Ezéchiel 8 - Ma Zhiklè

Skwi man Ezéchiel a rka a géɗ Jérusalem

¹ Aman te mvi mamokwaʼa, a ki 6, mʼmèn 5, i nza te gi ga, a ndohi Juda nhalaʼa ta nza a sam ga. A Bi Zhiklè Ndo nzi pèc pècèk a mfay ri a gèɗ.

² A i pu dai: I rka skwi Zhiklè ngiɗè, nara ndo. A hüno a géɗ godor, a ndè a godok, vogwa. A hüno a gèɗ godor a ndè a géɗèʼa, sam nhela ara züdo nterkasla man a si dai.

³ A ntorko skwi ngiɗè ara rai, a ngsyè te gwots gèɗ. A Mèzhèɓ Zhiklè a ndzavyè a géɗèʼa, te ndev nda giɗfèk a herkeda, a ndyè a kokwar Jérusalem, te skwi Zhiklè man a nrkay a dai; a ntamagi tʼhwaɗaʼa, man a nʼngwoda ma a civèɗ man a géɗèʼa, a sam skwi mbèh skwai man a mpoko na gèɗ ndav auda a Zhiklè, a srak.

⁴ Na haha nʼnjèl Zhiklè Israel a zhè a pa, lèmèlèmè ara man i rka a dal kokwar.

⁵ A ngaɗayè: Ka ndo, pu di a civèɗ man a géɗèʼa! A i pu di a civèɗ man a géɗèʼa, a i rka vrai a ntamagai te man a géɗèʼa, skwi mbèh skwai man a mpoko na gèɗ ndav auda a Zhiklè, a ntamagai.

⁶ A ngaɗayè: Ka ndo, ka rka skwi hori mbiaʼa man ndohi Israel ta giaʼa a haha, man ta dzamyè auda a sam ga nkezlaʼa ɗè? Ka da rka skwi hori a fena anta.

⁷ Te deɓaʼa a ndyè a ntamagi gi Zhiklè nʼngalaʼa. A i pu dai, a i rka dergi nzlina.

⁸ A ngaɗayè: Ka ndo, zlüno gai! A i zlina gai. A ngaɗayè: Memeɗda va a pa a vna! Aman i memeɗda va ga a pa a vna, i rka ntamagi a ma ga.

⁹ A ngaɗayè: Do a pa a ka rka skwi hori man ta gia te pa!

¹⁰ A i do a pa, a i rka mèzhèɓ skwi ngiɗè tsaɗ tsaɗ man a dè a hwaɗ tʼhai, skwi ndzhamhai, skwi mbèh skwi Israel tèlèba man hori te pa, mvèhèʼa a der gi tèlèba.

¹¹ Ndohi 70 ta zlatsa a sam ta, te va ndohi Israel mbibihiaʼa. Jaazania, kra Shaphan, te va tengaʼa. Staɗ staɗ tèlèba a shiɗèf ɓurdi te rai, a vodzok skwi man ta ndaraʼa a dè a géɗèʼa.

¹² A ngaɗayè: Ka ndo, ka rka skwi man ndohi Israel mbibihiaʼa ta gia te ruva dè? Staɗ staɗ te gi mʼmbèh skwi na? Ta gaɗa: Ndo nzi pèc pècèk a rka nga ɓai. Ndo nzi pèc pècèk kal na auda te kokwaraʼa.

¹³ Te deɓaʼa a ngaɗayè: Ka da rka skwi hori mba nengaʼa anta man ta giaʼa.

¹⁴ Te deɓaʼa a ndyè a ntamagi gi Zhiklè, te man a géɗèʼa. Na haha ngwozi ta nza a pa a ta kuɗi Thammuz.

¹⁵ A ngaɗayè: Ka ndo, ka rka dè? Ka da rka skwi hori ngiɗè, mba nengaʼa.

¹⁶ A ndyè a gi nʼngalaʼa tʼhwaɗaʼa te gi Zhiklè. Na haha a ntamagi gi Zhiklè, te ndev gala a sam mvi skwi a Zhiklè, ndohi ta zhè, ta gi 25 ma ba, ta ngwoda na deɓa a gi Zhiklè. Ta gurɓahai a ta tsi ri a pats, ta peda di a civèɗ mvèng pats.

¹⁷ A ngaɗayè: ka ndo, ka rka dè? Aman ndohi Juda ta gi skwi hori a haha, a slra ta ɓi ɗè? A ta ndha kokwar tèlèba a skwi man ta gi a wuɗai, a ta pokoy gèɗ ndav auda zaʼa. Ta gedko htsan a vah man ta peda a pa.

¹⁸ Gar haha i ba i woy a i ga ta skwi a ndav. I da pi di mwoy-ndo azɓai, ta siyè te va azɓai. Ta da kuɗi a vata a zlembaɗ ga, aman i da cinè ma tengaʼa azɓai.