Genèse 1 - Ma Zhiklè

Nhin herkeda

¹ Te nhinkaɗ na, Bi Zhiklè a ngau giɗfèk a herkeda.

² Herkeda ntil ɓai, kurndazlndazlaʼa. Ruva a nʼnza a géɗ drav iyam, a Mèzhèɓ Zhiklè a zhè a géɗ iyam.

³ A Bi Zhiklè a ngaɗa: Skwi nhel sam da ga! A skwi nhél sam nʼngaʼa.

⁴ A Bi Zhiklè a nrka, skwi nhél sam sa amba. A Bi Zhiklè a nkuzlokona skwi nhél sam auda te va ruva.

⁵ A Bi Zhiklè a mbaha na skwi nhél sam, pats, a mbaha na ruva, vad. A nda na ma dakwaɗ, a nda na ma a prèk, nasa mʼmèn staɗ nshèlèkuraʼa.

⁶ A Bi Zhiklè a ngaɗa: Giɗfèk da ga te ndev iyam, a nkezla iyam te va!

⁷ A Bi Zhiklè a ngau giɗfèk, a nkezla iyam, a gu ngela a géɗèʼa, ngela a godok.

⁸ Giɗfèk, Bi Zhiklè a mbaha na zhiklè. A nda na ma dakwaɗ, a nda na ma a prèk, nasa mʼmèn macecèwaʼa.

⁹ A Bi Zhiklè a ngaɗa: Iyam tʼhwaɗ giɗfèk da ɓica va a sam staɗ, sam ngworaʼa da rka! A ngu ar haha.

¹⁰ Sam ngworaʼa, Bi Zhiklè a mbaha na, herkeda; nhèyè iyam, a mbaha na, iyam mbiaʼa. A Bi Zhiklè a nrka, nʼngaʼa amba.

¹¹ A Bi Zhiklè a ngaɗa: Herkeda da ftsko skwi nɗaʼa auda: kuza man tser na a zhè, wof man a yi wuda tʼherkeda, ngiɗè ara ngakaɗ na, ngiɗè ara ngakaɗ na, a tser te pa! A ngu ar haha.

¹² A herkeda a nftsko skwi nɗaʼa auda: kuza man tser na a zhè, ngiɗè ara ngakaɗ na, ngiɗè ara ngakaɗ na, a wof, man a yi wuda, a tser te pa, ara ngakaɗ ta. A Bi Zhiklè a nrka, nʼngaʼa amba.

¹³ A nda na ma dakwaɗ, a nda na ma a prèk, nasa mʼmèn mamakaraʼa.

¹⁴ A Bi Zhiklè a ngaɗa: Skwi nhél samhai da ga a giɗfèk, a ta ɗèl nda pats a vad; a ta gi a skwi man a ngredè nda ngwar a via, a patshi a mvi a mvai,

¹⁵ a ta gi a skwi nhél samhai te giɗfèk, a ta hela sam a géɗ herkeda! A ngu ar haha.

¹⁶ A Bi Zhiklè a ngu skwi nhél samhi mbibihiaʼa cèw. Mbia ngiɗè, aman a gi bi a pats. Nkèshèa ngiɗè, aman a gi bi a vad, a ngu bantihi ba.

¹⁷ A Bi Zhiklè a mpe ta a giɗfèk, aman ta hela sam a géɗ herkeda,

¹⁸ a ta gi bi a pats a vad, a ta ɗèlè nda skwi nhél sam a ruva. A Bi Zhiklè a nrka, nʼngaʼa amba.

¹⁹ A nda na ma dakwaɗ, a nda na ma a prèk, nasa mʼmèn mafaɗaʼa.

²⁰ A Bi Zhiklè a ngaɗa: Skwi nte iyam da ga kumba te iyam, ɗiakihai da hau tʼhwaɗ giɗfèk! A ngu ar haha.

²¹ A Bi Zhiklè a ngau skwi mbiaʼa te iyam, a skwi tèlèba man a shèffè a shèwèlè te iyam, a skwi nkelpasl a va, ngiɗè ara ngakaɗ na, ngiɗè ara ngakaɗ na. A Bi Zhiklè a nrka, nʼngaʼa amba.

²² A Bi Zhiklè a mpshè ta ma, a ngaɗa: Va-yu wuda, va-mana a vata, va-ndha hwaɗ iyam mbiaʼa! Ɗiakihai da mana a vata a géɗ herkeda!

²³ A nda na ma dakwaɗ, a nda na ma a prèk, nasa mʼmèn mazlamaʼa.

²⁴ A Bi Zhiklè a ngaɗa: Herkeda da hulko skwi a nshèffè auda, skwi ndzhamhai, skwi nda-a-hwaɗhai, skwi dakhai, ngiɗè ara ngakaɗ na, ngiɗè ara ngakaɗ na! A ngu ar haha.

²⁵ A Bi Zhiklè a ngu skwi dakhai a skwi ndzhamhai tsaɗ tsaɗ tèlèba, a skwi man a hi tèlèba a géɗ herkeda. A Bi Zhiklè a nrka, nʼngaʼa amba.

²⁶ A Bi Zhiklè a ngaɗa: Ngo-gokoy ndo, ara mèzhèɓ va nga, a ta gi bi a géɗ klèfihi te iyam mbiaʼa, a géɗ ɗiakihi tʼhwaɗ giɗfèk, a géɗ skwi ndzhamhai, a géɗ skwi dakhai, a géɗ skwi man ta hi a géɗ herkeda!

²⁷ A Bi Zhiklè a ngu ndo, ara mèzhèɓ nengaʼa, a ngaʼa ara Mèzhèɓ Zhiklè, a ngu nguraʼa a ngwoz.

²⁸ A Bi Zhiklè a mpshè ta ma, a ngaɗa ta: Va-yu wuda, va-mana, va-ndha herkeɗa, va-kwor herkeda, va-gu bi a géɗ klèfihi te iyam mbiaʼa, a géɗ ɗiakihi tʼhwaɗ giɗfèk, a géɗ skwi ndzhamhai, a géɗ skwi man a hi tèlèba a géɗ herkeda!

²⁹ A Bi Zhiklè a ngaɗa: Na haha, i va kinè lak a géɗ herkeda tèlèba, man tser na a zhè, a wofhi tèlèba, man ta yi wuda, a tser te pa. Da gu a skwi nʼndi kinè.

³⁰ Aman a skwi dak a géɗ herkeda, a ɗiakihai tʼhwaɗ giɗfèk, a skwi tèlèba man a hi, a shèffè, a géɗ herkeda, i va ta mandai a ta ndiaʼa. A ngu ar haha.

³¹ A Bi Zhiklè a nrka skwi tèlèba man a gau: Na haha, nʼngaʼa amba a vata ba. A nda na ma dakwaɗ, a nda na ma a prèk, nasa mʼmèn mamokwaʼa.