Genèse 15 - Ma Zhiklè

Zhiklè a mpasla na ri a ma Abram

¹ Te deɓaʼa Ndo nzi pèc pècèk a ngaɗa na Abram te nshunè: Abram, ka gu zlau bai, i gambar ngaya. Skwi ntul ngaya mbiaʼa a zhè a ma.

² Abram a ngeɗa na: Ndo nzi pèc pècèk, Zhiklè ga, ka woy a ka da vay mè? Anai i hèl ga cèw cèw a i metsi ga, kra ga azbai. A Eliézer te Damas a da ndi gi ga.

³ A Abram a ngaɗa: Ka vay kra ɓai, a ɓèl ga a da ndi gi ga.

⁴ A Ndo nzi pèc pècèk a ngaɗa na: Nengaʼa ka bai; kra hwaɗ ngaya da ndu gi ngaya!

⁵ A nda auda, a ngaɗa: Ced gèɗ a zhiklè, ngur bantihai ka slaha ka nger ta ɗè? A ngaɗa na: Ndohi verzi ngaya ta da gi kumba arsa.

⁶ A Abram a nco ma Zhiklè a ndav, a Ndo nzi pèc pècèk a nfa a ngi-zuraʼa.

⁷ A Bi Zhiklè a ngaɗa na: I Ndo nzi pèc pècèk, man i cka ka auda te kokwar Ur te Chaldée, aman i da va ka herkeda haha.

⁸ A nengaʼa a ngaɗa: Ndo nzi pèc pècèk, Zhiklè ga, aman skwi haha a ga ga, i da shinè te mè?

⁹ A njhèɗèʼa: Ckoy zlè matsamakaɗ, ɓok mvi na makar, drok mvi na makar, mbakala staɗ a kra nkuɗhom staɗ.

¹⁰ A Abram a mva na skwi tèlèba, a ntserah ta, rèta te civèɗ ngiɗè, rèta te civèɗ ngiɗè. Aman ɗiakihai a ntseraha ɓai.

¹¹ A mohodokihai ta shkè a sam skwi mbazlaʼa; aman Abram a ndzam ta.

¹² Aman pats a woya a nkèlè, nzhunè a ngsama na dai a Abram, a ruva mbiaʼa a ntèuda a pa.

¹³ A Bi Zhiklè a ngaɗa na Abram: A woy ka suna, ndohi verzi ngaya ta da nzi a mbrok te herkeda man a tengaʼa ka bai. A ta gi ɓèlè te pa, a ta ga ta matakwan mvi 400.

¹⁴ Aman i woy a i da ga ta kita a ndohi man ta da ga ta a ɓèlè. Te deɓaʼa ta da dè auda a skwi mèshèlè te ri kumba.

¹⁵ Aman ka, sèi ka da metsi a va babhi ngaya, a ta da re ka a vèvèɗ, aman ka hala hurnjüfnjüfa ma.

¹⁶ Sèi kra kra kra ngaya a da shkè a deɓa a haha. Aman mali ndohi Amor tiɗè di ka ɓai.

¹⁷ Aman pats nkala ma, sam nkezawa ma; a vodzok a ɗüzhè, a skwi ntiv vogwa a shèwèlè te ndev zluèd ntserahahiaʼa.

¹⁸ A pats sa, Ndo nzi pèc pècèk ta derzla ma ta a Abram, a ngaɗa: I da va ta herkeda haha a ndohi te verzi ngaya, a hinè te woyam Egypte, ha ndè a ma woyam mbiaʼa, Euphrate.

¹⁹ Herkeda ndohi Ken, Keniz, Kadmon,

²⁰ Heth, Phérez, Rephaim,

²¹ Amor, Canaan, Guirgasi, a Jébus.