Ezéchiel 7 - Ma Zhiklè

Israel tèlèba ngedas na

¹ Ndo nzi pèc pècèk a ngaɗayè:

² Ka ndo! Bi Zhiklè Ndo nzi pèc pècèk a ngaɗa na herkeda Israel: Ndikè-ma kalka ma! Te tsagi kokwar faɗ tèlèba.

³ Ndikè-ma a mshkè a géɗ ngaya. I pra ka ndzoan a gèɗ, a i ga ka kita ara civèɗ ngaya, a i ga ka kita a gèɗ skwi hori ngaya tèlèba.

⁴ I pi di mwoy-ndo azɓai, ka siyè te va azɓai, aman i ga ka kita ara civèɗ ngaya. Skwi hori ngaya a zhè a sam di ngaya, a ka da suna, i Ndo nzi pèc pècèk.

⁵ Gar haha Bi Zhiklè Ndo nzi pèc pècèk a gaɗa: Matakwan kalka ma! Aman pèc pècèk matakwan, matakwan, matakwan!

⁶ Ndikè-ma kalka ma! Ndikè-ma a mshkè a géɗ ngaya ma, na haha a mshkè ma!

⁷ Di man a kinè ma, a ndohi kokwar! Tiɗè sama ma, patsa kalka ma, pats matakwan a géɗ kinè, pats mwuffè ka ɓai.

⁸ Antanta i ga kinè ndzoan a gèɗ, a i ga kinè ndzoan a va, i woya a i ga kinè kita ara civèɗ kinè, a i ga kinè kita a géɗ skwi hori kinè tèlèba.

⁹ I pi di mwoy-ndo azɓai, kin siyè te va azɓai, i da ga kinè kita a géɗ civèɗ kinè. A skwi hori da ngredakaɗ na auda te ndav kinè, a kin da suna, i Ndo nzi pèc pècèk man i tsi ndo.

¹⁰ Anai patsa a mshkè ma! Na haha a zhè ma! Ri wof a tsai, nfi va a gi holholaʼa.

¹¹ Gada shèwa a nslambaɗa a wuɗai, aman a tse ta a géɗ man ta jèkeda ma kita Zhiklè.

¹² Tiɗè samaʼa, patsa ndul ndul ma! Ndo mshum skwai da wuffa ɓai, ndo mprè skwai da hur gèɗ ɓai, aman ndzoan a mshkè a gèɗ ndohi tèlèba.

¹³ Ndo man a da prè gi dau na, a ngècè a deɓa asaɓai, ko a zhè a nshèffè dai. Aman ndzoan a shkè a géɗ ndohi tèlèba. Ndo azɓai man a slalia a ngsa nshèffè a ri na, a géɗ mali ta.

¹⁴ Va-tsu tolom var, va-tilda va a hai! Aman ndo a dè var azɓai, a gèɗ man ndzoan ga a shkè a géɗ tenga tèlèba.

¹⁵ Tsakwal tʼuda, gidiɓèr a mai te gai. Ndo man a zhè te dak, ta da kéɗèʼa a tsakwal. Ndo man a zhè tʼhwaɗ kokwar, mai a gidiɓèr a da kéɗèʼa.

¹⁶ Aman matrhiaʼa ta wuc ta a géɗ za, ta da zi ta tèlèba a géɗ mali ta.

¹⁷ Rihí tèlèba ta da wushèhal, gurmbèzh tèlèba a ndi na tʼhai.

¹⁸ Ta da fi maslaka sam kuɗa a va, ta gudzai, tèlè hori a dai, ta tèlèba gèɗ mshaʼa.

¹⁹ Ta da wusheda Suli ta a civèɗ, guro tengaʼa a da ndi na a zai. Suli ta, a guro ta, a slalia a mbel ta azɓai a pats ndzoan Ndo nzi pèc pècèk. Ta slalia ta ngeza ntétékè tengaʼa bai, ta slalia ta ngeza hwaɗ tengaʼa bai. Skwi haha a slafadama ta sak, a ta kalahi a malai.

²⁰ Guro, amba a dai, ta gi skwi nfi va a vna, ta gi skwi mbèh skwi a vna. Gar haha i ngwèɗèʼa, a sam ta, a skwi man a ndara ta.

²¹ I gi a ndohi man verzi ta tsaɗ ta heldama a metsar, a ndohi ambaɓihiaʼa holholaʼa ta dumda ma.

²² I peda di ga aussa a sam ta. Metsarhi ta da dérɗè skwi mèshèlè ga, ta dümèʼa a ta dérɗèʼa.

²³ Mali ndohi nkeɗa ndo nʼndha te pa, te man te kokwar tèlèba ta gi skwi a wuɗai.

²⁴ I da baha ta te va kokwar-bihi man ta ambaɓi holholaʼa, a ta düm gihi ta. I da gedassa nfi va ndohi wuɗai, a i phomde sam mvi skwi a Zhiklè ta.

²⁵ Zlau mʼmetsi a shkè. Ta woy skwi mʼmbél ta, aman ta ngècè azɓai.

²⁶ Skwi mwuɗitpa a shkè. Pèc pècèk skwi mwuɗitpa, skwi mwuɗitpa; pèc pècèk ma mwuɗitpa, ma mwuɗitpa. Ta dè a sam ndo nhadka ma, da ngreda ta skwai; a ndo mvi skwi a Zhiklè a sun skwi man a slebda ta bai. Ndohi nhalaʼa ta sun maya ɓai.

²⁷ Bai a tsi nguzlah, kra bai a rzlè na, ri ndohi nkamaʼa ta gudzi te ri zlau. I da ga ta ara maya nshèffè ta. I da ga ta kita ara kita man ta bozlo, a ta da suna, i Ndo nzi pèc pècèk.