Galates 2 - Ma Zhiklè

Ndohi sak ngiâè ta cè Paul

¹ Te deɓ mvi 14 ngo do a deɓa zaʼa a kokwar Jérusalem, a nda Barnabas a Tite.

² Aman i do a pa a géɗ skwi man a gudokoy va a dai, a i ngra ta kramamhi ga ma mbelaʼa man i njè ta ndohi nte deɓa (a ndohi mbibihiaʼa te gi ta), a géɗ man i woy a i suna, i hu ambali ka ɓai.

³ Aman Tite, ko nengaʼa ndo Grec, ta gaɗa na: Sèi ngela ngwon ndèzl, ta gaɗa na ɓai.

⁴ A kramamhi ncèkèlma ngiɗè tsaɗ tsaɗ ta wucka nga va, aman ta war a ta njénjè-rèʼa, ara man nga ngots sam mpraʼa te Yèsu Kristi, a ta woy a ta ge nga a ɓèlèlihi ta.

⁵ Aman nga ca ma tengaʼa ɓai, a nga ga ɓèl tengaʼa ɓai, ko kèshkata, a géɗ man ma nzuraʼa te ma mbelaʼa do do a ma ma a sam kinè.

⁶ Aman ndohi man ta ara ndohi mbibihiaʼa a sam di ndohai – ko wawa – a ga ga pa mè? Aman Zhiklè a woy ndo te di mwoyè azɓai, a ndohi mbibihiaʼa sa ta gaɗayè ma ngiɗè ɓai.

⁷ Aman ta rka Zhiklè a mvay ma mbelaʼa a rai, aman i njè ta ndohi nte deɓa, lèmèlèmè ara Pierre a njè ta ma mbelaʼa a ndohi Juif.

⁸ A nengaʼa man a mva na wuɗi a Pierre, man a slaha a ngi mizlinè ndo sak a sam ndohi Juif, nengaʼa a mvay wuɗi lèmèlèmè a sam ndohi nte deɓa ba.

⁹ Jacques a Pierre a Jean, tengaʼa man ta gaɗa, ta ndohi nsal ta, ta rka pombi man i ngotso, ta ciyè a Barnabas, a ta gso ri mandi nga, a ta lèmdè ma a nda nga, aman nga njè ta ndohi nte deɓa, aman tengaʼa ta njè ta ndohi Juif.

¹⁰ Sèi ta dzhoɗo, aman nga hér ndohi ntawassaʼa; skwi sa i woya a i gia pèc pècèk.

Paul a ga na ndzoan a Pierre te Antioche

¹¹ Aman Pierre a mshkè a kokwar Antioche, i Sala va ga a sam na, te man a nyak na te skwi ngiɗè.

¹² Ga ndohi Jacques ta shkè, a nʼndau skwai a nda ndohi nte deɓa. Te deɓaʼa, aman ndohi sa ta shkè ma, nengaʼa a mʼmenda va na a deɓa a sam ta, a géɗ man a ngu zlau ndohi Juif.

¹³ Ndohi Zhiklè ngiɗè te va ndohi Juif ta ngwoda ndo arsa a nda nengaʼa, a ta pèkètèda Barnabas a nda tengaʼa.

¹⁴ Aman i rka ara man ta gu skwi nzura ɓai, a ta dzodzor ma nzuraʼa te ma mbelaʼa ɓai, i gaɗa na Pierre a sam di ndo tèlèba: Aman ka, ka ndo Juif, a haha ka nzi a nshèffè ara ndo nte deɓa, ara ndo Juif ka ɓai, ka fa ta ma a gèɗ a ndohi nte deɓa, aman ta nzi a nshèffè ara ndohi Juif èhè-mè?

Ndohi Juif a ndohi nte deɓa ta mbel ta te ncè-a-ndav

¹⁵ Te nyakaɗ nga, nga ndohi Juif, ndohi malihi nte deɓa ka ɓai.

¹⁶ Aman nga suna, ndo a ngècè ngi-zuraʼa azɓai a géɗ man a jèjèr ma kita Zhiklè, aman a géɗ man a cè Yèsu Kristi a ndav. Nga ba nga co Yèsu Kristi a ndav, aman nga ba nga ngots ngi-zuraʼa a géɗ ncè Kristi a ndav, a géɗ nfi gèɗ a ma kita Zhiklè ka ɓai. Te ma kita Zhiklè ndo a ngècè ngi-zuraʼa asaɓai.

¹⁷ Aman nga woy a nga ngècè ngi-zuraʼa te Kristi, a ta ngatsa nga a ndohi malihai a géɗ ma kita Zhiklè, Kristi ara ndo mizlinè mali ɗè? Az arsa ɓai!

¹⁸ Aman skwi man i mbeɗa a matsa ma, i rèmè zaʼa, i ndeda va a ga ndo mphömè a ri ga.

¹⁹ Aman ma kita Zhiklè a gu aman i metsi ga a sam ma kita Zhiklè ma, aman i nzi a nshèffè a Zhiklè: i gezlala a nda Kristi.

²⁰ I nzi a nshèffè, aman anai i ka ɓai, aman Kristi a nzi a nshèffè te ndav ga. I nzi a nshèffè te va ga haha, a géɗ ncè kra Zhiklè a ndav, man a woy iyè a ndav na, a mvau va na a géɗ ga.

²¹ I kwola pombi Zhiklè ɓai; aman agassa ngi-zuraʼa a shkè te ma kita, ar Kristi a mʼmets na ambalai.