Galates 4 - Ma Zhiklè

¹ Aman i gaɗa: Aman ndo nʼndi gai ngra di ɓai, ko a gi bai a géɗ skwi tèlèba, a fena ɓèlè di azɓai.

² Na zhè te ri ndohi mɓer gai, ha pats man bab na a hérèʼa.

³ Lèmèlèmè nga: aman nga gra di ɓai, nga bèlèlihi wudi skwi herkeda.

⁴ Aman tiɗè sama ma, Zhiklè a nzlündo kra nengaʼa, man ngwoz a myau, a mfeda a hwaɗ ma kita,

⁵ aman a preka ta man ta tʼhwaɗ ma kita auda, aman nga ndi a wud hwaɗ gai.

⁶ Anai kinè wudahai, man Zhiklè a zlündo Mèzhèɓ kra nengaʼa a ndav kinè, man a gaɗa: Abba, bab ga!

⁷ Gar haha anai ka ɓèlè asakaɓai, aman kra, kra hwaɗ gai. Te deɓaʼa Zhiklè a nge ka a ndo nʼndi gi ba.

Paul a hér gèɗ a géɗ ndohi ncè a ndav

⁸ Te va nasa, aman kin sun Zhiklè ɓai, kin gu ɓèlèlihi zhiklèhai, man ta a vava zhiklèhi ka ɓai. Aman antanta kin sun Zhiklè –

⁹ man ɓai Zhiklè a sen kinè, kin men kinè a deɓa zaʼa a sam skwi man wuɗi na azɓai, ntawassaʼa, a kin woy a kin gi ɓèl tengaʼa zaʼa èhèmè?

¹⁰ Kin jè-jèr ma patshai, a kia, a ngolala, a via.

¹¹ I gi zlau, i geda matakwan a va ga a sam kinè ambalai.

¹² Dalahimam ga, i tsa kinè rai, va-nda lèmèlèmè ara ga.

¹³ Kin gay skwi ambaɓia ɓai. Kin suna, aman i njè kinè ma mbelaʼa nshè-lèkuraʼa, i mbelakaɓai.

¹⁴ A kin kwolyè ɓai a géɗ matakwan ga, a skwi te va ga a nʼndara kinè ɓai; aman kin ciyè ara man i gol Zhiklè, a vava ara Kristi Yèsu.

¹⁵ A pats nasa mwuffe kinè a zhè a vata ba! I gi malwuɗai, aman agassa kin slaha, ko dai, a kin veɗotkoɗauda a kin vayè.

¹⁶ Aman a géɗ man i ngreda kinè ma nzuraʼa, i ndo mayam kinè ɗè?

¹⁷ Ta woy a ta bid kinè a verzai. Ta woy a ta hel kinè auda te ri ga genè, a kin fi gèɗ a ma tengaʼa.

¹⁸ Aman kin gi gazawa a géɗ skwi man amba, pèc pècèk, amba genè, ko i zhè a sam kinè, ko i az a sam kinè ɓai.

¹⁹ Kinè wudahi ga, man i ɗish va a géɗ kinè genè, ha pats man Kristi ngra te ndav kinè.

²⁰ A woy i zhè a sam kinè antanta, a kin tsena daʼai ga, te man i hér gèɗ a géɗ kinè.

Nlèmdè skwi a nda Agar a Sara

²¹ Va-gaɗayè, kinè man kin woy a kin jèjèr ma kita Zhiklè: Kin tsena ma kita ɓi ɗè?

²² Aman ta Windo, wudahi Abraham cèw, staɗ a myau tʼhwaɗ ɓèl na, ngiɗè tʼhwaɗ ngwoz ri na.

²³ Aman nengaʼa man a myau tʼhwaɗ ɓèlè, a myau ara matakaʼa; aman nengaʼa man a myau tʼhwaɗ ngwoz ri na, a myau te mpèsl rai.

²⁴ Verzi ma haha a zhè. Na haha nderzlèma cèw: staɗ te za Sina, man a yiaʼa tʼhwaɗ ɓèlè, nengaʼa Agar.

²⁵ Aman Agar, a ma arabe, ara za Sina. Sina za te kokwar Arabe, a lèmdè a kokwar Jérusalem, man a zhè a patsna. Nengaʼa a wudahi nengaʼa ta gi ɓèlè.

²⁶ Aman Jérusalem man a zhè te géɗèʼa, nengaʼa ngwoz gai, nengaʼa mam nga.

²⁷ Aman ɗèlèwèr Zhiklè a gaɗa: Wuffa, ka ka delai, man ka yi kra azɓai! Washkè a ka boho, ka man ka ɗish va azɓai! Aman ngwoz delai a nʼngots wudahi kumba, a fena nengaʼa man baki na a zhè.

²⁸ Aman kinè, dalahimam ga, kinè ara Isaac, man Zhiklè a mpasleda ria a hai.

²⁹ Aman ara man a pats nasa, ndo man ta yau ara matakaʼa, a mparaha ndo man ta yau te Mèzhèɓ, lèmèlèmè a patsna.

³⁰ Ɗèlèwèr Zhiklè a gaɗ kè? Va-dzarda ngwoz, man ɓèlè, a kra nengaʼa, auda; aman kra ɓèlè da ndu gai a nda kra ngwoz gi ɓai.

³¹ Gar haha anai, dalahimam ga, nga wudahi ɓèlè ka ɓai, aman wudahi ngwoz gai.