Genèse 10 - Ma Zhiklè

Ndohi te verzi Noé

¹ Na haha verzi wudahi Noé; Sem, Cham a Japhet. Te deɓ iyam nchè nchè mbia ʼa ta yu wudahai.

² Wudahai Japhet: Gomer, Magog, Madai, Javan, Tubal, Méchec a Tiras.

³ Wudahi Gomer: Ashkenaz, Riphat a Togarma.

⁴ Wudahi Javan: Elisha, Tarsis, Kittim a Dodanim.

⁵ Ndohi tʼherkeda man a tsko gèɗ auda te iyam, ta cüzlko va te pa, staɗ staɗ a herkeda, ara man nèʼèn ta, ara man gwoli ta, ara man kokwar-bi ta.

⁶ Na haha wudahi Cham: Cush, Mitsraim, Puth a Canaan.

⁷ Wudahi Cush ta haha: Saba, Havila, Sabta, Raema a Sabteca. Wudahi Raema: Séba a Dedan.

⁸ Cush a myu Nimrod ba, nengaʼa ndo nshèlèkuraʼa man a gi bi a géɗ herkeda a wuɗai.

⁹ Nengaʼa a nʼnde na a ndo mɓèr skwi mbiaʼa a sam di Ndo nzi pèc pècèk. A géɗ nengaʼa ta gada: Ndo mɓèr skwi mbiaʼa a sam di Ndo nzi pèc pècèk, ara Nimrod.

¹⁰ Nhinè kokwar-bi nengaʼa te Babel, Erec, Accad a Calné, tʼherkeda Shinear.

¹¹ Te pa a ndo a ma ma a Assur.

¹² Nengaʼa a ndûzlo kokwar Ninive, Rehoboth-Hir, Calach a Résen, te ndev Ninive a Calach, nasa kokwar mbiaʼa.

¹³ Mitsraim, bab Ludim, Anamim, Lehabim, Naphtuhim, Patrusim,

¹⁴ Casluhim, te tengaʼa ndohi Philistie a Caphtor ta shkè auda te pa.

¹⁵ Canaan, bab Sidon, tsuvom nengaʼa Heth;

¹⁶ a ndohi Jébus a Amor a Guirgasi,

¹⁷ a Hévi, a Arki, a Sini,

¹⁸ a Arvad, a Tsemar, a Hamath. Te deɓaʼa gwoli Canaan ta venda gèɗ ta.

¹⁹ Kuma ndohi Canaan a hinè te Sidon, a ndè a ma ma a Guérar, ha Gaza, a ma Sodome, Gomorrhe, Adma, Tseboim, ha ndikè a Lésha.

²⁰ Nasa wudahi Cham, ara gwoli ta, ara nèʼèn ta, ara kokwar ta, ara kokwar-bi ta.

²¹ Aman Sem ba, bab wudahi Héber, mbegéɗèʼa Japhet, a myu wudahai.

²² Wudahi Sem ta haha: Elam, Assur, Arpacshad, Lud, a Aram.

²³ Wudahi Aram: Uts, Hul, Guéter, a Mash.

²⁴ Arpacshad, bab Shélach; Shélach, bab Héber.

²⁵ Wudahi Héber cèw: staɗ, nzlembaɗ na Péleg, aman a pats nyi nengaʼa ndohi herkeda ta ngela te va. Kramam nengaʼa, nzlembaɗ na Jokthan.

²⁶ Jokthan, bab Almodad, Shéleph, Hatsarmaveth, Jérach,

²⁷ Hadoram, Uzal, Dikla,

²⁸ Obal, Abimael, Séba, Ophir, Havila a Jobab.

²⁹ Tengaʼa tèlèba wudahi Jokthan.

³⁰ Ta nza te Mésha, te verzi Sephar, ha ndikè a ma za a tsagai.

³¹ Na haha wudahi Sem, ara gwoli ta, ara nèʼèn ta, ara kokwar ta, ara kokwar-bi ta.

³² Na haha verzi ndohi Noé, ara man verzi ta, a kokwar-bi ta. Tetengaʼa ndohi a géɗ herkeda ta shkè auda, te deɓ iyam nchè nchè mbiaʼa.