Galates 3 - Ma Zhiklè

Ma kita Zhiklè ɗè, ɗe ncè-a-ndav ɗè?

¹ Ndohi Galate ga, maya kinè azɓai! Nʼngwode kinè wa? Kinè ara man ta gezlala Yèsu Kristi a sam di kinè.

² I woy a i shinè te ri kinè: Kin ngots Mèzhèɓ Zhiklè a géɗ man kin jèjèr ma kita Zhiklè ɗè, ɗè a géɗ man kin dzodzor ma ncè-a-ndav ɗè?

³ Kin sun maya ɓi ɗè? Kin hüno te Mèzhèɓ Zhiklè, a kin woy a kin ndivè antanta a maya ndo ɗè?

⁴ Matakwan mbiaʼa haha kin su ambali cè?

⁵ Aman Zhiklè a va kinè Mèzhèɓ, a gi skwi mbiaʼa te ndav kinè aranta, a giaʼa a géɗ man kin jèjèr ma kita ɗè, ɗè a géɗ man kin jèjèr ma ncè-a-ndav ɗè?

⁶ Lèmèlèmè ara Abraham a nco Zhiklè a ndav, a Zhiklè a nfu a ndo nzuraʼa a géɗ ncè-a-ndav nengaʼa.

⁷ Va-suna: tengahi man ta co a ndav, ta wudahi Abraham.

⁸ Aman ɗèlèwèr Zhiklè a nʼngreda halaʼa, ara man Zhiklè a da va ta ngi-zuraʼa te ncè-a-ndav ta a ndohi nte deɓa. Gar haha a ngaɗa na Abraham: A géɗ ngaya ndohi herkeda tèlèba ta da ngècè mpshè ma.

⁹ Anai ndohi ncè-a-ndav ta ngècè mpshè ma a géɗ Abraham, man nco a ndav.

¹⁰ Aman tengahi man ta woy a ta gi sèi ara ma kita Zhiklè, ta tʼhwaɗ ma mphomdaʼa. Aman ɗèlèwèr Zhiklè a gaɗa: Ko wawa man a jèjèr ma ɗèlèwèr ma kita Zhiklè tèlèba azɓai, da phomda!

¹¹ Aman ndo a ngècè ngi-zuraʼa a sam di Zhiklè azɓai a géɗ man a jèjèr ma kita Zhiklè; aman ndo a nzi a nshèffè a géɗ ngi-zuraʼa te ncè-a-ndav.

¹² Aman ma kita Zhiklè a shkè te ncè-a-ndav ka ɓai, aman ndo man a fi gèɗèʼa, a da nzi a nshèffè a vna.

¹³ Aman Kristi a mpreka nga auda te ma kita Zhiklè man a phomde nga, a géɗ man a gaʼa a skwi mphomdaʼa a géɗ nga, ara ɗèlèwèr Zhiklè a gaɗa: Ndo man ta ktsala, mphomda.

¹⁴ Aman mpshè ma Abraham a mshkè a sam ndohi nte deɓa te Yèsu Kristi, a nga ngècè Mèzhèɓ man mpasla nga a ri te ncè-a-ndav.

Ma kita Zhiklè a ma mpèsl rai

¹⁵ Dalahimam ga (i woya man i ngra kinè skwi man ndohi ta giaʼa): Aman babgai a njè ma a hai, ga a metsi na, ndohi ta rka ara ma ambali ɓai. Ndo a slaha a nzedaha maʼa, a mpi ma a vaʼa, azɓai.

¹⁶ Anai Zhiklè a mpasla na ri a hi a Abraham a ndo te verzi nengaʼa. A gèɗè azɓai, a ndohi verzi nengaʼa, ara man ta kumba. Sèi a ndo staɗgenè – a ndo te verzi nengaʼa, nengaʼa Kristi.

¹⁷ I hur ar haha: Ma kita man a shkè mvi 430 te deɓaʼa, a slaha a ngedassa ma nderzlè-ma man Zhiklè a mvau halaʼa azɓai, a slaha a ngedassa ma mpèsl ri azɓai, sèi a rufaʼa.

¹⁸ Aman ta slaha ta ngècè skwi gai a géɗ ma kita Zhiklè, ta ngècè a géɗ ma mpèsl ri ka ɓai. Aman Abraham a nʼngotso te ma mpèsl ri Zhiklè.

¹⁹ Ta vau ma kita a géɗ mè? Ta vau a géɗ man a ngrédè malai, ha ndo te verziaʼa, man mpèsl ri a nengaʼa, a shkè ma. Zhiklè a nzlündo ma kita aranta a ri golahi Zhiklè, a mbezda na a ri a ndo.

²⁰ Aman Zhiklè, nengaʼa staɗgenè. Man na staɗ a géɗ na, ndo mbezda na skwi a ri azɓai.

Verzi ma kita Zhiklè

²¹ Mè? Ma kita Zhiklè a ma mpèsl ri Zhiklè ta hümdè azɓi ɗè? Halau, ta hümdè! Aman agassa ma kita a slaha a mvi nshèffè, ar ngizuraʼa a shkè te ma kita Zhiklè a vava.

²² Aman ɗèlèwèr Zhiklè a pizleda ndohi tèlèba a hwaɗ malai. A ndohi man ta co a ndav, ta ngècè ma mpèsl ri te ncè Yèsu Kristi a ndav.

²³ Aman ncè-a-ndav mshkè di ɓai, nga tʼhwaɗ ma kita Zhiklè, ha ncè-a-ndav a zhè, man a pats ngiɗè nʼngreda auda.

²⁴ Gar haha ma kita Zhiklè, skwi nʼngatsa nga maya a ma ma a sam Kristi, aman nga da ndi a ndohi nzuraʼa te ncè-a-ndav.

²⁵ Aman antanta ncè-a-ndav a mshkè ma, nga te ri skwi nʼngatsa nga maya asakaɓai.

²⁶ Aman kin tèlèba wudahi Zhiklè te ncè Yèsu Kristi a ndav.

²⁷ Ara man ko wawa te ndev kinè a ngu baptême te Kristi, nara man kin feda Kristi a va.

²⁸ A haha tsaɗ tsaɗ azɓai, ko Juif, ko Grec, ko ɓèlè, ko kra ngwi, ko nguraʼa, ko ngwoz, kin tèlèba staɗ te Yèsu Kristi.

²⁹ Aman kinè a Kristi, kinè wudahi Abraham, a kin ngècè skwi man Zhiklè a mpasla na ri a hi a Abraham.