Galates 1 - Ma Zhiklè

Mbalai

¹ Paul, ndo sak Zhiklè, man ndo a nfau, a nzlündo ka ɓai, aman Yèsu Kristi, man Zhiklè Bab nga a nslambaɗda te ndev ndohi mʼmetsaʼa;

² a nda kramamhi tèlèba man ta zhè a sam ga, a sam mpi ndohi Zhiklè te Galatie tèlèba.

³ Pombai da zhè a nda kinè, a gumai te Zhiklè Bab nga, te Bai Yèsu Kristi,

⁴ man a vu va na a géɗ mali nga, aman a mbel nga tʼherkeda haha man ambaɓai, ara Zhiklè, Bab nga, man a woyaʼa.

⁵ A nengaʼa nʼnjèlè a mèdèp. Amen.

Ma mbela a ngiɗè azɓai

⁶ I rzl ga, a géɗ man kin jèkeda nengaʼa man a baha kinè te pombi Kristi, tsam tsam aranta, a kin ngwèdè ma a kinè a sam ma mbelaʼa ngiɗè,

⁷ ko ma mbelaʼa ngiɗè azɓai; aman ndohi ngiɗè tsaɗ tsaɗ ta zhè, man ta dzakaɓama kinè gèɗ, a ta woy a ta ngwèdè ma mbelaʼa te Kristi.

⁸ Aman ko nga, ko gol Zhiklè te géɗèʼa, a da njè kinè ma mbelaʼa tsaɗ, ara nengaʼa man nga njè kinè ka ɓai, da phomda!

⁹ Ara ngèɗ ga matsa, i gèɗè a vaʼa: Aman ndo ngiɗè a njè kinè ma mbelaʼa tsaɗ, ara nengaʼa man kin ngotso ka ɓai, da phomda!

¹⁰ Anai i gèɗè aman i ambaha ta ndohi ɗè, ɗè Zhiklè ɗè? Aman i woy a i gi ara man ambaha ta ndohai, i ɓèl Kristi ka ɓai.

Paul a ndi a ndo sak

¹¹ Aman i gaɗa kinè, dalahimam ga, ma mbelaʼa man i njè kinè, ma ndo ka ɓai.

¹² I slebau a sam ndo ka ɓai, i ngotso a sam ndo ka ɓai, sèi a sam Yèsu Kristi man a ngredayè.

¹³ Kin tsena skwi man i gau, te va man i jèjèr tsuf ndohi Juif zlèzlèa, ara man i paraha ta mpi ndohi Zhiklè a vata ba, a i woya man i gedas ta.

¹⁴ I fena slalahi ga te skwi man ndohi Juif ta giaʼa, a i gu srak kumba a géɗ ma babab nga.

¹⁵ Aman Zhiklè a hur amba, nengaʼa man a woy-kayè man i tʼhwaɗ mam ga dai, aman a bahayè te pombi na,

¹⁶ a ngreda kra nengaʼa auda te iyè, aman i njè ta ma mbelaʼa a ndohi nte deɓa. A i do, a i dzhoɗ ma a sam ndo ngiɗè ɓai,

¹⁷ a i do a kokwar Jérusalem, a sam ndohi sak halaʼa ɓai. Aman i do a ma a kokwar Arabe, a i shkè a deɓa a kokwar Damas.

¹⁸ Te deɓ mvi makar i do a kokwar Jé-rusalem a sam Pierre, a i nza a pa mʼmèn ga 15.

¹⁹ I rka ta ndohi sak ngiɗè ɓai, sèi Jacques, kramam Bai Yèsu.

²⁰ Skwi man i windè kinè, Zhiklè a suna, i tsakalma ka ɓai.

²¹ Te deɓaʼa i do a kokwar Syrie a Cilicie.

²² Aman mpi ndohi Zhiklè te Kristi te Judée ta rkay di ɓai.

²³ Ta tsena a zlembaɗ genè: nengaʼa man a mparaha nga te va nasa, antanta a njè ma ncè-a-ndav, man a woya a ngedassaʼa nshèlèkuraʼa.

²⁴ A ta slubordo Zhiklè kumba a géɗ ga.