Galates 6 - Ma Zhiklè

Va-zuɓ skwi nʼnzala a, ngiɗè a ngiɗè!

¹ Dalahimam ga, kinè man Mèzhèɓ Zhiklè a ndha ndav kinè! Man mali a kala na a gèɗ ndo ngiɗè, va-takaha, va-tilèʼa a ndav nlüɓekwaʼa. A ndo staɗ staɗ da gu maya a géɗ va na ba, man ɓai ta pe kinè a wi arsa.

² Staɗ staɗ da takaha a nzhüɓ skwi man a nzala na ndo ngiɗè, aman ar haha kin gu ara ma kita Kristi.

³ Aman ndo ngiɗè a huro, i mbiaʼa, i fena ngiɗè, ko nengaʼa a pi va na a wai a ri na.

⁴ Ndo staɗ staɗ da war gèɗ na dai; wa ngiɗè ba a ngècè njégèr va a géɗ na, a géɗ ndo ngiɗè ka ɓai.

⁵ Aman ndo staɗ staɗ tèlèba a skwi na a gèɗ na.

⁶ Aman ndo man ta njè na ma, da va na skwi a ndo man a njè na.

⁷ Kin pu va kinè a wi a ri kinè ɓai! Kin slaha kin mbèhwali a Zhiklè azɓai. Skwi man ndo a zlekiaʼa, a di a ɓicèʼa.

⁸ Ndo man a zleki a géɗ ntétékè na, a di a ɓicè te ntétékè skwi man a gedassa va na. Aman ndo man a zlekiaʼa te Mèzhèɓ, a di a ɓicè te Mèzhèɓ Zhiklè nshèffè a mèdèp.

⁹ Ngo-gokoy skwi man amba, a nga ngézhè azɓai. Aman nga jèkeda ɓai, a pats nasa a di nga da ɓicè skwai.

¹⁰ Gar haha aman nga slaha dai, ngo-gokoy skwi man amba a sam ndohi tèlèba, holholaʼa a sam gwoli nga te ncè-a-ndav.

Mbali man deɓa

¹¹ Ma haha i winda kinè a lamba mbiaʼa a ri ga.

¹² Ndohi man ta gaɗa kinè, sèi kin ngel ngwon ndèzl, ta woy a ta gi a ndohi mbibihiaʼa a sam di ndohai, a ta woy aman ndohi ngiɗè ta paraha ta azɓai a géɗ wof ngézlèl Kristi.

¹³ Aman tengaʼa ba, man ngwon ta nʼngela, ta jèjèr ma kita azɓai. Aman ta woy a kin ngél ngwon, aman ta slaha ta jégèr va a géɗ kinè.

¹⁴ Aman i woy a i jégèr va azɓi fèt ba. Aman nʼnjèl ga staɗgenè, nengaʼa wof ngézlèl Bi nga Yèsu Kristi, te nengaʼa herkeda ngezlala a sam ga, a iyè a sam herkeda.

¹⁵ Aman ko ngwon nʼngela, ko ngwon nʼngel ɓai, skwi ambalai. Aman sèi ndo man a ngots nshèffè mɓuaʼa.

¹⁶ A sam ndohi tèlèba man ta jèjèr ma haha – gumai a pombi Zhiklè da zhè a sam ta, a sam Israel, ndohi Zhiklè, tèlèba.

¹⁷ Anai ndo da ngezyè te deɓaʼa asaɓai! Vovi mblè a va ga a ngredyè, ara man i ɓèl Yèsu.

¹⁸ Pombi Bi nga Yèsu Kristi, da zhè a nda Mèzhèɓ kinè, dalahimam ga! Amen.