Genèse 13 - Ma Zhiklè

Abram a Lot ta kezli gèɗ

¹ Aranta Abram a ngwoz na a skwi nengaʼa tèlèba, ta jèkeda kokwar Egypte, a to do a kokwar Négeb, a nda Lot.

² Skwi gi Abram a vata, verzhè-genè a guro ba.

³ A ndo a ma ma a sam man mandi a pa, ha ta jèkeda kokwar Négeb, a ndè Béthel, a ta ndikè a sam man a ngu gi na a pa nshèlèkuraʼa, te ndev Béthel a Ai,

⁴ a sam mvi skwi a Zhiklè man a ngu a samaʼa te va nasa. A samaʼa a ntsu ri a nzlembaɗ Ndo nzi pèc pècèk.

⁵ Lot ba, man to do a Abram, a nʼngots tambakihai, a zlèhai a gihai.

⁶ Kokwar a slra ɓai, a ta nzi a sam staɗ, te man skwi ta kumba, ta slaha ta nzi a sam staɗ bai.

⁷ A ndohi mɓer skwi Abram, a ndohi mɓer skwi Lot, ta bèzl va. A mvi nasa ndohi Canaan a ndohi Phérez ta nza te kokwar sa.

⁸ A Abram a ngaɗa na Lot: Nga a ka, a ndohi mɓer skwi ga a ndohi mɓer skwi ngaya, da bozl va bai! Aman nga a kramama.

⁹ Herkeda a zhè a ma ma ka bi dè? Nga kezla gèɗ. Man ka woya ndè a civèɗ ri gula, i dè a civèɗ ri mandi ar iyè. Man ka dè a civèɗ ri mandai, i dè a civèɗ ri gula ar iyè.

¹⁰ A Lot a nʼngul dai, a nrka, dak a ma woyam Jourdain, iyam te pa kumba – ga Ndo nzi pèc pècèk a gedassa Sodome a Gomorrhe — nara gi lak Ndo nzi pèc pècèk, nara kokwar Egypte, ha ndè a Tsoar.

¹¹ A Lot a woy dak a ma woyam Jourdain tèlèba, a ndo a civèɗ mvèng pats, a dukwad. Aranta a ta kezle gèd.

¹² Abram a nʼnza a kokwar Canaan. A Lot a ngu gi na te kokwar a vara, a nda gi na a ma kokwar Sodome.

¹³ Aman ndohi Sodome, ndohi malihi mbiaʼa, ndohi mphömè a sam di Ndo nzi pèc pècèk.

¹⁴ Aman Lot a njèkeda Abram ma, Ndo nzi pèc pècèk a ngaɗa na Abram: A sam man ka zlatsaʼa a pa, ngul dai, te man a civèɗ dukwad, te man a géɗèʼa, te man a civèɗ mvèng pats, te man a civèɗ nkèl pats.

¹⁵ Aman herkeda tèlèba man ka rkaʼa, i woy a i va ka a ndohi nte verzi ngaya a mèdèp.

¹⁶ A i ge ka a verzi ndohi kumba, ara wyak te woyam. Ndo man a slaha a nʼngér wyak te woyam, a slaha a ngér ndohi te verzi ngaya ba.

¹⁷ Slambaɗa, sawala a gèɗ herkeda, a ngurè na, a nguzloh na, i woy a i da va ka.

¹⁸ A Abram a nhul gi na, a mdo, a nʼnza a dal Mamré, te Hébron, a sam gètèl wof. A pa a nrom sam mvi skwi a Ndo nzi pèc pècèk.