ma, a nkalda kra a verzi wof ntusntusaʼa,

¹⁶ a ndo a nʼnzahi zuraʼa a nengaʼa, dra kètè ara man ka ɓèr sulom a ndikè a pa. A nhur a gaɗa: I da rka mʼmetsi kra ga ɓai. A nʼnza zuraʼa a kra, a hinè a nkudi a vata.

¹⁷ Bi Zhiklè a ntsena kuɗ kra, a gol Bi Zhiklè a mbaha na Agar te zhiklè, a ngaɗa na: Agar, nʼnga ka mè? Ka gu zlau ɓai! Bi Zhiklè a ntsena kuɗ kra a sam man ka feda a pa.

¹⁸ Slambaɗa, gso kra mbelembela! I woy a i giaʼa a verzi ndohi mbiaʼa.

¹⁹ A Bi Zhiklè a mwina na dai, a Agar a nrka nlèlè iyam. A Agar a mdo, a nʼndha gozhèm bkwi a iyam, a mva na kra a nsiaʼa.

²⁰ A Bi Zhiklè a zhè a nda kra. A gre, a nʼnza tʼhèshèkèɗ, ndo lèkèɗ.

²¹ A nʼnza tʼhèshèkèɗ Paran, a mam nengaʼa a ncka na ngwoz te kokwar Egypte.

Abraham a Abimélec ta derzla ma ta

²² Te ndev nasa, bi Abimélec, a Picol, bi sojè nengaʼa, ta gaɗa na Abraham: Bi Zhiklè a zhè a nda ka te skwi tèlèba man ka giaʼa.

²³ Anai sèi ka mbaɗayè a sam di Bi Zhiklè, aman ka lèɓèslè a sam ga, a sam wudahi ga, a sam wud wudahi ga. Skwi man nga ga na mandala a gèɗ, a woy ka gu lèmèlèmè a kokwar ga ba man ka nza te pa ara mbrok.

²⁴ A Abraham a ngaɗa na: I mbèdè.

²⁵ Aman Abraham a nʼnga na ndzoan a Abimélec, a gèd nlèlè iyam man ɓèlèlihi Abimélec ta co a wuɗai.

²⁶ A Abimélec a ngaɗa: I sun ndo ngu ɓai. Ka gaɗayè di ɓai, i tsena ar haha di ɓai, sèi a patsna man i tsenaʼa.

²⁷ A Abraham a nhul tambakihi a zlèhi, a mpa na Abimélec, a ta derzla ma ta.

²⁸ Aman Abraham a mpeda wud tambakihi 7 a zlawa,

²⁹ Abimélec a ndzhodo: Ka da gi a wud tambakihi man ka peda a zlawa haha mè?

³⁰ A mʼmbeɗa na a ma: Wud tambakihi 7 sa, sèi hul te ri ga, ta ara skwi mai wuɗai, aman iyè, a nru thal sa.

³¹ A géɗ nengaʼa ta baha na sam Beer-Shéba, a géɗ man ta mboɗ mʼmbèɗè.

³² Aranta ta derzla ma ta te Beer-Shéba. Te deɓaʼa Abimélec a Picol, bi sojè nengaʼa, ta slambaɗa, a ta men ta a deɓa a kokwar ndohi Philistie.

³³ A Abraham a ngeda wof a pa te Beer-Shéba, a ntsi ri a nzlembaɗ Ndo nzi pèc pècèk a pa, bi Zhiklè man a nzi a mèdèp.

³⁴ A Abraham a nʼnza te kokwar ndohi Philistie ara mbrok, nʼnzi a vata ba.