Genèse 14 - Ma Zhiklè

Abram a mbél Lot

¹ A pats man Amraphel, bi Shinear, a Arjoc, bi Ellasar, a Kedorlaomer, bi Elam, a Tideal, bi Gojim,

² a ta gu var a Béra, bi Sodom, a Birsha, bi Gomorrhe, a Shineab, bi Adma, a Shéméber, bi Tseboim, a bi Béla, nzlembaɗ na Tsoar,

³ ta tèlèba ta ɓica va a dal Siddim, a ma woyam blèm.

⁴ Ta gu ɓèlè mvi 12 a sam Kedorlaomer ma; te mvi 13, ta woya mprè va ta auda.

⁵ Aman te mvi 14, Kedorlaomer a bihi man ta humdoko va a tengaʼa, a ta dum ta ndohi Rephaim te kokwar Ashteroth-Karnaim; a ndohi Zuzim te Ham; a ndohi Emim te Shave-Kirjathaim;

⁶ a ndohi Hor te za tengaʼa Séir, ha ndè za Paran, a ma hèshèkèɗ.

⁷ Te deɓaʼa ta men ta a deɓa, a ta shkè En-Mishpath, Kadès, a ta gi var, a ta ngul ndohi Amalék te herkeda tengaʼa tèlèba, a ndohi Amor ba, te kokwar Hatsatson-Thamar.

⁸ A bi Sodome, bi Gomorrhe, bi Adma, a bi Tseboim, a bi Béla – nengaʼa Tsoar – a ta ɗaha va a dal Siddim, a ta gi var a

⁹ Kedorlaomer, bi Elam, Tideal, bi Gojim, Amraphel, bi Shinear, a Arjoc, bi Ellasar. Te tsagi ngiɗè bihi faɗ, te tsagi ngiɗè bihi zlam.

¹⁰ A dal Siddim, vèvèɗ man ta rau bitume te pa. Aman bihi Sodome a Gomorrhe ta hu ta, ta wush ta a vèvèɗ, a njèkèɗihiaʼa ta hu ta a za.

¹¹ Ngul ndohai ta hul skwi Sodome a Gomorrhe a skwi nʼndi tèlèba, a to do ta.

¹² A ta gso Lot, kra kramam Abram, te Sodome, a skwi nengaʼa ba, a ta daʼa.

¹³ A ndo ngiɗè, ndo Hébreu, man a wuckaɗ na, a mshkè a ngra na ma haha a Abram. Nengaʼa a nʼnza a sam gètèl wof te Mamré, ndo Amor, kramam Eshcol, kramam Aner, ndohi man ta derzla ma a nda Abram.

¹⁴ Aman Abram a ntsenaʼa, ta gso kra kramam na, a mpa ta skwi var a va ndohi 318 man a sen ta, te va ndohi man ta yau te gi na, a ta hu a verzi bihai, ha ta ndikè a Dan.

¹⁵ A nkezl ta ndohi na, a nkala ta a va a vad, a nda bèlèlihi na, a ndzam ta, a mhu a verzi tengaʼa, ha ndè Choba, te man a ri gula a Damas.

¹⁶ A nhulko skwi tèlè a deɓa, a Lot, kra kramam na, a skwi na, a ngwozi a ndohi ba.

¹⁷ Aman Abram a nʼngul ta Kedorlaomer a bihi man ta humdoko va a nengaʼa ma, a mshkè a deɓa. A bi Sodome a ndo a ta zli gèd a vna a dal Shavé, a dal bai.

Melchìsédek

¹⁸ Melchisédek, bi Salem, a nhulko movar a barassa. Nengaʼa ndo mvi skwi a Zhiklè, Zhiklè a géɗ zhiklèhi tèlèba.

¹⁹ A mpshè na ma, a ngaɗa na Abram: Zhiklè a géɗ skwi tèlèba, nengaʼa man a ngau giɗfèk a herkeda, a pshè na ma Abram.

²⁰ Nslébèrdè Zhiklè a géɗ skwi tèlèba, man a mpa ka mayamhi ngaya a rai. A Abram a mva na skwi staɗ te va skwi kula, tèlèba.

²¹ A bi Sodome a ngaɗa na Abram: Pay ndohai! Skwi a ngaya!

²² A Abram a ngaɗa na bi Sodome: I cè ri a zhiklè, a Ndo nzi pèc pècèk a géɗ skwi tèlèba, nengaʼa man a ngau giɗfèk a herkeda:

²³ ko zhèwèɗ, ko teɓa kotokoroh, ko skwi mèmè man skwi ngaya, i cè te ri ngaya azbai, man bai ka da gada: iyè a nʼndeda Abram a ndo mèshèlè.

²⁴ I woy skwi bi fèt! Sèi skwi nʼndi ndohai, a skwi tengaʼa man ngo do a nda ta: Aner, Eshcol a Mamré; da ngots difi ta!