Genèse 17 - Ma Zhiklè

Nzlembaɗ Abram mɓuaʼa

¹ Aman mvi Abram 99, Ndo nzi pèc pècèk a ngudoko na va a dai, a ngaɗa na: I Zhiklè Bi wuɗai. Gso civèɗ ga, a ka nza zuraʼa,

² a i woy nga derzla ma a ka, a i woya i ge ka a verzi ndohi kumba.

³ A Abram a nkalahi a deɓ sak nengaʼa, a Bi Zhiklè a ngaɗa na:

⁴ Nderz-lè-ma nga a ka, na haha: Ka gi a bab ndohi herkeda kumba kumba.

⁵ Gar haha anai nzlembaɗ ngaya Abram asakaɓai, aman Abraham; aman i da ge ka a bab ndohi herkeda kumba.

⁶ I woy a i va ka tser kumba a vata, a ta ndi a verzi ndohi herkeda kumba, a bihi ta shke auda te verzi ngaya.

⁷ Nderzlè-ma nga a ka a ndohi verzi ngaya, a verzi verzi tengaʼa, a mèdèp, aman i gi a Bi Zhiklè ngaya, a Bi Zhiklè ndohi verzi ngaya.

⁸ A i va ka, a ndohi verzi ngaya, herkeda a haha, man ka a mbrok te pa, kokwar Canaan tèlèba, a ka ngotso a mèdèp, a i ndi a Bi Zhiklè tengaʼa.

⁹ A Bi Zhiklè a ngaɗa na Abraham: Aman ka, sèi ka jèjèr nderzlè-ma nga, kinè a ndohi te verzi ngaya, verzi verzi tèlèba.

¹⁰ Na haha nderzlè-ma nga a ka, a ndohi te verzi ngaya, man kin jèjèrèʼa: Ta ngela na ngwon a kra nguraʼa staɗ staɗ tèlèba.

¹¹ Ta ngela na mbèbèc ngwon. Nasa skwi man a ngreda nderzlè-ma nga a kinè.

¹² Kra nguraʼa staɗ staɗ tèlèba te ndev kinè, man a ngu mʼmèn 8, ta ngela na ngwon, verzi verzi tèlèba. Ko ɓèlè man a yu te gi ngaya, ko nengaʼa man ta suma a sulai a sam bab na ngiɗè, man ndo verzi ngaya ka ɓai.

¹³ Tèlè ta ngela ta ngwon. Nengaʼa man a myu te gi ngaya, a nengaʼa man ka suma a sulai. Nasa nderzlè-ma nga te gada va kinè, nderzlè-ma a mèdèp.

¹⁴ Ndo man ngwon nʼngel ɓai, kra nguraʼa man mbèbèc ngwon nʼngel ɓai, da zeda te ndev ndohai. Nengaʼa a ntawaɗaha nderzlè-ma ga.

¹⁵ A Bi Zhiklè a ngaɗa na Abraham: Sarai, ngwoz ngaya, anai ta baha na Sarai asaɓai. Nzlembaɗ nengaʼa antanta: Sara – ngwoz bai.

¹⁶ I woy a i pshè na ma, a nengaʼa ba a da ya ka kra nguraʼa. I woy a i pshè na ma, a gi a verzi ndohi herkeda, a bihi te verzi ndohi herkeda tsaɗ tsaɗ ta da shkè auda te nengaʼa.

¹⁷ Abraham a nkalahi a deb sak nengaʼa, a ngwoshè, a ngod te géɗ na: Ndo man mvi na 100, a da yi kra ɗè? A Sara, mvi na 90, a ngècè kra genè dè?

¹⁸ A Abraham a ngaɗa na Bi Zhiklè: A woy Ismael da nza a nshèffè a sam di ngaya!

¹⁹ A Bi Zhiklè a ngaɗa: Azɓai, Sara, ngwoz ngaya, a da ya ka kra nguraʼa, a ka da baha na Isaac. I woy a i derzla ma ga a nengaʼa ba a mèdèp, aman i Bi Zhiklè nengaʼa, a Bi Zhiklè ndohi te verzi nengaʼa.

²⁰ Aman a géɗ Ismael ba i tsena ma ngaya: Na haha, i pshè na ma, a da yi wudahi a vata, a da yi bihi 12, a da gi a ndohi mbiaʼa.

²¹ Aman i woy a i zlècèdè nderzlè-ma ga a Isaac, man Sara a da ya ka, a tèra aranta.

²² Aman Bi Zhiklè a ngaɗa na Abraham ma tèlèba klèng ma, a ndo na a géɗèʼa zaʼa.

²³ A Abraham a nco Ismael, kra na, a ɓèlèlihi tèlèba man ta yau te gi nengaʼa, tèlèba man a sum ta a sulai, tèlèba, nguraʼa staɗ staɗ tèlèba, a nʼngela ta mbèbèc ngwon a pats man Zhiklè a ngaɗa na sa.

²⁴ Mvi Abraham 99, aman ta ngela na ngwon na.

²⁵ Ismael, kra na, mvi 13, aman ta ngela na ngwon.

²⁶ A Abraham a kra na, ta ngela ta ngwon pats staɗ, a pats nasa,

²⁷ a ngurhi tèlèba te gi na, a tengaʼa man ta yau te gi na, a tengaʼa man a sum ta a sulai – ɓèlè – ta ngela ta ngwon a nda nengaʼa.